Kʼelo li kʼusi yichʼoje

Batan ta saʼobil

XCHANOBIL 102

Oy kʼusi akʼbat yil li Juane

Oy kʼusi akʼbat yil li Juane

Kʼalal jaʼo te tikʼil ta chukel li jtakbol Juan li ta Patmos ti jaʼ jun lum ti kakal ta nabe. Akʼbat yil yuʼun Jesus 16 ta tos li kʼusitik chkʼot ta pasel ta mas tsʼakale. Yuʼun laj yil kʼu yelan chichʼ chʼultajesbel li sbi Jeovae, kʼuxi bat taluk li Ajvalilal yuʼune xchiʼuk ti kʼuxi chkʼot ta pasel yuʼun li kʼusi tskʼan yoʼonton liʼ ta balumil jech kʼuchaʼal ta vinajele.

Li Juane akʼbat yil ti te chotol ta jun chotlebal sventa Ajvalilal ta vinajel li Jeovae. Li ta spat xokon chotlebale oy 24 ta voʼ moletik ti slapojik sakil kʼuʼil xchiʼuk oy skoronail sjolik ti pasbil ta oroe. Jech xtok, li ta chotlebal taje chlokʼ talel saksevul, yechʼomal eal xchiʼuk chauketik. Vaʼun li 24 ta voʼ moletike tskejan sbaik ta stojolal Jeova xchiʼuk chichʼik ta mukʼ. Jech xtok li Juane laj yil epal krixchanoetik ti likemik tal ta epal lumetik, jteklumetik, ta jeltos kʼopetik vaʼun skotolik chichʼik ta mukʼ li Jeovae. Li Chʼiom Chij ti jaʼ skʼoplal li Jesuse tsbeiltas batel li epal krixchanoetik li ta voʼ ti chakʼ kuxlejale. Li kʼusi yan laj yil li Juane jaʼ ti lik spas mantal Jesus xchiʼuk li 24 moletike. Ta yan xtoke laj yil ti yakal tstsʼak sbaik ta kʼop ta vinajel Jesus xchiʼuk li Satanase, vaʼun laj yichʼik jipel yalel tal liʼ ta balumil li Satanas xchiʼuk li spukujtake.

Vaʼun laj yil xtok li Chʼiom Chij xchiʼuk li 144 mil krixchanoetik ti te vaʼajtik li ta Vits Sione. Xchiʼuk laj yil jun anjel ti yakal chvil ta spʼejel balumil xchiʼuk ti xi chale: «Xiʼtaik xchiʼuk albeik smukʼulal li Diose».

Li yan kʼusi laj yil li Juane jaʼ li paskʼop ta Armajedone. Li ta paskʼop taje li Jesus xchiʼuk li yajsoltarotake la slajesbeik li xchopol balumil Satanase. Li ta slajebal kʼusi laj yile jaʼ ti naka xa jun oʼontonal oy ta vinajel xchiʼuk li ta balumile, jech xtok jmoj xa oyik li krixchanoetike. Laj yil xtok ti chichʼ slajesel ta j-echʼel li Satanas xchiʼuk li chopol krixchanoetike. Vaʼun li ta vinajel xchiʼuk li ta balumile skotolik chʼul chilik li sbi Jeovae xchiʼuk jaʼ xa noʼox stuk chichʼik ta mukʼ.

«Kontra chavil abaik kuʼun xchiʼuk li antse, jech xtok, kontra chil sbaik li anitilulal xchiʼuk li snitilulal antse. Li stuke ta xvochʼbot li ajole, yan li voʼote chayayijesbe xchak yakan» (Jenesis 3:15).