¿Kʼu yuʼun mu stakʼ xichʼ akʼel ta yan pajina ta Internet o ta redes sosiales li vunetik o yan kʼusitik yuʼun li stestigotak Jeovae?

Ta skoj ti mi jsetʼuk bu tskʼanbe stojol li kʼusitik tspuk li j-organisasiontike, oy ep buchʼutik tsnopik ti xuʼ xichʼ akʼel ta yan pajinaetik ta Internet o li ta redes sosialese. Pe jaʼ jun tsatsal mulil ti jech tspasike, yuʼun muʼyuk tstsakik ta venta Ti Kʼutik Yelan xuʼ Xichʼ Tunesele * xchiʼuk ep xa jvokoltik yakʼojik ta skoj ti muʼyuk chchʼunik li mantal taje. Li ta mantal ti bu chal kʼu yelan xuʼ xichʼ tunesele jamal chal ti mu buchʼu stakʼ spuk batel ta yan pajina ta Internet, ta redes sosiales li kʼusitik oy ta jpajinatike, jech kʼuchaʼal lokʼoletik, vunetik, smarkail li programaetik ti jaʼ tsjam-o li kʼusitik te xvinaje, musikaetik, videoetik o yan mantal. Pe, ¿kʼu yuʼun ti tsots tajek tspajesvanik sventa mu jechuk xichʼ pasele?

Li kʼusitik oy ta jpajinatik ta Internete tsakal lek ta smantal ajvalil ti derechos de autor sbie, jaʼ yuʼun, mu buchʼu xuʼ smuyes ta yan pajina ta Internet.

Skotol li kʼusitik te xvinaj li ta jpajinatik ta Internete tsakal lek ta smantal ajvalil ti derechos de autor sbie. Li jvalopatinej mantaletik xchiʼuk li yan jkontrainvanejetike chakʼik ta yan pajinaetik ta Internet li jvuntik o yan kʼusitik sventa stij koʼontontik xij-och li ta pajina taje. Pe li ta spajinaike te tstikʼik yan aʼyejetik ti lek nopbil yuʼunik sventa tsloʼlautike (Sal. 26:4; Prov. 22:5). Yantik xtoke tstunesik li kʼusi chal ta jvuntik o li slokʼol jw.org sventa spukbeik skʼoplal li kʼusi chchonike o li kʼusi chakʼik ta ojtikinele, o tstunesik ta junantik aplikasion sventa selular o tavleta. Pe ta skoj ti tsakal lek ta smantal ajvalil skotol li kʼusitik ta jpajinatike, li j-organisasiontike oy lek sderecho ta stojolal ajvalil sventa tsots spajtsan li buchʼutik ta yipal noʼox yoʼonton jech tstunesike (Prov. 27:12). Ti tauk xakʼ permiso j-organisasiontik sventa buchʼuuk noʼox xuʼ stunes li slokʼol jw.org sventa xchonolajik-oe o ti xakʼuk permiso sventa xichʼ akʼel ta yan pajinaetik ta Internet li kʼusitik ta jpajinatike, muʼyuk me bu chpojat yuʼun li jchapanvanejetik kʼalal tsots tspajtsan li buchʼutik mu xchʼunik mantale o li empresaetike.

 Toj xibal sba kʼalal ta jyalestik vunetik o yan kʼusitik ta yan pajinaetik ta Internete. Li Jeovae jaʼ noʼox yakʼojbe sbain «tukʼil xchiʼuk pʼijil mosoil» sventa xakʼbutik li veʼlil ta mantale (Mat. 24:45). Li «mosoil» taje jaʼ noʼox tspuk jveʼeltik ta mantal li ta jpajinatike, ti jaʼ li jw.org, tv.jw.org xchiʼuk wol.jw.org. Xchiʼuk jaʼ noʼox yakʼoj oxib aplikasion sventa selular o tavleta xtok, ti jaʼ li JW Language®, JW Library® xchiʼuk JW Library Sign Language®. Liʼe xuʼ jchʼuntik ta melel ti lek sake, yuʼun muʼyuk bu chvinaj kʼusitik sventa chichʼ chonel xchiʼuk muʼyuk bu yichʼoj kʼusitik ti jaʼ sventa sbalumil Satanase. Pe mi jot-o bu bat jsaʼtik li jveʼeltik ta mantale, chib me tajek skʼoplal mi lek to li mantaletik tee, yuʼun xuʼ van sjelojik xa (Sal. 18:26; 19:8).

Jech xtok, mi oy buchʼu tsmuyes jvuntik o yan kʼusitik ta junuk pajina ti bu xuʼ stsʼibaik li kʼusi tsnopik li yantik sventa buchʼuuk noʼox skʼele, li jvalopatinej mantaletik xchiʼuk li jkontrainvanejetike lek xa me chaʼi te chalik li kʼusi tsnopike, vaʼun mi la jkʼeltike, xuʼ van mu xa jpat koʼontontik ta stojolal li j-organisasiontike. Oy junantik ermanoetik xtoke chlik stsak sbaik ta kʼop ta Internet ta skoj ti tspakbeik skʼoplal yalojik li kʼusi jchʼunojtike, pe kʼalal jech tspasike jaʼ noʼox chikʼubtasbeik-o ta jyalel li sbi Jeovae. Yuʼun li ta pajinaetik ta Internet taje maʼuk te yavil sventa jchanubtastik ta slekil koʼontontik «li buchʼutik mu skʼan xchʼamik li chanubtasele» (2 Tim. 2:23-25; 1 Tim. 6:3-5). Jech xtok, tabil ta kʼelel ti oy yichʼoj pasel junantik pajinaetik ta Internet o redes sosiales ti lek xa yilele, yuʼun jaʼ akʼbil ta sbi li j-organisasiontike, ta sbi li Jtsop Jbeiltasvaneje o ta sbi junuk li ta Jtsop Jbeiltasvaneje. Pe ta melele, muʼyuk spajinaik ta Internet jech kʼuchaʼal taje xchiʼuk muʼyuk bu stikʼoj sbaik ta junuk pajina ta Internet.

Kʼalal chkalbetik yantik ti akʼo ochikuk li ta jpajinatik ta jw.org, jaʼ jech ta jcholtik batel «li lekil [aʼyejetike]» (Mat. 24:14). Li kabtejebtik sventa cholmantal ta Internete yantik chlekub batel xchiʼuk ta jkʼantik ti akʼo stabeik sbalil skotol li krixchanoetike. Jaʼ yuʼun, jech kʼuchaʼal chal li smantalil ta sventa Ti Kʼutik Yelan xuʼ Xichʼ Tunesele, xuʼ jtakbetik batel yantik ta koreo elektroniko jlikuk vun o yan kʼusitik xchiʼuk xuʼ jtakbetik batel ti bu lek stukʼil oy li vune yoʼ tukʼ xtakatik batel li ta jpajinatik ta jw.org, vaʼun xuʼ te syalesik. Kʼalal chkalbetik yantik ti akʼo ochikuk li ta jpajinatike, xkoʼolaj ti chkikʼtik batel ta stojolal li «tukʼil xchiʼuk pʼijil mosoil» ti jaʼ noʼox stuk oy ta sba yakʼel li jveʼeltik ta mantale.

^ par. 1 Li bu chal Ti Kʼutik Yelan xuʼ Xichʼ Tunesele te chata ta yok to tajek li ta jpajinatik jw.org. Jaʼ te chal skotol li kʼusi mu stakʼ pasel kʼalal ta jtunestik li jpajinatike.