Kʼelo li kʼusi yichʼoje

Batan ta saʼobil

¿Kʼusi jtosukal kʼanelal ti chakʼbutik tajek muyubajele?

¿Kʼusi jtosukal kʼanelal ti chakʼbutik tajek muyubajele?

«Xcuxet noʼox yoʼntonic li jun [...] lum ti jaʼ Dios yuʼunic li Mucʼul Diose» (SAL. 144:15).

KʼEJOJ: sjj 111; sn 25

1. ¿Kʼu yuʼun chkaltik ti stuk xa noʼox jech li kʼakʼal kuxulutik avie?

STUK xa noʼox jech li kʼakʼal kuxulutik avie, yuʼun li Jeovae yakal tstsob epal krixchanoetik ti «likemik tal ta skotol lumetik, nitilulaletik, jteklumetik [xchiʼuk] ta jeltos kʼopetik» jech kʼuchaʼal yaloj xa onoʼox li Vivliae. Li krixchanoetik taje xmuyubajik noʼox ti jaʼik «jun mucʼta lum» ti oyik mas ta vaxakib miyone, xchiʼuk ti ‹tspasik chʼul abtelal ta kʼakʼal-akʼobal li ta stemplo› Jeovae (Apok. 7:9, 15; Is. 60:22). Muʼyuk bu jech xkiltik-o ti ep tajek krixchanoetik tskʼanik li Diose xchiʼuk ti tskʼan li xchiʼiltakike.

2. Li krixchanoetik ti nom oyik ta stojolal Diose, ¿kʼu yelan li kʼanelal chakʼik ta ilele? (Kʼelo li lokʼol ta slikebale).

2 Akʼo mi jech, li Vivliae yaloj xa onoʼox ti jelel tajek kʼu yelan chakʼ ta ilel stalelal li krixchanoetik ti nom oyik ta stojolal Diose, yuʼun maʼuk melel kʼanelal ti chakʼik ta ilele. Li jtakbol Pabloe laj yal ti chlik ‹skʼan sba stuk li krixchanoetik› «ta slajebal xa kʼakʼale», chbat «ta yoʼontonik takʼin» xchiʼuk «jaʼ skʼanojik li kʼusi kʼupil sba chaʼi stukike jaʼ muʼyuk skʼanojik li Diose» (2 Tim. 3:1-4). Li jecheʼ kʼanelale mu xkoʼolaj xchiʼuk li kʼanelal kuʼuntik ta stojolal Diose, yuʼun li buchʼu tskʼan sba stuke muʼyuk tsta li muyubajele akʼo mi oy ta yoʼonton stael. Li kʼusi noʼox chkʼot ta pasel yuʼune jaʼ ti chlik saʼik li kʼusi lek chaʼi stuk  li krixchanoetike xchiʼuk chil-o tajek svokol yuʼunik li yantike.

3. ¿Kʼusi ta jkʼelbetik skʼoplal li ta xchanobil liʼe, xchiʼuk kʼu yuʼun?

3 Li Pabloe snaʼoj xa onoʼox ti jutuk mu skotoluk li krixchanoetike jaʼ mas chakʼik ta ilel li jecheʼ kʼanelale xchiʼuk ti xibal sba ti jaʼ jech jchantik li yajtunelutik Diose. Jech oxal, tspʼijubtasutik sventa mu jchiʼintik li buchʼutik jech stalelalike (2 Tim. 3:5). Mu onoʼox kʼusi stakʼ jpastik sventa jchʼak jbatik ta j-echʼel ta stojolalik. Jaʼ yuʼun, ¿kʼusi xuʼ jpastik sventa mu jchanbetik stalelal li krixchanoetik ta jpat jxokontike xchiʼuk ti jaʼuk xkakʼbetik yipal spasel li kʼusi lek chil li Jeova ti jaʼ jun jkʼanvanej Diose? Jkʼelbetik batel skʼoplal kʼusi sjelbenal li kʼanelal ti oy ta yoʼonton Jeova ti akʼo jchʼiestike xchiʼuk li kʼanelal chalbe skʼoplal ta 2 Timoteo 3:2 kʼalal ta 4. Taje, jaʼ tskoltautik sventa jkʼel jbatik ta jujuntal xchiʼuk ti kʼuxi xuʼ jchʼiestik li kʼanelal ti jaʼ chakʼ xkuxetel koʼontontike.

