Kʼelo li kʼusi yichʼoje

Sventa xasut ta xchibal pajina

Batan ta saʼobil

Stestigotak Jeova

tsotsil

Li Jkʼel osil ta toyole (sventa chichʼ chanel)  |  Marso ta 2018

Li yajtsʼaklomtak Kristoe toj tsots skʼoplal ti xichʼik voʼe

Li yajtsʼaklomtak Kristoe toj tsots skʼoplal ti xichʼik voʼe

«[Jaʼ] jun senyail li ichʼvoʼ ti jaʼ yakal chakolik-o [avie]» (1 PED. 3:21).

KʼEJOJ: sn 7, sjj 41

1, 2. 1) ¿Kʼu yelan chaʼi sbaik junantik totil meʼiletik kʼalal ch-albat yuʼun yalab xnichʼnabik ti tskʼan chichʼik voʼe? 2) ¿Kʼu yuʼun chichʼik jakʼbel mi yakʼoj xa sbaik ta stojolal Jeova li buchʼutik chichʼik xa voʼe? (Kʼelo li lokʼol ta slikebale).

NOPBO avaʼi skʼoplal li kʼusi yakal chkʼot ta pasele. Jun chex tseb ti María sbie lik vaʼiuk xchiʼuk li yan xchiʼiltak ti jutuk xa skʼan xichʼik voʼ eke. Te ta spat jutuke, te chotol li stot smeʼe xchiʼuk chkʼelat talel kʼu yelan lek tsots tstakʼ li chib sjakʼobil chal tal li jelubtasej mantale. Ta mukʼta jal jutuke, bat yichʼ voʼ li Mariae.

2 Li stot smeʼe solel xmuyubajik tajek ti ta sjunul yoʼonton laj yakʼ sba ta stojolal Jeova li stsebike xchiʼuk ti laj xa yichʼ voʼe. Pe leʼ olon tale, li meʼile tsvul toʼox jutuk yoʼonton. Yuʼun xi tsnopilane: «¿Mi mu toj ololuk to van sventa xichʼ voʼ li jtsebe? ¿Mi xaʼibe smelolal ta melel ti tsots tajek skʼoplal li kʼusi tskʼan tspase? ¿Mi jaʼ van lek ti xkalbe ti akʼo to smala jutuke?». Li kʼusi la snop li smeʼ Mariae ep buchʼutik jech tsnopik kʼalal ch-albat yuʼun yalab xnichʼnabik ti tskʼan chichʼik voʼe (Ecl. 5:5). Stalel onoʼox ti jech tsvul yoʼontonike, yuʼun kʼalal chkakʼ jkuxlejaltik ta stojolal Jeova xchiʼuk kʼalal  chkichʼtik voʼe, jaʼ li kʼusi toj tsots skʼoplal ta jpas ta jkuxlejaltik li yajtsʼaklomutik Kristoe (kʼelo li rekuadro « ¿Mi avakʼojbe xa akuxlejal li Jeovae?»).

3, 4. 1) ¿Kʼusi skʼelobil la stunes Pedro sventa xalbe smelolal ti tsots skʼoplal ti xkichʼtik voʼe? 2) ¿Kʼuxi xkoʼolaj li arka la smeltsan Noe xchiʼuk li ichʼvoʼe?

3 Li jtakbol Pedroe laj yalbe skʼoplal li arka la spas Noee. Xi laj yale: «Li kʼusi kʼot ta pasele jaʼ noʼox jun senyail li ichʼvoʼ ti jaʼ yakal chakolik-o [avie]» (kʼelo 1 Pedro 3:20, 21). Kʼalal la spas arka li Noee, jaʼ te laj yakʼbe yil skotol krixchanoetik ti yakʼoj xkuxlejal ta spasbel yabtel li Diose. Oy lek xchʼunel yoʼonton xchiʼuk la spas skotol li kʼusi albat yuʼun Jeovae. Ta sventa ti jech la spase, kuxul komik xchiʼuk yutsʼ yalal kʼalal tal li Nojelal ta voʼe. Pe, ¿kʼusi la skʼan laj yakʼ ta chanel Pedro kʼalal laj yalbe skʼoplal li arkae?

