Epal krixchanoetike tsjakʼbe sbaik ti kʼu yelan li vinajele xchiʼuk buchʼutik ti te nakajtike. Ep ta tos ti kʼu yelan tsnopik ta sventa taje. Jlom krixchanoetike tsnopik ti jaʼ te oy li buchʼutik chamem xa yuʼunike, ti skʼan xichʼik ta mukʼe. Jlom xtoke tsnopik ti jaʼ li bu naka lekilal oy xchiʼuk ti xmuyubajik noʼoxe, ti jaʼ ti bu nakalik li anjeletik xchiʼuk li lekil krixchanoetik ti chamemik xae. Yantik xtoke, xchʼunojik ti jaʼ ti bu nakalik epal miyon diosetike.

Ta sventa li vinajele, oy epal krixchanoetik chalik ti mu stakʼ naʼel ti kʼu yelan oye, yuʼun muʼyuk buchʼu yalem talel sventa chalbutik ti kʼu yelan ta melele. Li kʼusi tsnopik taje mu meleluk. Yuʼun li Jesukristoe te toʼox nakal ta vinajel kʼalal muʼyuk toʼox talem ta balumile. Jaʼ jech laj yal ta jamal kʼalal xi laj yalbe li jbabeetik ta relijion li ta baʼyel sigloe: «Yuʼun likemun tal ta vinajel, pe maʼuk sventa tal jpas li kʼusi tskʼan koʼonton jtuke, jaʼ li kʼusi tskʼan yoʼonton li buchʼu la stakun tale». Jaʼ yuʼun, li Jesuse snaʼoj lek stuk kʼalal xi laj yalbe li yajchankʼoptake: «Oy ep avilal bu stakʼ xijnaki li ta sna Jtote» (Juan 6:38; 14:2).

Li Stot li Jesuse jaʼ li Jeova Diose xchiʼuk te oy li «sna» ta vinajele (Salmo 83:18TNM). Jaʼ yuʼun, jaʼik noʼox xuʼ xalbutik ti kʼu yelan ta melel li vinajele. Li Jeova xchiʼuk li Jesukristoe toj yan sba yutsil ti kʼu yelan laj yakʼbeik yil li tukʼil yajtuneltak ta sventa ti kʼu yelan li vinajele.

Li ta yan mantal chtale te chalbe skʼoplal jun chibuk loʼil ta Vivlia ti chalbeik skʼoplal li kʼusi laj yilik jayvoʼ viniketike. Mi laj akʼel li kʼusi chale, teuk me ta ajol ti mu xkoʼolaj li kʼusitik oy ta balumile xchiʼuk li ta vinajele, yuʼun li ta balumile stakʼ ilel xchiʼuk pikel li kʼusitike. Jaʼ yuʼun li Diose muʼyuk jech laj yalbutik smelolal jech kʼuchaʼal snaʼ xkʼopojik li buchʼutik te oyik ta vinajele, ti jechuke mu onoʼox xkaʼibetik smelolal, jaʼ yuʼun li Diose oy kʼusi la spas sventa mas kʼunuk ta aʼibel smelolal li vinajele. Mi laj achanbe skʼoplale, ta me skoltaot ta yojtikinel li buchʼutik te nakalik li ta ‹epal avilal› te ta vinajele.