¿MI JAʼ JKʼANOJTIK LI DIOSE O MI JAʼ NOʼOX JKʼANOJ JBA JTUKTIK?

4. ¿Kʼu yuʼun muʼyuk chopol ti ta jkʼan jba jtuktike?

4 Li echʼ tal parafoe laj kiltik ti xi la stsʼiba li Pabloe: «Tskʼan sba stuk li krixchanoetike». Pe, ¿mi jaʼ skʼan xal ti chopol kʼalal ta jkʼan jba jtuktike? Moʼoj. Yuʼun li Jeovae jaʼ jech la spasutik, stalel ti jech chkaʼi jbatike xchiʼuk oy sbalil mi ta jkʼan jba jtuktike. Xi laj yal li Jesus eke: «‹Skʼan me xakʼan achiʼil jech kʼuchaʼal akʼanoj aba atuke›» (Mar. 12:31). ¿Kʼu yuʼun jech chkaltik taje? Yuʼun mi muʼyuk ta jkʼan jba jtuktike, mu me xuʼ jkʼantik li jchiʼiltaktike. Xi to chal xtok li Vivliae: «Jaʼuk me jech akʼo skʼan yajnilik li malaliletik jech kʼuchaʼal skʼanoj sbekʼtal stukike. Skʼanoj sba stuk li buchʼu skʼanoj yajnile, yuʼun muʼyuk buchʼu spʼajoj li sbekʼtal stuke, ti kʼusie tsmakʼlin xchiʼuk chkʼuxubin» (Efes. 5:28, 29). Kʼuchaʼal chkiltike, muʼyuk chopol ti ta jkʼan jba jtuktike.

5. ¿Kʼu yelan stalelik li buchʼutik toj echʼ noʼox skʼanoj sba stukike?

5 Pe li jtos kʼanelal chal ta 2 Timoteo 3:2 maʼuk toj lek, yuʼun jaʼ jun jecheʼ kʼanelal ti muʼyuk lek kʼusi tstij koʼontontik spasele. Li buchʼutik toj echʼem xa noʼox skʼanoj sbaike mukʼ tajek skʼoplal chaʼi sbaik (kʼelo Romanos 12:3). Xi chal jlik livro ti chalbe skʼoplal Vivliae: «Li buchʼutik tskʼan sba stukike jaʼ jechik kʼuchaʼal li erizoe, ti jaʼ jkot kʼox chon ti xkoʼolajtik kʼuchaʼal li chʼix uche, ti tsvol sba stuke xchiʼuk ti jaʼ tslutsʼ ochel li yuni kʼunil tsatsale, vaʼun jaʼ chchʼixan li spate». ¿Kʼu yuʼun jech chal taje? Yuʼun li krixchanoetike muʼyuk ta yoʼontonik li yantike xchiʼuk kʼalal oy kʼusi chopol chbat ta pasel yuʼunike, jaʼ chakʼbeik smulin li yantike xchiʼuk muʼyuk noʼox smul chaʼi sba li stukike. Jech xtok, mi jsetʼuk xmuyubaj ta xkuxlejalik li buchʼutik jech stalelike.

6. ¿Kʼusi sbalil tstaik li buchʼutik jaʼ tskʼanik li Diose?