4 Veno, kʼalal laj yil krixchanoetik li mukʼta arkae, te laj yakʼik venta ti oy xchʼunel yoʼonton li Noee. Jaʼ jech xkaltik li avi eke, kʼalal chilik yantik ti oy buchʼu chichʼ voʼe, te chakʼik venta ti jaʼ jun yajtsʼaklom Kristoe, ti yakʼoj xa sba ta stojolal Jeovae xchiʼuk ti xchʼunoj lek ti chaʼkuxi li Kristoe. Jech xtok, li yajtsʼaklomtak Kristo ti yakʼoj xa xkuxlejalik ta stojolal li Jeovae jech tspasik kʼuchaʼal li Noee, chchʼunbeik li smantale xchiʼuk tspasik li kʼusi akʼbil sbainike. Pe maʼuk noʼox, yuʼun jech kʼuchaʼal koltaat yuʼun Jeova li Noee, jaʼ jech chichʼik koltael ek kʼalal mi tal li slajeb chopol balumil liʼe (Mar. 13:10; Apok. 7:9, 10). Kʼuchaʼal chkakʼtik ventae, toj tsots skʼoplal ti xkakʼ jbatik ta stojolal li Jeovae xchiʼuk ti xkichʼtik voʼe. Yuʼun li buchʼu yolbaj mu skʼan xichʼ voʼe chib me skʼoplal ti sta li kuxlejal sbatel osile.

5. ¿Kʼusi ta jchantik batel li ta xchanobil liʼe?

5 Kʼuchaʼal chkakʼtik ventae, tsots tajek skʼoplal li ichʼvoʼe. Jaʼ yuʼun, lek ti jchanbetik batel skʼoplal li sjakʼobiltak liʼe: Baʼyel, ¿kʼusi  chal Vivlia ta sventa li ichʼvoʼe? Xchibal, ¿kʼusitik skʼan jpastik baʼyel sventa xkichʼtik voʼe? Xchiʼuk yoxibal, kʼalal ta jchanubtastik ta Vivlia li kalab jnichʼnabtik o yan krixchanoe, ¿kʼu yuʼun skʼan teuk-o ta joltik ti tsots skʼoplal li ichʼvoʼe?

¿KʼUSI CHAL VIVLIA TA SVENTA LI ICHʼVOʼE?

6, 7. 1) ¿Kʼu yuʼun chichʼik voʼ li krixchanoetik ta skʼakʼalil Juane? 2) Li Juane, ¿buchʼu laj yakʼbe yichʼ voʼ ti jelel kʼuchaʼal li yantike, xchiʼuk kʼu yuʼun ti laj yichʼ voʼe?

6 ¿Bakʼin lik yalbe skʼoplal Vivlia ti oy ichʼvoʼe? Jaʼo kʼalal lik yalbe skʼoplal li Juan J-akʼ-ichʼvoʼe (Mat. 3:1-6). Pe, ¿kʼu yuʼun chichʼik voʼ li krixchanoetik ta skʼakʼalil Juane? Jaʼ sventa chakʼik ta ilel ti tsutes yoʼontonik ta skoj ti muʼyuk xchʼunik li Smantal Moisese. Ta tsʼakale, li Juane la sta jun smoton, yuʼun laj yakʼbe yichʼ voʼ li Xnichʼon Diose, jaʼ xkaltik, li Jesuse (Mat. 3:13-17). ¿Kʼu yuʼun ti laj yichʼ voʼe? Maʼuk ta skoj ti skʼan sutes yoʼontone, yuʼun chʼabal jsetʼuk smul li stuke (1 Ped. 2:22). Jaʼ sventa xakʼ ta ilel ti chapal xa sventa spasbe li kʼusi tskʼan yoʼonton Dios ta sjunul xkuxlejale (Evr. 10:7).

