Kʼelo li kʼusi yichʼoje

Batan ta saʼobil

 XCHANOBIL 23

Laj yalbeik Jeova ti chchʼunik mantale

Laj yalbeik Jeova ti chchʼunik mantale

Kʼalal chib xa ox u slokʼelik ta Ejipto li j-israeletike, te kʼotik ta vits Sinai xchiʼuk te la spas skarpanaik. Laje, li Jeovae laj yalbe Moises ti akʼo muyuk batel li ta vitse, xi laj yal li Jeovae: «Voʼon la jkolta lokʼel li j-israeletike. Mi chchʼunbeikun jmantale, chkʼotik ta jteklumal ti jkʼanoj tajeke». Kʼalal yal talel ta vits li Moisese, laj yalbe j-israeletik li kʼusi laj yal Jeovae. ¿Mi xanaʼ kʼusi laj yalik li j-israeletike? Xi laj yalike: «Ta jpaskutik skotol li kʼusi chal Jeovae».

Laje, li Moisese muy batel yan velta li ta vitse. Xi albat yuʼun li Jeovae: «Leʼ ta oxib kʼakʼale ta jchiʼin ta loʼil li jteklume. Albo yaʼiik ti mu me xmuyik talel li ta vits Sinaie». Yal talel ta vits li Moisese, vaʼun laj yalbe j-israeletik ti akʼo xchapan sbaik sventa xchikintaik li kʼusi ch-albatik yuʼun Jeovae.

Li ta yoxibal kʼakʼale, li j-israeletike laj yilik saksevuletik ti xvikʼlajet tajek li ta vitse xchiʼuk laj yilik ti pixat ta ikʼal tok li vitse. Jech xtok, laj yaʼiik nik tsots chauk xchiʼuk laj yaʼiik chichʼ jupanel xulub vakax. Laje, li Jeovae yal talel ta jun kʼokʼ li ta vitse. Pe xiʼik tajek li j-israeletike. Pixil kom ta chʼail li vitse xchiʼuk tsots tajek echʼ nikel. Kʼalal jech yakal chkʼot ta pasel taje, mas xa tsots chbakʼ li xulub vakaxe. Xi laj yal li Jeovae: «Voʼon Jeovaun, mu stakʼ xavichʼik ta mukʼ yan diosetik».

Li Moisese muy batel yan velta xtok li ta vitse, te akʼbat yuʼun Jeova li Mantaletik sventa jteklume. Li ta Mantaletik taje jaʼ te chal kʼu yelan skʼan xichʼik ta mukʼ li Diose xchiʼuk ti kʼu yelan skʼan spas stalelalike. Vaʼun li Moisese la stsʼiba, laje la xchanbe li j-israeletike. Xi jamal laj yalik li j-israeletike: «Ta jpaskutik skotol li kʼusi chal Jeovae». Pe, ¿mi chkʼot van ta pasel yuʼunik xanaʼ?

«Skʼan xakʼan ta sjunul avoʼonton li Jeova Dios avuʼune, ta sjunul akuxlejal xchiʼuk ta sjunul anopben» (Mateo 22:37).