Vaxakib jabil toʼox yichʼoj Josias kʼalal och ta ajvalil ta Judae. Li vaʼ kʼakʼaletike chichʼik toʼox ta mukʼ jecheʼ diosetik li krixchanoetike xchiʼuk tstunesik majia. Pe kʼalal 16 xa ox sjabilal li Josiase ayan ta yoʼonton yoʼ lekuk xichʼ ta mukʼ li Jeovae. Jaʼ yuʼun kʼalal la sta 20 sjabilale la slilin li jecheʼ diosetike xchiʼuk li skajleb matanal yuʼunik li ta jteklume. Xchiʼuk kʼalal 26 xa ox sjabilale la xchapan skotol li kʼusitik chtun yoʼ xchaʼmeltsanbe li stemplo Jeovae.

Li mero bankilal pale Ilkiase te la sta ta yut templo li balbalvun ti bu chal li Smantaltak Diose. Xuʼ van jaʼ la stsʼiba li Moisese. Li Safan ti jaʼ li jtsʼibajom yuʼun li ajvalil Josiase laj yichʼ batel li balbalvune xchiʼuk tsots laj yaptabe li Josiase. Kʼalal laj yaʼi Josias li kʼusi chal li balbalvune laj yakʼ venta ti oy xa ta epal jabil muʼyuk jech xichʼik ta mukʼ Jeova li judaetike. Jaʼ yuʼun li Josiase xi laj yalbe li Ilkiase: «Li Jeovae ilinem tajek ta jtojolaltik. Kʼopono yoʼ jnaʼtik li kʼusi xuʼ jpastike». Vaʼun li Jeovae xi laj yalbe tal ta stojolal li meʼ j-alkʼop Uldae: «Li jteklum Judae laj xa skomtsanikun. Pe jaʼ to ta xkakʼbe stoj smulik kʼalal mi cham li ajvalil Josiase, yuʼun li stuke bikʼit yakʼoj sba».

Kʼalal laj yaʼi ajvalil Josias li kʼusi laj yal li Jeovae, bat li ta temploe xchiʼuk la stsob skotol li judaetike. Kʼalal te xa ox oy skotolike tsots lik yapta Smantal Jeova li Josiase. Vaʼun li Josias xchiʼuk skotol li judaetike laj yalik ta jamal ti chchʼunbeik smantaltak li Jeovae.

Oy xa jayibuk jabil ti muʼyuk spasojik-o kʼin Koltael li ta jteklum  Judae. Kʼalal la xchan Smantaltak Jeova li Josiase te laj yakʼ venta ti persa skʼan spasik jujun jabil li kʼin Koltaele. Jaʼ yuʼun xi laj yalbe li jteklume: «Ta jpastik li kʼin Koltael sventa Jeovae». Vaʼun ta tsʼakale laj yal mantal ti akʼo smeltsanik ep matanaletik sventa Jeova xchiʼuk laj yal ti oyuk buchʼutik xkʼejinik li ta temploe. Vaʼun la spasik li kʼin Koltael xchiʼuk li Skʼinal pan ti muʼyuk yichʼoj slevaduraile, jech la spasik vukub kʼakʼal. Taje voʼne xa tajek ti jech la spasike, yuʼun jaʼ toʼox jech la spasik kʼalal kuxul toʼox li Samuele. Ta melel skʼanoj Jeova li Josiase jaʼ yuʼun la xchʼunbe li Smantaltake. ¿Mi chakʼan chavojtikin li Jeova eke?

«Li akʼope jaʼ kʼotem ta kantil yuʼun li koke xchiʼuk jaʼ sak jaman batel yuʼun li jbee» (Salmo 119:105).