7 Ti kʼu sjalil la xchol mantal li Jesuse, laj yakʼbeik yichʼ voʼ yan krixchanoetik ek li yajchankʼoptake (Juan 3:22; 4:1, 2). ¿Kʼu yuʼun laj yichʼik voʼ li krixchanoetik taje? Jaʼ sventa chakʼik ta ilel ek ti sutesoj xa yoʼontonik ta skoj ti muʼyuk la xchʼunik li Smantal Moisese. Pe kʼalal cham xchiʼuk kʼalal chaʼkuxi li Jesuse, jel smelolal ti kʼu yuʼun chichʼik voʼ li buchʼutik tskʼan chkʼotik ta yajtsʼaklom Kristoe.

8. 1) ¿Kʼusi mantalil laj yal Jesus kʼalal chaʼkuxiem xa oxe? 2) ¿Kʼu yuʼun skʼan xichʼik voʼ li yajtsʼaklomtak Kristoe?

8 Kʼalal chaʼkuxi ta sjabilal 33 li Jesuse, laj yakʼ sba ta ilel ta stojolal mas ta voʼob sien krixchanoetik ti xuʼ van te tsakal skʼoplal ek li ololetike. Xuʼ van jaʼo te laj yal li mantal liʼe: «Batanik, bat pasik ta jchankʼop li krixchanoetik ta skotol jteklumetike, akʼbeik yichʼ voʼ ta sbi Totil, Nichʼonil xchiʼuk chʼul espiritu, chanubtasik ta xchʼunel skotol li kʼusitik laj kalboxuke» (Mat. 28:19, 20; 1 Kor. 15:6). Kʼuchaʼal chkakʼtik ventae, yileluke ta sienal xa noʼox laj yaʼiik li mantal ti skʼan xbat spasik ta yajchankʼop Jesus li krixchanoetike. Pe maʼuk noʼox laj yal taje, yuʼun baʼyel xa onoʼox laj yal ti skʼan xichʼ voʼ li buchʼutik tskʼan tstsʼaklie xchiʼuk li buchʼutik tskʼan chkuch «li kʼatlom teʼ» yuʼune (Mat. 11:29, 30). Li Jeovae jaʼ tstunes Jesus sventa xkʼot ta pasel li kʼusi tskʼan yoʼontone. Jaʼ yuʼun, li buchʼutik tskʼan tslekubtasbe yoʼonton li Diose skʼan xchʼunik ti tsots yichʼoj yabtel li Jesuse. Vaʼun xuʼ xichʼik voʼ xchiʼuk ta sjunul yoʼonton chchʼam li Diose. Li Vivliae chal ti buchʼu pasik ta yajtsʼaklomtak Kristo li ta baʼyel sigloe laj yaʼibeik lek smelolal ti kʼu yuʼun skʼan xichʼik voʼe, vaʼun ta anil noʼox jech la spasik (Ech. 2:41; 9:18; 16:14, 15, 32, 33).

MU JALUK XAMALA

9, 10. ¿Kʼusi chakʼ jchantik ti muʼyuk bu jal la smalaik sventa xichʼik voʼ li j-etiopia vinik xchiʼuk li jtakbol Pabloe?

9 (Kʼelo Echos 8:35, 36). Jkʼelbetik skʼoplal jun vinik ti likem ta Etiopiae xchiʼuk ti och ta srelijion judaetike. Ay tal ta Jerusalen sventa chichʼ ta mukʼ li Diose. Pe kʼalal jaʼo sut batel ta snae, li Felipe ti jaʼ yajtakbol li Jesuse albat yuʼun jun anjel ti akʼo nopajuk batel ta stojolal li j-etiopia vinik sventa xalbe skʼoplal «li lekil aʼyejetik ta sventa [li] Jesuse». ¿Kʼusi la spas kʼalal laj yaʼibe smelolal ti skʼan xakʼ xchʼunel yoʼonton ta stojolal li Kajvaltik Jesuse? Ta skoj ti jpʼel ta yoʼonton tskʼan tspas li kʼusi tskʼan Jeovae, xi laj yale: «¡Kʼelo avil! Oy voʼ leʼe; ¿kʼusi tsmakun sventa [mu xkichʼ] voʼ?».

