Kʼelo li kʼusi yichʼoje

Batan ta saʼobil

Skarta Li Jtsop Jbeiltasvaneje

Skarta Li Jtsop Jbeiltasvaneje

Kuni kermanotak:

Voʼotik ti kichʼojtik ta mukʼ li Jeovae, jkʼanojbetik li Skʼop ti jaʼ li Vivliae. Jchʼunojtik ti melel li kʼusitik chalbe skʼoplale, ti jtunel sventa jkuxlejaltik li kʼusi chale xchiʼuk ti yichʼoj skʼelobiltak ti chakʼ iluk ti skʼanojutik tajek li Jeovae (Salmos 119:105; Lukas 1:3; 1 Juan 4:19). Li kʼusi oy ta koʼontonkutike jaʼ ti xuʼ jkoltakutik yantik ta snaʼel li kʼusitik melelik chalbe skʼoplal li Vivliae. Ta skoj taje jaʼ jun muyubajel chkaʼikutik ti chkalbotkutik ti laj yichʼ lokʼesel li livro liʼe: Xchanobiltak ti xuʼ jtatik ta Vivliae. Kalbetik jutuk skʼoplal li kʼusitik yichʼoj talel li livro liʼe.

Kʼalal laj yichʼ pasel li livro liʼe jaʼ mas la jnopbekutik skʼoplal ta sventa li kʼoxetike. Akʼo mi jech, jtunel xtok venta skotol krixchanoetik ti oy ta yoʼontonik xchanbel skʼoplal li Vivliae. Ta skoj ti jaʼ jun livro sventa skotol krixchanoetik li Vivliae. Xuʼ jpat koʼontontik ti xuʼ jtabetik sbalil kʼalal ta jkʼeltik li xchanobiltak yichʼoj talele xchiʼuk ti tskoltautik yoʼ xijmuyubaj noʼoxe.

Li xchanobiltak ta livro liʼe te lokʼemik tal ta Vivlia chalbe skʼoplal kʼuxi lik talel li baʼyel utsʼ alalile. Laj yichʼ akʼel persa ti kʼunuk xchiʼuk ti lekuk ta aʼibel smelolale xchiʼuk ti lek xcholet laj yichʼ alel ti kʼu yelan kʼotanuk ta pasele.

Pe maʼuk noʼox chalbe skʼoplal li kʼusitik kʼot ta pasele. Yuʼun li kʼusi chal xchiʼuk li ta slokʼoltake chakʼ akʼo jnoptik ti yakal chkʼot ta pasel li kʼusitike xchiʼuk ti kʼu yelan laj yaʼi sbaike.

Li livroe liʼe chalbe skʼoplal xtok epal krixchanoetik ti ta jtatik ta Vivliae, jech kʼuchaʼal: Li buchʼutik la xchʼunbeik smantal Jeova xchiʼuk li buchʼutik muʼyuke. Tskoltautik xtok yoʼ oyuk kʼusi jchanbetik ta stojolalik (Romanos 15:4; 1 Korintios 10:6). Li livro liʼe  chʼakbil ta 14 ta vokʼ, li ta slikebal jujuvokʼe chichʼ albel jutuk skʼoplal li kʼusitik xuʼ jchantik li ta xchanobiltake.

Mi oy avalab anichʼnabe, xuʼ koʼol xachanik jun xchanobil xchiʼuk koʼol xa loʼiltaik li slokʼoltake. Ta tsʼakale xuʼ xa chanik li tekstoetik ta Vivlia ti bu lokʼem li xchanobil ti mi laj xa ox akʼelike. Koltao yoʼ xakʼik venta ti koʼol li kʼusi chalbe skʼoplal li livro xchiʼuk li Vivliae. Taje xuʼ jech xapas xchiʼuk li buchʼutik oy xa sjabilalik yoʼ snaʼik kʼusi chalbe skʼoplal sliklej li Vivliae.

Oy tajek ta koʼontonkutik ti stabeik sbalil skotol krixchanoetik li livro liʼe, mi kerem tsebetik o mi oy xa sjabilalik xuʼ xkoltaatik ta xchanel li Skʼop Diose xchiʼuk ti xakʼ ta xkuxlejalik li kʼusi ta xchanike. Vaʼun xuʼ xlik yichʼik ta mukʼ li Jeovae xchiʼuk xuʼ xkʼotik ta yutsʼ yalal.

Avermanotakik,

Li Jtsop Jbeiltasvanej yuʼun li Stestigotak Jeovae