6 Li buchʼutik chchanbeik skʼoplal Vivliae chalik ti oy la srasonal ti kʼu yuʼun baʼyel laj yal Pablo ti tskʼan sba stuk li krixchanoetik ta slajebal xa kʼakʼale. Yuʼun kʼalal tskʼan sba stukike jaʼ la slikeb li chopol talelaletik laj yal Pabloe. Pe jelel tajek stalelal li buchʼutik skʼanojik Diose. Li kʼanelal yuʼun Dios chal Vivliae jaʼ «kuxetel oʼontonal, jun oʼontonal, stsʼikel, yutsil oʼontonal, slekil oʼontonal, xchʼunel oʼontonal, manxoal xchiʼuk pajesejbail» (Gal. 5:22, 23). Xi laj yal jun jtsʼibajom yuʼun salmoe: «Xcuxet noʼox yoʼntonic li jun [...] lum ti jaʼ Dios yuʼunic li Mucʼul Diose» (Sal. 144:15). Li voʼotike jaʼ jech jtalelaltik kʼuchaʼal li Jeova ti snaʼ xmuyubaje. Jech xtok, xijmuyubaj ti jaʼ yajtunelutik Jeovae yuʼun chlokʼ ta koʼonton jtuktik skoltael li yantike. Jelelik tajek li buchʼutik jaʼ noʼox skʼanoj sba stukike yuʼun jaʼ noʼox tsmalaik ti oyuk kʼusi x-akʼbatike (Ech. 20:35).

¿Kʼusi tskoltautik sventa mu jaʼuk noʼox jkʼan jba jtuktik? (Kʼelo parafo 7).

7. ¿Kʼusitik xuʼ jakʼbe jbatik sventa jnaʼtik mi jaʼ jkʼanojtik li Diose?

7 ¿Kʼusi stakʼ jpastik yoʼ xkakʼtik venta mi jaʼ mas jkʼanoj jba jtuktik ti jaʼ xa jutuk li Diose? Jaʼuk jnopbetik skʼoplal li kʼusi chal Filipenses 2:3 xchiʼuk 4. Xi chale: «Mu me kʼusi xapasik ti jaʼ tstij avoʼontonik li kontrainejbaile xchiʼuk ti jaʼ noʼox tsots akʼoplal chavaʼi aba atukike, jaʼ lek bikʼit xavakʼ abaik, jaʼ masuk tsots skʼoplal xavilik li  yantike». Xi to chal batele: «Oyuk-o me ta avoʼontonik li yantike, maʼuk noʼox me xanop akʼoplal atukik». Xiuk jakʼbe jbatike: «¿Mi chkakʼ ta jkuxlejal li beiltaseletik liʼe? ¿Mi oy tajek ta koʼonton spasbel yabtel li Jeovae? ¿Mi ta jkʼel kʼuxi xuʼ jkolta li ermanoetik ta tsobobbail xchiʼuk li ta cholmantale?». Maʼuk ti kʼun xa tajek chkaʼitik skoltael li yantike. Yuʼun xuʼ van skʼan xkakʼbetik yipal skoltaelik xchiʼuk ti persa skʼan xkiktatik komel li kʼusi lek tajek chkaʼitik spasele. Pe mi jech la jpastike lek me chilutik li Ajvalil ta vinajelbalumile, taje jaʼ chakʼ ti xkuxet noʼox koʼontontike.

8. Ta skoj ti skʼanojik Jeova li junantik yajtsʼaklomtak Kristoe, ¿kʼusi chtijbat yoʼontonik spasel?

8 Junantik yajtsʼaklomtak Kristoe chlokʼ ta yoʼontonik stenel komel yabtelik ti xuʼ van ep ox tspasik kanale, taje jaʼ ta skoj ti skʼanojik li Diose xchiʼuk ti oy ta yoʼonton chtunik mas ta stojolale. Kalbetik skʼoplal jun ermana ta Estados Unidos ti Ericka sbie xchiʼuk ti jaʼ doktorae, pe jaʼ noʼoxe muʼyuk xbat ta yoʼonton li yabtele. Yuʼun tunik ta prekursor regular xchiʼuk smalal ta yantik lumetik. Xi chal kaʼitike: «Toj ep kamigotakutik, yuʼun echʼemunkutik xa ta jeltos lumetik ti yan-o skʼopike. Li kʼusitik jtaojkutike jaʼ chakʼ ti jkʼupinkutik lek li jkuxlejalkutike. Chipoxtavan-o, pe li kʼusi mas chakʼbun xkuxetel koʼontone jaʼ kʼalal ta jchʼakbe yorail xpoxtael ta mantal li krixchanoetike xchiʼuk kʼalal ta jkolta li ermanoetik ta tsobobbaile».