10 Jkʼeltik xtok li kʼusi la spas jun vinik ti Saulo sbie. Li stuke jaʼ juda vinik xchiʼuk li krixchanoetik ta slumale yakʼoj sbaik ta stojolal li Diose, akʼo mi jech, mu xa ox lekuk xil sbaik xchiʼuk li Jeovae. Pe li Sauloe jpʼel ta  yoʼonton muʼyuk chikta li kʼusi nopem xaʼiik spasele. Jaʼ yuʼun, chopol tajek laj yil li buchʼutik lik stsʼakliik li Kristoe, tsots lik skontrain xchiʼuk lik snutsanan. Kʼalal jaʼo jech yakal tspase, oy kʼusi tsots albat tal yuʼun Jesus te to ta vinajel. La xchʼun li kʼusi albate xchiʼuk koltaat yuʼun jun yajtsʼaklom Kristo ti Ananias sbie, vaʼun, «vaʼi xchiʼuk laj yichʼ voʼ» (Ech. 9:17, 18; Gal. 1:14). Li juda vinik taje laj yichʼ ojtikinel kʼuchaʼal jtakbol Pablo ta tsʼakal. Kʼuchaʼal chkakʼtik ventae, ta anil noʼox laj yichʼ voʼ kʼalal laj yaʼibe smelolal ti tsots yabtel yichʼoj li Jesuse (kʼelo Echos 22:12-16).

11. 1) ¿Kʼusi chtijbat yoʼontonik sventa xichʼik voʼ li buchʼutik ta jchanubtastik ta Vivliae? 2) ¿Kʼu yelan chkaʼi jbatik kʼalal jech tspasike?

11 Jaʼ jech tspasik avi ek li buchʼutik ta jchanubtastik ta Vivliae. Ta bikʼit ta mukʼ tskʼan xa tajek chakʼ sbaik ta stojolal li Jeovae xchiʼuk ti xichʼik voʼe, yuʼun oy xchʼunel yoʼontonik xchiʼuk ep tajek sbalil chilik li kʼusitik chchanike. Jaʼ yuʼun, persa onoʼox ch-echʼ jun diskurso sventa ichʼvoʼ li ta jujukoj asambleae. Kʼalal chkiltik ti ta jlikel xa skʼan xichʼ voʼ li buchʼu chkakʼbetik estudioe, mu xa kʼusi jech chkaʼitik, solel xijmuyubaj tajek. Jaʼ jech chaʼiik ek li totil meʼiletik kʼalal chichʼ voʼ li yalab xnichʼnabike. Li ta septiembre ta 2016 kʼalal ta agosto ta 2017 laj yichʼik voʼ mas ta 284 mil; jech laj yakʼik ta ilel ti yakʼoj xa sbaik ta stojolal li Jeovae (Ech. 13:48). Jamal xvinaj ti laj yaʼibeik smelolal ti skʼan xichʼik voʼ mi tskʼan chkʼotik ta yajtsʼaklom Kristoe. Pe, ¿kʼusitik xa onoʼox la spasik talel sventa xuʼ xichʼik voʼe?

12. ¿Kʼusitik skʼan spas baʼyuk sventa xuʼ xichʼ voʼ li jun krixchanoe?

