Kʼelo li kʼusi yichʼoje

Batan ta saʼobil

 LOʼIL 75

Chanvoʼ keremetik ta Babilonia

Chanvoʼ keremetik ta Babilonia

LI AJVALIL Nabucodonosore la jyikʼ batel ta Babilonia li j-israeletik mas chanemike. Ta mas tsʼakal, li ajvalile la stʼuj ti bu toj kʼupilik sba xchiʼuk ti bu toj lek pʼijik ta skotol li j-israeletike. Liʼ cha vil chanvoʼike. Li june jaʼ Daniel, li yantike Sadrac, Mesac xchiʼuk Abed-nego akʼbat sbiik yuʼun li jbabiloniaetike.

Li Nabucodonosore tskʼan chchanubtasan sventa chakʼ tunuk ta sna. Kʼalal mi lokʼ oxib jabil xchanubtaselike ta stʼuj li buchʼutik mas pʼijike sventa ta xkoltaat ta xchapanel kʼopetik. Tskʼan ti akʼo lek tsotsikuk xchiʼuk ti mu x-ipaj li keremetike, jech oxal la jyal mantal ti akʼo jechuk x-akʼbatik sveʼel xchiʼuk yuchʼbolik kʼuchaʼal ch-akʼbat li stuk xchiʼuk li yutsʼ yalale.

Kʼelavil li kerem Daniele. ¿Mi xa naʼ kʼusi yakal ta xalbe li bankilal yaj-abtel Nabucodonosor ti jaʼ sbi Aspenaze? Yakal ta xalbe ti mu skʼan slajes li smuil veʼel ajvalile. Pe li Aspenaze lik svul yoʼonton. Xi la jyale: Li ajvalile yaloj li kʼusi skʼan xa lajesike xchiʼuk li kʼusi skʼan xa vuchʼike. Mi sakpakʼanoxuk noʼox ta ilele, mi mu xkoʼolaj alekilik kʼuchaʼal li yan keremetike, xuʼ ta smilun, xi.

Li Aspenaze la svaʼan jun jchabivanej ta sventa Daniel xchiʼuk li oxvoʼ yamigotake. Li Daniele la skʼopon li jchabivanej taje, xi la jyalbee: Pasokik preva lajunebuk kʼakʼal ta jtojolalkutik. Akʼbun jlajeskutik kʼusitik chchʼi ta balumil xchiʼuk voʼ noʼox xa vakʼ kuchʼkutik. Vaʼun xa koʼoltasunkutik xchiʼuk li yantik keremetik ti tslajesbeik sveʼel li ajvalile, jech te cha vakʼ venta ti buchʼu mas leke, xi.

Li jchabivaneje lek la jyaʼi. Kʼalaluk lokʼ lajuneb kʼakʼale, li Daniel xchiʼuk li oxvoʼ yamigotake mas toj lekik, jaʼ jutuk noʼox li yantik keremetike, jech oxal akʼbat-o slajesik li kʼusitik tsʼunbil ta balumile, jaʼ muʼyuk la slajesik li sveʼel ajvalile.

Kʼalaluk lokʼ oxib jabile, skotol li keremetike la jyichʼik ikʼel batel ta stojolal Nabucodonosor. Kʼalal laj xchiʼinan ta loʼile, li ajvalile la jyil ti jaʼ mas pʼij li Daniel xchiʼuk li oxvoʼ yamigotake. Jaʼ yuʼun, la jyakʼ ti akʼo te xkoltavanik ta snae. Kʼalaluk li Nabucodonosor chbat ta stojolal Daniel, Sadrac, Mesac xchiʼuk Abed-nego sventa oy kʼusi tsjakʼbee o sventa chakʼbe xchapan kʼopetike, chvinaj ti lajuneb to velta xjelav spʼijilike, ti jaʼ xkom to spʼijil li paleetike o li spʼijil sviniktake.