¿MI JAʼ TA JSAʼTIK LI KʼULEJAL TA VINAJELE O MI JAʼ LI KʼULEJAL TA BALUMILE?

9. ¿Kʼu yuʼun muʼyuk xmuyubajik li buchʼutik tskʼanik tajek takʼine?

9 Li jtakbol Pabloe laj yal ti jaʼ noʼox chbat «ta yoʼontonik takʼin» li krixchanoetike. Leʼ xa talel jayibuk jabile oy jun prekursor ta Irlanda ti loʼilaj xchiʼuk jun vinik ta sventa li Diose. Pe li vinik taje la slokʼes tal li yav stakʼine, la stsak lokʼel jlik chaʼlik stakʼin xchiʼuk xi laj yale: «¡Voʼone jaʼ jdios liʼe!». Ta yepal li krixchanoetik avie jaʼ jech tsnopik kʼuchaʼal li vinik taje, yuʼun batem tajek ta yoʼontonik li takʼine xchiʼuk li kʼusitik xuʼ smanik-oe akʼo mi muʼyuk chlokʼ ta yeik ti skʼanojik li takʼine. Xi chpʼijubtasvan li Vivliae: «Li bochʼo tscʼupin ep taqʼuine mu spas ta jun yoʼnton o; li bochʼo tscʼan ep cʼusi oy yuʼune muc taʼlouc chaʼay ti cʼu yepal staoje» (Ecl. 5:10). Li buchʼutik tskʼanik tajek takʼine jech-o tskʼanik batel mas xchiʼuk jech-o xjotetik ta saʼel ta sjunul xkuxlejalik. Pe jaʼ noʼox ta saʼ ep «svokolik ti toj kʼuxe» (1 Tim. 6:9, 10).

10. ¿Kʼusi laj yal Agur ta sventa li saʼel kʼulejal xchiʼuk li povreale?

10 Chtun onoʼox kuʼuntik li takʼine, yuʼun balto xijkuxiutik batel (Ecl. 7:12). Pe, ¿mi xuʼ van xijmuyubaj kʼalal jutuk noʼox li kʼusi oy kuʼuntike? ¡Stakʼ xijmuyubaj! (Kʼelo Eclesiastés 5:12). Li Agur xnichʼon Jaquee xi la skʼanbe li Diose: «Mu me xavacʼ xipas ta meʼon, xchiʼuc ta jcʼulej; jaʼ noʼox acʼbun li jveʼel ti cʼu yepal chtun cuʼune». ¿Kʼu yuʼun laj yal ti mu skʼan spas ta povree? Laj yal stuk ti xuʼ van x-elkʼaj mi toj povree, vaʼun ti chopol xbat skʼoplal yuʼun li Diose. Pe, ¿kʼu yuʼun muʼyuk la skʼan ti x-akʼbat skʼulejale? Xi chal stuke: «Yuʼun me ep cʼusi oy cuʼune xuʼ chlic chʼayan ta coʼnton, xuʼ chlic cal ti mu xacotquinote» (Prov. 30:8, 9). Ta melel, xuʼ van oy xkojtikintik krixchanoetik ti spatoj tajek yoʼonton ta stakʼinike xchiʼuk ti jaʼ muʼyuk spatoj yoʼontonik ta stojolal li Diose.

11. ¿Kʼusi laj yal Jesus ta sventa li saʼel takʼine?