12 ¿Kʼusitik skʼan spas baʼyuk sventa xuʼ xichʼ voʼ li jun krixchanoe? Baʼyele, skʼan xchan li kʼusitik melel ta sventa Diose, ti xojtikin li kʼusi oy ta yoʼonton tspas ta sventa li krixchanoetike xchiʼuk li kʼusi xa spasoj sventa spojutik lokʼel li ta lajelale (1 Tim. 2:3-6). Kʼalal xojtikin xa taje, mas tstsatsub xchʼunel yoʼonton, vaʼun jaʼ chtijbat yoʼonton sventa jaʼuk xa noʼox xchʼun li tukʼil beiltaseletik yuʼun Jeovae (Ech. 3:19). Li Diose muʼyuk me chchʼam li buchʼutik chakʼ xa xkuxlejalik yilele, pe ti oy kʼusi chopol tspasik ta mukule (1 Kor. 6:9, 10). ¿Mi taʼlo noʼox van ti xchʼun li smantaltak Dios ta sventa ti kʼu yelan skʼan jpas jtalelaltike? Moʼoj, yuʼun skʼan xbat xtok li ta tsobajeletike, skʼan xchol mantal xchiʼuk ti xchanubtasvane. Yuʼun jech laj yalbe komel mantal yajtsʼaklomtak li Jesuse (Ech. 1:8). Mi laj xa ox spas skotol taje, xuʼ xa me xalbe Jeova ta jun orasion ti chakʼbe li xkuxlejale; vaʼun, xuʼ me xichʼ voʼ sventa chakʼbe yil yantik ti jaʼ xa yuʼun Jeova li xkuxlejale.

JKOLTATIK SVENTA XICHʼIK VOʼ

Kʼalal chakolta li buchʼu chachanubtas ta Vivliae, teuk-o me ta ajol ti tsots skʼoplal skʼan xichʼ voʼe xchiʼuk sabo lek yorail sventa xavulesbe ta sjol. (Kʼelo parafo 13).

13. ¿Kʼu yuʼun skʼan teuk-o ta joltik ti tsots skʼoplal skʼan xichʼik voʼ li buchʼutik ta jchanubtastike?

13 Li voʼotik eke, ¿kʼusi skʼan jpastik kʼalal skʼan to xichʼik voʼ li buchʼutik ta jchanubtastik ta Vivliae? Kʼuchaʼal laj xa kaltike, oy kʼusitik skʼan spasik baʼyel sventa xuʼ xichʼik voʼe. Jaʼ yuʼun, kʼalal ta jkoltatik li buchʼutik ta jchanubtastik ta Vivlia ti te tsakal skʼoplal ek li kalab jnichʼnabtike, skʼan me teuk-o ta joltik ti skʼan xichʼik voʼ sventa xkʼotik ta yajtsʼaklom Kristoe. Yuʼun mi te ta joltike, chkakʼtik persa sabel lek yorail sventa jvulesbetik ta sjolik ti tsots skʼoplal ti xakʼ sbaik ta stojolal li Jeovae xchiʼuk ti xichʼik voʼe. Ta jkʼantik ti xakʼbeik yipal li mantale xchiʼuk ti spasik li kʼusi tsots skʼoplal taje.

14. ¿Kʼu yuʼun muʼyuk chijsujvan sventa xichʼik voʼ li yantike?

14 ¿Mi jaʼ skʼan xal ti skʼan jsujtik sventa xichʼ voʼ li buchʼutik ta jchanubtastik ta Vivliae? Moʼoj, akʼo mi jaʼ kalab jnichʼnabtik. Chʼabal buchʼu xuʼ sujvan, yuʼun muʼyuk tsujvan li Jeova eke (1 Juan 4:8). Li kʼusi lek xuʼ jpastik kʼalal ta jchanubtastike, jaʼ ti  jvulesbetik ta sjol ti tsots skʼoplal ti xamigoin sbaik xchiʼuk li Jeovae. Li srasonal mas tsots skʼoplal ti kʼu chaʼal chichʼ voʼe jaʼuk me ta skoj ti skʼanoj ta melel li kʼusi chchane xchiʼuk ti tskʼan tspas li kʼusi oy ta sba li jun yajtsʼaklom Kristoe (2 Kor. 5:14, 15).

15, 16. 1) ¿Jayib sjabilal skʼan sta sventa xuʼ xichʼ voʼ li jun krixchanoe? Albo smelolal. 2) ¿Mi persa to van chichʼ voʼ yan velta li buchʼutik yichʼojik xa voʼ ta yan relijione?

