Kʼelo li kʼusi yichʼoje

Batan ta saʼobil

 LOʼIL 53

Li kʼusi la jyal ta melel tspas li Jeftee

Li kʼusi la jyal ta melel tspas li Jeftee

¿MI OY junuk velta oy kʼusi avaloj ta melel ti vokol la avaʼi ta spasele? Jaʼ jech kʼot ta pasel ta stojolal li vinik te chvinaj ta lokʼole, jech oxal ta xat yoʼonton. Jaʼ Jefté, jun jchapanvanej ta Israel ti tsots yoʼontone.

Li Jeftee jaʼo kuxi kʼalaluk muʼyuk xaʼox ta smuyubtaik Jeova li j-israeletike. Yakal ta spasik yan velta li kʼusitik chopole. Jech oxal li Jeovae la jyakʼ ti akʼo akʼbatuk svokolik yuʼun li krixchanoetik ta Amone. Li j-israeletike la skʼanik koltael ta stojolal Jeova: La jsaʼ jmulkutik ta atojolal. ¡Koltaunkutik!, xiik.

Chopol ta xaʼi sbaik li krixchanoetik ta skoj li kʼusitik chopol spasojike. Taje la jyakʼik ta ilel kʼalaluk lik smuyubtaik yan velta li Jeovae. Jaʼ yuʼun koltaatik noxtok yuʼun ti Jeovae.

Li jteklume la stʼujik Jefté sventa tspas leto ta skontra li chopol j-amonetike. Ti Jeftee tskʼan tajek ti chkoltaat yuʼun Jeova li ta pas letoe. Jech oxal xi la jyalbe ta melel li Jeovae: Mi la koltaun li ta spasel letoe, ti buchʼu baʼyel chlokʼ tal ta jna sventa chtal snupun ta be kʼalal mi li sut tale jaʼ chkakʼ amotonin, xi.

Li Jeovae la jyaʼi li kʼusi la jyal ta melel li Jeftee, jech oxal la skolta li ta spasel letoe. Kʼalal sut tal ta sna li Jeftee, ¿mi xa naʼ buchʼu li baʼyel tal nupvanuk ta bee? Jaʼ li stseb ti stuk noʼox ta vokʼele. ¡Ay kuni tseb!, xi lik okʼuk li Jeftee! ¡Mu x-echʼ ti jvokol ta xkaʼi avuʼune! Yuʼun oy kʼusi kalojbe ta melel li Diose, tana liʼ ne skʼan xkʼot ta pasel kuʼun.

Kʼalaluk la jyaʼi stseb Jefté li kʼusi yaloj ta melel li stote, la jyat yoʼonton ta skoj ti chikta stot xchiʼuk li yamigotake. Te chtun-o ta stojolal Jeova te ta chʼulna pasbil ta nukul, te ch-echʼ yuʼun ti kʼu sjalil kuxule. Jaʼ yuʼun xi la jyalbe li Jeftee: Mi oy kʼusi avalojbe ta melel ti Jeovae, skʼan xa pas.

Jech oxal li stseb Jeftee bat ta Silo, te tun ta stojolal Jeova te ta chʼulna pasbil ta nukul, te echʼ yuʼun ti kʼu sjalil kuxule. Li antsetik ta Israele chkʼot tskʼelik chanib kʼakʼal ta jabil, lek xmuyubaj ch-echʼ yuʼunik kʼakʼal. Li stseb Jeftee kʼanbil yuʼun li krixchanoetike, yuʼun toj lek jtunel tseb ta stojolal li sDiose, li Jeovae.

Jueces 10:6-18; 11:1-40.