11 Mu stakʼ skʼanik Dios li buchʼutik tskʼanik tajek takʼine. Yuʼun xi laj yal li Jesuse: «Mu me xuʼ xtun ta chaʼvoʼ yajval li jun mosoe, yuʼun tskontrain li june, jaʼ tskʼan li yane; o mas nopol chakʼ sba ta stojolal li june, pe tspʼaj li yane. Jaʼ me jech ek, mu me xuʼ xatunik ta smoso Dios xchiʼuk ta smoso kʼulejal». Li Jesuse xi xa onoʼox baʼyel yaloje: «Mu xa xatsob akʼulejalik liʼ ta sba balumil ti bu chjochʼine xchiʼuk ti chkuxine, xchiʼuk ti bu ch-ochik ta persa li j-elekʼetik sventa chelkʼanik batele. Mas lek tsobo akʼulejalik ta vinajel ti bu mu x-och xchanul xchiʼuk ti mu xkuxine, xchiʼuk ti bu mu x-ochik ta persa li j-elekʼetik sventa chelkʼanik batele» (Mat. 6:19, 20, 24).

12. ¿Kʼu yuʼun xuʼ mas xijtun ta stojolal Jeova kʼalal jutuk noʼox li kʼusi x-ayan kuʼuntike? Albo junuk skʼelobil.

 12 Oy ep ermanoetike yiloj ta xkuxlejal stukik ti maʼuk noʼox ch-akʼbat smuyubajelik kʼalal jutuk noʼox kʼusi x-ayan yuʼunike, yuʼun mas xokol chaʼiik xtok sventa xtunik ta stojolal li Jeovae. Kalbetik skʼoplal jun ermano ta Estados Unidos ti Jack sbie, li ermanoe oy lek yabtel stuk xchiʼuk oy jpʼej sna ti lek mukʼe, akʼo mi jech, la xchon komel sventa xchiʼin ta prekursoral li yajnile. Xi chal li Jacke: «Vokol tajek kaʼikutik ti la jchonkutik li jnakutik xchiʼuk li kosilkutike, yuʼun kʼupilik tajek sba. Jamal chkal xtok ti oy jayibuk jabil ti laj yakʼbun tajek kʼux jolal li kabtele, yuʼun toj tsotsik bakʼintik. Pe li kajnil ti jaʼ prekursorae xmuyubaj noʼox tajek. Vaʼun xi chale: ‹Stuk xa noʼox jech li jpatron ta jkoltae›. Avie koʼol xa chi-abtejkutik ta stojolal Jeova xchiʼuk li kajnile, yuʼun prekursorun xa ek».

¿Kʼusi tskoltautik sventa mu jkʼantik tajek li takʼine? (Kʼelo parafo 13).

13. ¿Kʼuxi xuʼ xkakʼtik venta mi jaʼ batem ta koʼontontik li takʼine?

13 ¿Kʼuxi xuʼ xkakʼtik venta mi jaʼ batem ta koʼontontik li takʼine? Xuʼ xi jakʼbe jbatike: «¿Mi xvinaj ta jkuxlejal ti ta jtsak ta mukʼ li kʼusi chal Vivlia ta sventa li takʼine? ¿Mi mas tsots skʼoplal chkil li spasel kanal takʼine? ¿Mi jaʼ mas chkakʼ ta koʼonton saʼel li kʼusi chtun kuʼun ta jkuxlejal ti jaʼ muʼyuk ta koʼonton ti kʼu yelan xkil jba xchiʼuk Jeova xchiʼuk li yantike? ¿Mi jchʼunoj lek ti ta onoʼox xakʼbun Jeova li kʼusi jtunel kuʼune?». Mi la jpat koʼontontik ta stojolal li Jeovae xuʼ me jchʼuntik ta melel ti muʼyuk onoʼox bu tstenutik komele (Mat. 6:33).

¿MI JAʼ JKʼANOJTIK LI JEOVAE O MI JAʼ LI KʼUSI LEK CHKAʼITIKE?

14. ¿Kʼu yelan skʼan xkiltik li kʼusitik ta jkʼupintik spasele?

