Li Jesuse chalbe skʼoplal kʼuxi chichʼ naʼel ti lik xa ajvalilajuke xchiʼuk ti nopol xa slajeb li balumil liʼe

KʼALAL te oy ta vits Olivatik, ti toj kʼupil sba xvinaj te li Jerusalén xchiʼuk chʼulnae, nopajik batel stukik chanvoʼ yajtakboltak Jesús sventa tsjakʼbeik kʼusi smelolal li kʼusitik laj yale. Yuʼun naka to laj yal ti chichʼ jinesel li chʼulnae, xchiʼuk ta yan velta xtoke laj xa onoʼox yalbe skʼoplal li kʼusitik «ta xcʼot ta pasel ta slajebal cʼacʼal[e]» (Mateo 13:40, 49). Jech oxal xi la sjakʼbeike: «¿Kʼusi ora chkʼot ta pasel li kʼusitik taje, xchiʼuk kʼusi senyail ti liʼ xa oyote xchiʼuk li slajebal kʼusitik chkʼotanuk ta pasele?» (Mateo 24:3NM).

Kʼalal la stakʼ li Jesuse, laj yal li kʼusi chkʼot ta pasel kʼalal muʼyuk toʼox bu jinesbil li Jerusalén xchiʼuk chʼulnae. Pe li kʼusi laj yale oy to kʼusi mas chalbe smelolal, li albil kʼop laj yale chkʼot ta pasel ta spʼejel Balumil ta mas tsʼakal. Sventa chichʼ naʼel bakʼin liʼ xa oy yan velta li Jesuse, li jnaklejetik ta Balumile skʼan me pʼijikuk ta skʼelel li jun senyaile: jtsop kʼusitik chkʼotanuk ta pasel ta spʼejel Balumil ti ta jmoj noʼox skʼakʼalil chkʼot ta pasele. Li senyail taje chakʼ ta ilel ti Jeovae yakʼoj xa ochuk ta Ajvalil ta Ajvalilal yuʼun Mesías li Jesuse xchiʼuk ti poʼot xa tslajes choplejal xchiʼuk chichʼ talel jun oʼontonal ta spʼejel Balumil li Ajvalilal taje. Li kʼusitik laj yal Jesuse jaʼ svinajeb ti chlaj xa li balumile —ti te tsakal skʼoplal kʼusitik sventa politika, sventa kuxlejal xchiʼuk sventa relijione— xchiʼuk ti chtal xa jun achʼ balumile.

Kʼalal chlik ajvalilajuk ta vinajel li Jesuse, laj yal ti oy pas kʼopetik, viʼnal, nikeletik xchiʼuk chameletik ta spʼejel Balumile. Muʼyuk xa chchʼunik batel mantal li krixchanoetike. Jech noxtok, li melel yajtsʼaklomtake ta xcholik batel ta skotol lumetik li lekil aʼyej ta sventa li Ajvalilal yuʼun Diose. Skotol kʼusitik taje te chlaj skʼoplal li ta mukʼta tsatsal vokolile ti muʼyuk bu jech ilbil-o ta sjunul kuxlejale (Mateo 24:21).

¿Kʼuxi tsnaʼik li yajtsʼaklomtak Cristo ti nopol xa li mukʼta tsatsal vokolile? Li Jesuse xi laj yalbe li yajtsʼaklomtake: «Chanbeic o smelol ta sventa cʼu xʼelan li higo teʼe» (Mateo 24:32). Kʼalal chlik lokʼuk yanal li higo teʼe, jaʼ svinajeb ti nopol xa li yorail kʼepelaltike. Jech ek, kʼalal ta jmoj noʼox skʼakʼalil chkʼot ta pasel skotol li kʼusitik laj yal Jesuse, chichʼ naʼel ti nopol xa tajek li slajeb kʼusitike. Akʼo mi jech, li Jesuse laj yal ti jaʼ noʼox snaʼoj sTot li skʼakʼalil xchiʼuk li yorail ti chlik mukʼta tsatsal vokolile. Jaʼ yuʼun xi ipʼijubtasvane: «Viqʼuiluc me asatic, yuʼun mu xanaʼic bu ora ta xcʼot ta pasel» (Marcos 13:33).

(Lokʼem ta kapitulo 24 xchiʼuk 25 yuʼun Mateo, ta kapitulo 13 yuʼun Marcos xchiʼuk ta kapitulo 21 yuʼun Lucas.)

^ par. 14 Mi cha kʼanbe to mas yaʼyejal ta sventa li albil kʼop laj yal Jesuse, kʼelo li livro ¿Kʼusi chchanubtasvan ta melel li Vivliae? Ta kapitulo 9, ti pasbil yuʼun yajrextikotak Jeovae.