Kʼelo li kʼusi yichʼoje

Sventa xasut ta xchibal pajina

Batan ta saʼobil

Stestigotak Jeova

tsotsil

Jlivro ti chal loʼiletik ta Vivliae

 LOʼIL 69

Li uni tsebe la skolta jun bankilal soltaro

Li uni tsebe la skolta jun bankilal soltaro

¿MI XA naʼ kʼusi yakal ta xalbe ants li uni tseb liʼe? Yakal ta xalbe skʼoplal Eliseo li yajchʼul alkʼop Jeovae xchiʼuk li kʼusi labal sba ch-akʼbat spas yuʼun Jeovae. Li antse mu xojtikin Jeova, yuʼun maʼuk j-israelal ants. Jaʼ yuʼun, jkʼeltikik kʼu yuʼun te oy ta sna ants li uni tsebe.

Li antse jaʼ jsiriail ants. Li smalale jaʼ sbi Naamán, jaʼ bankilal soltaro ta Siria. Li jsirioetike la xchukik tal li uni j-israelal tsebe, vaʼun te xa mosovinbil yuʼun li yajnil Naamane.

Li Naamane tsakbil ta chopol chamel, jaʼ sbi kʼaʼemal chamel. Li chamel taje xuʼ ta xjepolaj yalel yuʼun jbekʼtaltik. Li uni tseb ne xi yakal ta xale: Mi chbat ta stojolal jchʼul alkʼop yuʼun Jeova te ta Israel li amalale, xuʼ chkol, xi. Ta mas tsʼakal kʼot ta xchikin smalal li antse.

Li Naamane tskʼan chkol; jech oxal la snop chbat ta Israel. Kʼalaluk kʼote, bat ta sna Eliseo. Li Eliseoe la stak lokʼel yajtunel sventa akʼo yalbe Naamán ti akʼo spok sba vukub velta ta ukʼum Jordane. Li Naamane ilin ta jyalel, jech la jyal: ¡Li ukʼumetik ta jlumale mas toj lekik, jaʼ jutuk noʼox li ukʼumetik ta Israele!, xi. Kʼalaluk jech la jyale, ibat.

Pe li yajtuneltake xi la jyale: Ajvalil, ti oyuk kʼusi mas tsots la jyalbot xa spas li Eliseoe, cha pas. ¿Kʼu yuʼun muʼyuk cha pas ti jaʼ noʼox la jyalbot ti akʼo xa pok abae?, xi. Li Naamane la xchikinta li kʼusi chal li yajtuneltake, vaʼun la smul sba yalel vukub velta li ta ukʼum Jordane. ¡Kʼalaluk jech la spase, toj lek kom li sbekʼtale!

Xmuyubaj ta jyalel li Naamane. Sut batel ti bu oy li Eliseoe, xi la jyalbee: Tana liʼe jnaʼoj ti Dios yuʼun Israele, jaʼ noʼox stuk Dios ta spʼejel Balumil. Jaʼ yuʼun, avokoluk, tsako li matanal liʼe, xut. Pe li Eliseoe xi la stakʼe: Moʼoj, muʼyuk bu ta jtsak, xi. Li Eliseoe snaʼoj ti mu lekuk ti tstsak li matanale, yuʼun snaʼoj ti jaʼ Jeova li buchʼu la xpoxta Naamane. Pe Giezi li yajtunel Eliseoe tskʼan chuʼunin li matanale.

Jech oxal xi la spase. Kʼalaluk bat xaʼox li Naamane, li Giezie bat sta ta be ta anil. Li Eliseoe la stakun talel sventa xa kalbe ti xa vakʼbe la jlomuk li matanaletike yuʼun naka to vul yajvulaʼaltak, xi. Taje tsjut. Pe li Naamane mu snaʼ; jech la jyakʼbe Giezi jlomuk li kʼusitike.

Kʼalaluk sut tal li Giezie, li Eliseoe snaʼoj xa li kʼusi la spase. Yuʼun albat yuʼun Jeova. Jaʼ yuʼun xi la jyalbee: Ta skoj ti la apas li kʼusi chopole, li skʼaʼemal chamel Naamane chkʼot ta abekʼtal, xi. ¡Ta anil noʼox jech kʼot ta pasel!

¿Kʼusi stakʼ jchantik ta sventatak taje? Baʼyele, skʼan jchanbetik stalelal li uni tsebe, skʼan xkalbetik skʼoplal li Jeovae. Yuʼun liʼe xuʼ ta xjoybij ta lekilal. Ta xchibale, mu stakʼ jtoy jbatik kʼuchaʼal la spas toʼox li Naamane, jaʼ lek jchʼunbetik smantal li yajtuneltak Jeovae. Ta yoxibal ne, mu stakʼ jutik kʼop kʼuchaʼal la spas li Giezie. ¿Mi mu jechuk ti toj ep kʼusi xuʼ jchantik li ta Vivliae?

2 Reyes 5:1-27.