Kʼelo li kʼusi yichʼoje

Sventa xasut ta xchibal pajina

Batan ta saʼobil

Stestigotak Jeova

tsotsil

Xchanobiltak ti xuʼ jtatik ta Vivliae

 XCHANOBIL 3

La stoy sbaik ta stojolal Dios li Adan xchiʼuk Evae

La stoy sbaik ta stojolal Dios li Adan xchiʼuk Evae

Jun kʼakʼal kʼalal stuk te oy li Evae laj yichʼ kʼoponel yuʼun jkot kiletel chon. Xi jakʼbate: «¿Mi ta melel laj yalboxuk Dios ti mu xuʼ chalobeik sat jpetsuk li teʼetik liʼ ta tsʼunobaltike?». Xi la stakʼ li Evae: «Xuʼ ta jloʼbekutik sat skotol li teʼetik liʼ ta tsʼunobaltike. Jaʼ noʼox oy jpets teʼ ti mu xuʼ ta jloʼkutike. Yuʼun mi ta jloʼkutike ta xichamkutik». Xi laj yal li chone: «Mu xachamik. Yuʼun mi chaloʼike chakoʼolajik jech kʼuchaʼal Dios». ¿Mi melel van taje? Maʼuk melel. Pe li Evae la xchʼun, jech xtok kʼalal mas tskʼel li sat teʼe, tskʼan xa sloʼ yaʼi ta ora. Vaʼun la sloʼ xchiʼuk laj yakʼbe li Adan eke. Li Adane snaʼoj ti xuʼ xchamik mi muʼyuk chchʼunbeik smantal li Jeovae, pe akʼo mi jech la sloʼ ek.

Kʼalal bat xa ox kʼakʼale kʼoponatik yuʼun Jeova li Adan xchiʼuk Evae. Jakʼbatik ti kʼu yuʼun muʼyuk la xchʼunik mantale. Li Evae laj yal ti jaʼ ta smul li chone, jech ek li Adane laj yal ti jaʼ ta smul li Evae. Ta skoj ti muʼyuk la xchʼunbeik smantal Jeova li Adan xchiʼuk Evae laj yichʼik nutsel lokʼel li ta nichimaltike. Jaʼ yuʼun li Jeovae laj yakʼ anjeletik xchiʼuk jun espada ti xpulpun noʼox skʼakʼal li ta yochebal nichimaltik yoʼ mu x-ochik yan veltae.

Jech xtok li Jeovae laj yal ti chakʼbe kastigo ek li buchʼu la sloʼla li Evae. Jaʼ melel ti maʼuk kʼopoj stuk li chone. Yuʼun li Jeovae muʼyuk bu la spas chonetik ti xuʼ xkʼopojike. Jaʼ jun chopol anjel ti laj yakʼ akʼo kʼopojuk li chon sventa sloʼla li Evae. Li anjel taje jaʼ li Diablo Satanase. Ta mas jelavele, li Jeovae ta slajes li Satanas sventa mu sloʼla-o batel li krixchanoetike.

«Li Diabloe [...] jmilvanej onoʼox ta slikebal xchiʼuk muʼyuk onoʼox bu tukʼ laj yakʼ sba ta stojolal li kʼusi melele, yuʼun muʼyuk te oy ta stojolal li kʼusi melele» (Juan 8:44, tsʼib ta yok vun).