Li ta skʼakʼalil Vivliae, ¿mi persa skʼan oyuk sderecho ta ba nichʼonil li jun krixchano sventa xkʼot ta snitilul li Mesiase?

Oy jayibuk velta kakʼojtik ta aʼiel ti persa skʼan oyuk sderechoe. Yuʼun jaʼ jech chakʼ ta aʼiel yiluk li Evreos 12:16 ti bu chal ti muʼyuk la xkʼuxubin «kʼusitik chʼul» li Esaue xchiʼuk «ti ta jlech noʼox veʼlil laj [yakʼbe] ta moton [Jakob] li sderecho ta sventa ti jaʼ sba nichʼonile». Yaʼeluk li kʼusi laj yichʼ alel taje chakʼ ta aʼiel ti kʼalal laj yichʼ «sderecho ta sventa ti jaʼ sba [nichʼonil]» li Jakobe, jaʼ te la sta-o sderecho ek ti chkʼot ta snitilul li Mesiase (Mat. 1:2, 16; Luk. 3:23, 34).

Pe kʼalal ta jkʼelbetik skʼoplal junantik loʼiletik ta Vivliae chkakʼtik venta ti mu persauk jaʼ sba nichʼonil li jun krixchano sventa xkʼot ta snitilul li Mesiase. Jkʼelbetik junantik sprevail.

Li sba xnichʼon Jakobe (Israel) jaʼ Rubén, ti jaʼ yol xnichʼonik xchiʼuk li Leae. Ta mas tsʼakale ayan yol xnichʼonik xchiʼuk li Rakele, ti jaʼ li yajnil mas skʼanoje; Jose sbi li sba yol xnichʼonike. Kʼalal la spas smul li Rubene, li sderecho ta ba nichʼonile echʼ ta stojolal Jose (Gén. 29:31-35; 30:22-25; 35:22-26; 49:22-26; 1 Crón. 5:1, 2). Akʼo mi jech, li snitilul Mesiase muʼyuk bu te tal ta stojolal Rubén mi jaʼuk ta stojolal Jose, jaʼ te lik talel ta stojolal Juda, li xchanvoʼal xnichʼon Jakob ti laj yil xchiʼuk Leae (Gén. 49:10).

 Ta Lukas 3:32 chalbe skʼoplal voʼob viniketik ti kʼotik ta snitilulal li Mesias eke. Yaʼeluke, jaʼ ba nichʼoniletik skotolik. Li Boase jaʼ xnichʼon li Obede, li Obede jaʼ xnichʼon li Jesee (Rut 4:17, 20-22; 1 Crón. 2:10-12).

Li yan snitilul Mesiase jaʼ li Davide. Pe maʼuk sba xnichʼon Jese li Davide, moʼoj, jaʼ xa li slajeb ta xvaxakvoʼal xnichʼnabe (1 Sam. 16:10, 11; 17:12; Mat. 1:5, 6). Jechtik kʼot ta stojolal ek li Salomone, yuʼun maʼuk sba xnichʼon ek li Davide (2 Sam. 3:2-5).

Taje maʼuk skʼan xal ti muʼyuk tsots skʼoplal ti jaʼ ba nichʼonil li jun krixchanoe. Yuʼun lek ichʼbil ta mukʼ li ba nichʼonil ta jujun utsʼ alalile xchiʼuk jaʼtik onoʼox chkʼot ta jolil ta utsʼ alalil ta tsʼakal. Jech xtok, chib to velta yepal chichʼ komel xrexto (Gén. 43:33; Deut. 21:17; Jos. 17:1).

Pe li derechoil ta sventa ba nichʼonile xuʼ ta xichʼ jelubtasel ta yan nichʼonil. Jech kʼuchaʼal liʼe, kʼalal la stak batel Ismael li Abraane, li sderechotak sventa ba nichʼonile echʼ ta skʼob Isaak (Gén. 21:14-21; 22:2). Xchiʼuk jech kʼuchaʼal laj xa kaltike, li sderechotak Rubene echʼ ta skʼob Jose.

Jkʼeltik yan velta Evreos 12:16 ti bu xi la stsʼiba li jtakbol Pabloe: «Jech xtok mu me buchʼu junukal xmulivaj avuʼunik xchiʼuk ti mu xichʼ ta kʼux li kʼusitik chʼul jech kʼuchaʼal la spas Esaue, ti ta jlech noʼox veʼlil laj yakʼ ta moton li sderecho ta sventa ti jaʼ sba nichʼonile». ¿Kʼusi la skʼan laj yalbe skʼoplal li Pabloe?

Li jtakbole maʼuk yakal chalbe skʼoplal li snitilulal Mesiase. Li ta versikuloetik echʼe xi laj yalbe li yajtsʼaklomtak Kristoe: «Jechuk-o me tukʼ xapas batel abeik ta sventa li avokike». Jaʼ jech laj yal sventa mu junuk xikta sbaik «ta stael li slekil yutsil yoʼonton Diose», ti xuʼ jaʼ jech xkʼot ta stojolalik mi tsʼujik ta mulivajele (Evr. 12:12-16). Mi la spasik li mulil taje, jaʼ jech xkoʼolajik xchiʼuk li Esaue, ti muʼyuk bu la xkʼuxubin li kʼusitik chʼule xchiʼuk ti jaʼ la stʼuj li «kʼusi muʼyuk chʼul» jech kʼuchaʼal chal ta jujupʼel kʼop li Vivlia Kingdom Interlinear.

Kuxi ta skʼakʼalil moltotiletik li Esaue xchiʼuk xuʼ van la sta smoton ti chakʼ milbil matanaletik ta stojolal li yutsʼ yalal jech kʼuchaʼal junuk palee (Gén. 8:20, 21; 12:7, 8; Job 1:4, 5). Pe ta skoj ti jaʼ noʼox la snop li kʼusi tskʼan sbekʼtale, laj yikta komel skotol li smoton staoj ti jaʼ ba nichʼonil ta skoj noʼox jlech veʼlile. Xuʼ van la snop ti mu skʼan snuptan li vokoliletik ti laj yichʼ alel tsnuptan li snitilulal Abraane (Gén. 15:13). Jech xtok, li Esaue laj yakʼ ta ilel ti mu xkʼuxubin kʼusitik chʼul kʼalal nupun xchiʼuk chaʼvoʼ antsetik ti jyanlumetike, ti ep tajek laj yakʼbe svokol li stot smeʼe (Gén. 26:34, 35). Toj jelel tajek li Jakobe, yuʼun li stuke laj yakʼ ta yoʼonton xnupun xchiʼuk jun ants ti yichʼoj ta mukʼ li melel Diose (Gén. 28:6, 7; 29:10-12, 18).

Jech oxal chaʼa, ¿kʼusi chkʼot ta nopel kuʼuntik? Bakʼintike, li snitilulal Mesiase te chlik talel ta stojolal li ba nichʼoniletike, pe mu skotoluk velta jech. Li judaetike snaʼojik taje xchiʼuk la xchʼamik; jech kʼuchaʼal liʼe, la xchʼamik ti te chlik talel ta stojolal David ti jaʼ xkʼox nichʼon li Jesee (Mat. 22:42).