15 ¿Jayib sjabilal skʼan sta sventa xuʼ xichʼ voʼ li jun krixchanoe? Ta melele muʼyuk chal li Vivliae. Yuʼun jelajtik tajek ti kʼu yelan chijchʼi talel ta mantale. Ep buchʼutik ta sbikʼtal noʼox chichʼik voʼ xchiʼuk lek tukʼ-o chakʼ sbaik ta stojolal Jeova ta sjunul xkuxlejalik. Pe ta skoj ti tsʼakal to chlik yaʼiik mantal li yantike, jaʼ to chaʼibeik smelolal ti kʼu yuʼun skʼan xichʼik voʼe. Jech oxal, jaʼ to chichʼik voʼ kʼalal oy xa sjabilalike, junantike jaʼo kʼalal mas xa ox ta sien sjabilalike.

16 ¿Pe mi persa to van chichʼ voʼ yan velta li buchʼutik yichʼojik xa voʼ ta yan relijione? Persa, yuʼun li Jeovae jaʼ noʼox chchʼam li buchʼutik xojtikinik ta melel li kʼusi tskʼane. Jaʼ jech kʼot ta stojolal jun ants ti jutuk xa mu 80 sjabilale. Lik chanubtasatuk ta Vivlia yuʼun jun ermana. Lek laj yaʼi li kʼusi la xchane. Ta tsʼakal jutuke, xi laj yalbe li ermanae: «Kʼelavil, li voʼone ep xa butik kichʼoj voʼ ta yan relijion, jaʼ yuʼun, ¿mi persa to tajek xanaʼ ti xkichʼ voʼ yan veltae?». Jmoj lik skʼelik junchibuk teksto xchiʼuk li ermanae xchiʼuk lek laj yaʼibe smelolal li kʼusi la xchanik ta sventa li ichʼvoʼe, jaʼ yuʼun ta tsʼakal jutuke, ta sjunul yoʼonton laj yichʼ voʼ (kʼelo Echos 19:3-5).

17. ¿Kʼusi xuʼ snopbeik skʼoplal kʼalal jaʼ xa yorail chichʼik voʼe?

17 Kʼalal jaʼ xa skʼakʼalil chichʼ voʼ li jun ermanoe, solel xkuxet tajek yoʼonton, yuʼun jaʼ jun kʼakʼal ti tsots tajek skʼoplale. Li vaʼ orae, lek me ti snopbe skʼoplal skotol li kʼusitik skʼan spas sventa xkʼot ta pasel yuʼun li kʼusi laj yalbe Jeova kʼalal laj yakʼ sba ta stojolale. Yuʼun li yajtsʼaklomtak Jesuse «mu xa ta sventauk stuk» chkuxiik, moʼoj, jaʼ xa chkuxiik «ta stojolal li buchʼu cham ta stojolalike xchiʼuk ti laj yichʼ chaʼkuxesele» (2 Kor. 5:15; Mat. 16:24).

18. ¿Kʼusitik ta jkʼelbetik skʼoplal li ta yan xchanobile?

18 ¿Kʼusitik la jchantik li ta xchanobil liʼe? Laj kiltik ti tsots tajek skʼoplal kʼalal ta jnop chijkʼot ta melel yajtsʼaklom Kristoe. Jaʼ yuʼun, li smeʼ María laj kaltik ta slikebe tsvul jutuk yoʼonton xchiʼuk oy kʼusitik lik snopbe skʼoplal. Mi oy avalab anichʼnab eke, xuʼ van xi chanope: «¿Mi chapal xa van sventa xichʼ voʼ li jkerem o jtsebe? ¿Mi oy xa kʼuuk yepal xchanoj li kʼusitik melel sventa xchʼamat yuʼun li Jeovae? ¿O mi jaʼ van lek ti baʼyel xakʼ ta yoʼonton li chanune xchiʼuk ti saʼ lek yabtele? ¿A ti mi oy kʼusi chopol spas kʼalal yichʼoj xa ox voʼ une?». Li sjakʼobiltak taje jaʼ ta jkʼelbetik skʼoplal li ta yan xchanobile. Ta jkʼeltik xtok kʼu yelan skʼan xilik ichʼvoʼ li totil meʼiletike.