Kʼelo li kʼusi yichʼoje

Batan ta saʼobil

 XCHANOBIL 21

Chchaʼkuxi li Jesuse

Chchaʼkuxi li Jesuse

Chakʼ sba ta ilel ta stojolal yajtsʼaklomtak Jesús sventa tstsatsubtasbe yoʼonton xchiʼuk sventa chakʼbe achʼ mantaletik

KʼALAL oxib xaʼox kʼakʼal slajel li Cristoe, oy jayibuk antsetik yajtsʼaklomtak bat skʼelbeik smukinal, pe jamal la staik. Oy buchʼu la slokʼesbe li smake xchiʼuk xokol li mukinale.

Vaʼun te ivinaj chaʼvoʼ anjeletik. Xi laj yal june: «Jaʼ chasaʼic li Jesús liquem tal ta Nazarete [...]. Pero ichaʼcuxi xa» (Marcos 16:6). Li antsetike ta anil noʼox bat yalbeik li yajtakboltak Jesuse. Te la snupik ta be li Jesuse, xi albatike: «Mu xa xaxiʼic. Bat albeic jchiʼiltac ti acʼo baticuc ta Galileae. Te ta xcʼot yilicun» (Mateo 28:10).

Ta tsʼakale, kʼalal yakal chanavik batel chaʼvoʼ yajtsʼaklomtak ti lokʼik batel ta Jerusalén sventa chbatik ta Emause, nopaj ta stojolalik jun vinik ti mu xojtikinike xchiʼuk jakʼbatik kʼusi yakal tsloʼiltaik. Jaʼ stuk li Jesuse, pe muʼyuk bu laj yojtikinik yuʼun jelel xa xvinaj. Chat yoʼonton laj yalik ti yakal chalbeik skʼoplal li Jesuse, vaʼun li vinike lik chapbatikuk skotol li kʼusi chal sKʼop Dios ta sventa li Mesiase. Ta melel, li Jesuse pas yuʼun skotol li albil kʼopetik ta sventa li Mesiase. * Kʼalal laj yakʼik venta ti jaʼ li Cristoe, ti jaʼ xa jun espiritue, isak chʼay batel.

Li chaʼvoʼ yajtsʼaklomtake sutik batel ta Jerusalén xchiʼuk bat skʼelik li yajtakboltake, ti te tsobolik ta jpʼej na ti makal stiʼe. Kʼalal yakal chchapik li kʼusi kʼot ta pasele, chʼayal to yoʼonton komik kʼalal te ivinaj li Jesuse. Xi la sjakʼe: «¿Cʼu yuʼun mu xachʼunic lec ti ta melel vuʼune?». Xchiʼuk xi to laj yal xtoke: «Jech onoʼox tsʼibabil ta scʼop Dios ti ta xichʼ vocol li Cristoe, xchiʼuc ti ta xchaʼcuxi ta yoxibal cʼacʼale» (Lucas 24:38, 46).

Kʼalal chaʼkuxi li Jesuse chaʼvinik to kʼakʼal liʼ oy ta Balumile, vaʼun laj yichʼ ilel jayibuk velta. Jun veltae, mas ta 500 krixchano laj yilik. Li ta kʼakʼal taje xuʼ van jaʼo laj yalbe yajtsʼaklomtak li mantal ti tsots skʼoplal liʼe: «Batanic me; bat pasic ta jchʼunolajel cuʼun li cristianoetic ta jujun banamile. [...] Chanubtasic lec ta xchʼunel scotol li jmantaltac laj calboxuc avaʼyique. Naʼic me, te jchiʼinojoxuc o scotol cʼacʼal cʼalal to ta slajebal cʼacʼal» (Mateo 28:19, 20).

Li ta slajeb velta la stsob sbaik xchiʼuk li buluchvoʼ tukʼil yajtakboltake, xi laj yale: «Cʼalal me laj avichʼic li Chʼul Espiritue, chavichʼic avuʼel atsatsalic. Jech voʼoxuc chavalic batel [...] ta sbejel banamil li cʼusi laj avilic ta jventae» (Hechos 1:8). Vaʼun lik muyuk batel ta vinajel xchiʼuk te sak chʼay batel ta tok.

(Lokʼem ta kapitulo 28 yuʼun Mateo, ta kapitulo 16 yuʼun Marcos, ta kapitulo 24 yuʼun Lucas, ta kapitulo 20 xchiʼuk 21 yuʼun Juan xchiʼuk ta 1 Corintios 15:5, 6.)

^ par. 6 Cha tabe mas skʼelobiltak albil kʼopetik ti kʼot ta pasel yuʼun Jesús ta xchanobil 14, 15 xchiʼuk 16 li ta foyeto liʼe, xchiʼuk li ta apendise «Jesucristo, li Mesías ti albil onoʼox skʼoplale» li ta livro ¿Kʼusi chchanubtasvan ta melel li Vivliae?