14 Jech kʼuchaʼal albil xa onoʼox tal skʼoplale, avie toj ep buchʼutik ti jaʼ noʼox «skʼanojik li kʼusi kʼupil sba chaʼi stukike». Laj xa kiltik ti maʼuk chopol mi oy noʼox smelolal chkiltik li saʼel takʼine xchiʼuk ti kʼu yelan ta jkʼan jba jtuktike. Jech oxal, maʼuk me chopol ek kʼalal oy noʼox smelolal ta jkʼupintik li kʼusi lek chkaʼitike. Oy xi tsnop junantik krixchanoetike: «Skʼan xkiktatik skotol li kʼusitik ta jkʼupintike». ¿Mi jaʼ van jech chchanubtasvan li Jeovae? Moʼoj. Yuʼun xi chalbutik li Vivliae: «Batan me, cuxetuc noʼox avoʼnton bat veʼan avot, bat uchʼan yaʼlel atsʼusub» (Ecl. 9:7).

15. ¿Kʼusi skʼan xal ti ‹jaʼ ta jkʼantik li kʼusi kʼupil sba chkaʼi jtuktike›?

15 ¿Buchʼutik chalbe skʼoplal li ta 2 Timoteo 3:4  ti jaʼ tspasik li kʼusi lek chaʼi stukike? Jaʼik li buchʼutik mi jsetʼuk tstsakik ta venta ta xkuxlejalik li Diose. Li ta versikuloe muʼyuk ta xal ti jaʼ tskʼanik li kʼusi kʼupil sba chaʼi stukike ti jaʼ xa jutuk tskʼanik li Diose, yuʼun mi jeche xuʼ van chakʼ ta aʼiel ti skʼanojik to jutuk li Diose. Yuʼun xi chal li versikuloe: «Jaʼ skʼanojik li kʼusi kʼupil sba chaʼi stukike jaʼ muʼyuk skʼanojik li Diose». Xi chal jun vinik ti lek chanunajeme: «Li versikulo liʼe maʼuk skʼan xal ti tskʼanik to uni jtsʼujuk li Diose, li kʼusi skʼan xale jaʼ ti mi jsetʼuk tskʼanike». Taje jaʼ me jun pʼijubtasel ta sventa li buchʼutik toj echʼ xa noʼox tskʼupinik li kʼusi lek chaʼi stukike. Li buchʼutik «skʼanojik li kʼusi kʼupil sba chaʼi stukike» xkoʼolajik xchiʼuk li buchʼutik chjochatik «batel yuʼun li kʼusitik tsvul-o yoʼontonike» (Luk. 8:14).

16, 17. ¿Kʼu yelan laj yil Jesus li kʼusitik xuʼ jkʼupintik spasele?

16 Li Jesuse ay ta jun «skʼinal nupunel» xchiʼuk ay ta «veʼel ta sna» jun vinik. Jaʼ noʼoxe ta smelolal la spas li kʼusitik xuʼ jkʼupintike (Juan 2:1-10; Luk. 5:29). Li ta «skʼinal nupunel» taje jaʼo laj svinoik, pe li Jesuse la spas jun skʼelobil juʼelal, yuʼun la spas ta vino li voʼe. Jun velta xtoke xi albat yuʼun li krixchanoetike: «¡Jaʼ jun vinik ti mu x-echʼ yoʼonton ta veʼel xchiʼuk ta yuchʼel vinoe!». Pe jamal laj yal ti muʼyuk lek mi jech ta jnoptike (Luk. 7:33-36).

17 Akʼo mi jech, muʼyuk xbat ta yoʼonton skʼupinel li kʼusi lek chaʼi li Jesuse. Jaʼ baʼyel laj yakʼ ta xkuxlejal li Jeovae xchiʼuk laj yakʼ persa skoltael li yantike. Oy ta yoʼonton ti stauk skolel epal krixchanoetike, jaʼ yuʼun la xchʼam ta sjunul yoʼonton sventa xichʼ milel ta jtel teʼ. Li Jesuse xi laj yalbe li buchʼutik tskʼan tstsʼakliate: «Xamuyubajik noʼox me kʼalal ta xchopol kʼoptaoxuk, kʼalal ta skontrainoxuk xchiʼuk kʼalal batsʼi jecheʼ toj chopol kʼusi chalik ta atojolalik ta jkoje. Kuxetuk noʼox me avoʼontonik xchiʼuk muyubajanik me tajek, yuʼun mukʼ li amoton chataik ta vinajele; yuʼun jaʼ jech laj yichʼik kontrainel ek li j-alkʼopetik ti baʼyel echʼ avuʼunike» (Mat. 5:11, 12).

