Kʼelo li kʼusi yichʼoje

Batan ta saʼobil

 XCHANOBIL 97

Laj yichʼ chʼul espiritu li Kornelioe

Laj yichʼ chʼul espiritu li Kornelioe

Li ta Sesareae oy jun bankilal soltaro yuʼun jromaetik ti jaʼ sbi Kornelioe. Akʼo me maʼuk judio li stuke, pe ch-ichʼat ta mukʼ yuʼun li judioetike. Jaʼ jun vinik ti toj lek yoʼontone, yuʼun lek tajek chaʼi skoltael li buchʼutik abol sbaike. Xchiʼuk skotol ora tspas orasion yuʼun xchʼunoj ti oy li Jeovae. Jun veltae, oy jun anjel laj yakʼ sba ta ilel ta stojolal li Kornelioe vaʼun xi albate: «Li Diose laj xa yaʼibot li aorasione. Tako batel aviniktak li ta lum Jope ti bu oy li Pedroe xchiʼuk akʼo yalbeik ti akʼo xtal skʼelote». Jaʼ yuʼun li Kornelioe ta ora noʼox la stak batel oxib sviniktak ta Jope ti te van 50 kilometrouk snamale.

Kʼalal te toʼox oy ta Jope li Pedroe oy kʼusi akʼbat yil, yuʼun laj yil chonbolometik ti mu xuʼ stiʼik li judioetike. Ta tsʼakale laj yaʼi jun yechʼomal eil ti albat ti akʼo stiʼ li chonbolometik laj yile. Pe xi laj yal li Pedroe: «Muʼyuk ta jtiʼ li kʼusi ibal sbae». Xi laj yal li yechʼomal eile: «Mu xaval ti muʼyuk lek li kʼusitik slekubtasoj xa Diose». Xchiʼuk xi to laj yal li yechʼomal eile: «Te oy oxvoʼ viniketik ta stiʼ ana ti yakal tsaʼikote, bat kʼelo». Vaʼun li Pedroe bat skʼel xchiʼuk la sjakʼbe ti kʼu yuʼun te kʼotike, xi la stakʼik li viniketike: «La stakunkutik tal Kornelio jun bankilal soltaro yuʼun jromaetik. Ta skʼan ti xabat li ta sna ta Sesareae». Vaʼun li Pedroe laj yalbe  ti akʼo te xkomik ta sna li vaʼ akʼobale. Ta sob yokʼomal li Pedroe bat xchiʼuk li viniketik li ta Sesareae. Xchiʼuk oy junantik ermanoetik ta Jope ti batik eke.

Kʼalal kʼot li Pedroe, li Kornelioe la skejan sba ta anil ta stojolal pe xi laj yal li Pedroe: «Likan yuʼun krixchanoun ek jech kʼuchaʼal voʼote. Jaʼ la stakun tal Dios sventa xtal jkʼelot, akʼo mi mu stakʼ jchiʼinkutik junuk krixchano ti yan-o slumale, yuʼun judiounkutik. Jaʼ yuʼun avokoluk, albun ti kʼu yuʼun la atakun ta ikʼele».

Vaʼun xi albat yuʼun Kornelio li Pedroe: «Leʼ xa ta xchanibal kʼakʼale, kʼalal yakal ta jpas orasione laj yalbun jun anjel ti akʼo jtakot ta ikʼele. Jaʼ yuʼun chanubtasunkutik ta sventa li kʼusi tskʼan Jeovae». Pe xi la stakʼ li Pedroe: «Ta melel, xkaʼibe xa smelolal ti mu snaʼ xtʼujvan li Diose, yuʼun lek chil skotol krixchanoetik jaʼ noʼox me ch-ichʼat ta mukʼe». Jaʼ yuʼun li Pedroe lik xchanubtasan ta sventa li Jesuse, vaʼun li Kornelioe xchiʼuk li buchʼutik te xchiʼuke laj yichʼik chʼul espiritu vaʼun laj yichʼik voʼ.

«Moʼoj, yuʼun buyuk noʼox slumalik lek ch-ilat li buchʼu chiʼta xchiʼuk ti buchʼu tspas li kʼusi tukʼe» (Echos 10:35).