Kʼelo li kʼusi yichʼoje

Sventa xasut ta xchibal pajina

Batan ta saʼobil

Stestigotak Jeova

tsotsil

Xchanobiltak ti xuʼ jtatik ta Vivliae

 XCHANOBIL 95

Muʼyuk kʼusi pajtsanatik-o

Muʼyuk kʼusi pajtsanatik-o

Oy jun vinik ti mu xanave te chchoti skotol kʼakʼal ta skʼanel limoxna ta stiʼ templo. Jun mal kʼakʼale laj yil ti te kʼotik ta templo li Pedro xchiʼuk Juane, vaʼun xi laj yalanbee: «Avokolikuk akʼbeikun takʼin». Xi la stakʼ li Pedroe: «Oy kʼusi ta xkakʼbot ti mas to ep sbalil ti jaʼ mu jechuk li takʼine. Ta sbi Jesus chkalbot, ¡likan xchiʼuk xanavan!». Vaʼun li Pedroe la snit likel li vinike jech lik xanavuk. Ep krixchanoetik pasik ta yajtsʼaklom Kristo kʼalal laj yilik li skʼelobil juʼelal taje.

Pe li paleetik xchiʼuk li jsaduseoetike ilinik tajek. Jech oxal la stsakik li jtakboletike xchiʼuk laj yikʼik batel ti bu chchapanvanik li jnitvanejetik ta relijion ti Sanedrin sbie, vaʼun xi jakʼbatike: «¿Buchʼu laj yakʼboxuk li juʼelal sventa xa poxtaik li vinik taje?». Vaʼun xi la stakʼ li Pedroe: «Jaʼ laj yakʼ juʼelkutik li Jesukristo ti voʼoxuk la amilike». Pe xi tsots laj yalik li jchanubtasvanejetik ta relijione: «¡Mu xa xavalbeik skʼoplal li Jesuse!». Vaʼun xi takʼavik li jtakboletike: «Muʼyuk bu chipajkutik yuʼun skʼan xkalbekutik-o batel skʼoplal».

Kʼalal laj yichʼik koltael batel li Pedro xchiʼuk Juane, batik ta stojolal li yantik jchankʼopetike xchiʼuk laj yalbeik li kʼusi kʼot ta stojolalike. Vaʼun koʼol la spasik orasion, xi laj yalbeik li Jeovae: «Avokoluk, koltaunkutik sventa oyuk stsatsal koʼontonkutik ta yalel batel akʼoplal». Jaʼ yuʼun li Jeovae laj yakʼanbe chʼul espiritu li jtakboletik yoʼ xcholik batel mantal xchiʼuk yoʼ xpoxtavanike. Vaʼun epal krixchano pasik ta yajtsʼaklom Kristo. Pe li jsaduseoetike ilinik tajek vaʼun la stikʼik ta chukel li jtakboletike. Pe li ta akʼobaltik taje li Jeovae la stak talel yaj-anjel yoʼ tsjambe stiʼ li chukinabe, vaʼun xi laj yal li anjele: «Batanik, bat vaʼano abaik ta templo xchiʼuk cholbeik mantal li krixchanoetik teye».

Ta sob yokʼomale oy buchʼu xi kʼot yal li ta Sanedrine: «Pe bajal lek la jtakutik li chukinabe pe muʼyuk te la jtakutik li viniketik ti la atikʼik ta chukele, yuʼun te xa yakal chchanubtasik krixchanoetik li ta temploe». Jaʼ yuʼun ay yichʼik tsakel tal yan velta li jtakboletike xchiʼuk ikʼatik batel ta stojolal li Sanedrine. Vaʼun xi albatik yuʼun li bankilal palee: «¡Jamal laj avichʼik albel ti mu xa  xachanubtasvanik-o ta sventa li Jesuse!». Pe xi la stakʼ li Pedroe: «Jaʼ skʼan ta jchʼunbekutik smantal Dios ti jaʼ li Ajvalile, maʼuk ta jchʼunbekutik li krixchanoetike».

Li jchanubtasvanejetik ta relijione solel ilinik tajek ta stojolalik li jtakboletike, jaʼ yuʼun tskʼan tsmilik. Vaʼun vaʼi jun fariseo ti Gamaliel sbie xchiʼuk xi laj yale: «¡Kʼelo me abaik, yuʼun xuʼ van chiʼinbilik yuʼun Dios li viniketik liʼe! ¿Mi yuʼun chakʼan chatsakik ta kʼop li Diose?». Vaʼun li jchanubtasvanejetik ta relijione la xchʼunik. Jaʼ yuʼun la skoltaik batel li jtakboletike akʼo mi baʼyel laj yichʼik majel xchiʼuk albatik ti akʼo mu xa xcholik mantale. Pe akʼo mi jech, muʼyuk bu pajik li jtakboletike. Yuʼun ta sjunul yoʼontonik la xcholik-o batel mantal ta templo xchiʼuk ta jujupʼej naetik.

«Jaʼ skʼan ta jchʼunbekutik smantal kʼuchaʼal ajvalil li Diose, maʼuk li krixchanoetike» (Echos 5:29).