¿Kʼusi tskoltautik sventa li kʼusitik tskʼan koʼontontike? (Kʼelo parafo 18).

18. ¿Kʼusitik xuʼ jakʼbe jbatik sventa xkiltik mi jaʼ batem ta koʼontontik li kʼusitik ta jkʼupintike?

18 ¿Kʼuxi xuʼ xkakʼtik venta mi jaʼ batem ta koʼontontik li kʼusitik ta jkʼupintik spasele? Xi jakʼbe jbatike: «¿Mi mas van tsots skʼoplal chkil li chʼayob oʼontonaletik ti jaʼ jutuk xa sbalil chkil li tsobajeletik xchiʼuk li cholmantale? ¿Mi chlokʼ ta koʼonton yiktael junantik li kʼusitik ta jkʼupin sventa xitun ta stojolal li Jeovae? ¿Mi ta jnopbe skʼoplal kʼu yelan chil Jeova li kʼusitik ta jchʼay-o koʼontone?». Kʼalal jkʼanojtik ta melel li Diose, muʼyuk chbat jsaʼtik li kʼusi mu skʼupine xchiʼuk ta jpʼajtik kʼalal xijnaʼet mi lek o mi chopol chil li Jeovae (kʼelo Mateo 22:37, 38).

¿KʼUXI XUʼ XIJMUYUBAJ?

19. ¿Buchʼutik ti muʼyuk tstaik-o li melel muyubajele?

19 Li sbalumil Satanase toj ep yakʼojbe tal svokol li krixchanoetike, yuʼun te xa van vakmil jabil ti jech spasoj tale. Ta skoj ti ta slajebal xa kʼakʼal kuxulutike noj ta krixchanoetik ti jaʼ noʼox tsnopbeik skʼoplal li takʼine, ti tskʼan sba stukike xchiʼuk ti jaʼ tspasik li kʼusi tskʼupinike. Jaʼ batem ta yoʼontonik li kʼusi tskʼanike xchiʼuk li kʼusi xuʼ sta ta xkuxlejalike. Pe muʼyuk bu tstaik-o li melel muyubajele. Yuʼun li Vivliae xi chale: «Xcuxet noʼox yoʼnton li bochʼo jaʼ jcoltavanej yuʼun li Dios yuʼun Jacobe, ti jaʼ spatoj o yoʼnton yuʼun li Mucʼul Dios yuʼune» (Sal. 146:5).

20. ¿Kʼuxi yakʼoj amuyubajel ti akʼanoj li Diose?

20 Li yajtunelutik Diose mas ta jkʼantik jujun kʼakʼal li Jeovae. Jaʼ yuʼun, li ta jujun jabil ch-echʼe epal krixchanoetik chojtikinik xchiʼuk chlik skʼanik ek. Taje, jaʼ sprevail ti yakal xa ch-ajvalilaj li Ajvalilal yuʼun Diose xchiʼuk ti jutuk xa skʼan xichʼ talel li bendisionetik ti muʼyuk bu jech kilojtik-oe. Pe ta skoj ti jaʼ ta jpastik li kʼusi tskʼan yoʼonton Jeovae xchiʼuk ti jnaʼojtik ti jaʼ yakalutik spasel li kʼusi lek chile, jaʼ me chakʼ jmuyubajeltik li avie xchiʼuk li ta mas jelavele. Li ta yan xchanobil chtale ta jkʼeltik kʼusi sjelbenal li talelaletik chakʼ li jecheʼ kʼanelale xchiʼuk li slekil talelal yajtuneltak Jeovae.