Kʼelo li kʼusi yichʼoje

Sventa xasut ta xchibal pajina

Batan ta saʼobil

Stestigotak Jeova

tsotsil

Jlivro ti chal loʼiletik ta Vivliae

 LOʼIL 42

Chkʼopoj jkot meʼ buro

Chkʼopoj jkot meʼ buro

¿MI OY avabinoj ti chkʼopoj jkot buroe? Muʼyuk, xa chi nan. Li chonetike mu snaʼ xkʼopojik. Pe li Vivliae ta xalbutik ti kʼopoj jkot meʼ buroe. Jkʼeltikik kʼuxi kʼot ta pasel taje.

Li j-israeletike jutuk xa skʼan x-ochik li ta yosilal Canaane. Balac, li ajvalil ta Moabe, ta xiʼta li j-israeletike. Jaʼ yuʼun, la jyal mantal ti akʼo xbat saʼik tal junuk vinik ti manya sjol ti jaʼ sbi Balaame, sventa chchopol kʼopta li j-israeletike. La jyal ti ep ta xakʼbe takʼine, jech oxal li Balaame muy ta smeʼ sburo, bat skʼel li Balaque.

Li Balaame chbat xchopol kʼoptabe slumal Jeova, pe li Jeovae mu skʼan jech taje. Jaʼ yuʼun, la stak batel jun anjel ti stsakoj batel jun snatil espada sventa chbat smak ta be li Balaame. Li Balaame mu xil li anjele, pe li smeʼ sburoe xil neʼ. Li meʼ buroe ta xnamaj lokʼel ta stojolal li anjele, la sluban sba yalel ta be. Ilin ta jyalel li Balaame, vaʼun lik sjisbe teʼ li smeʼ sburoe.

Ti Jeova ne la jyakʼbe yaʼi Balaam ti chkʼoponat yuʼun li smeʼ sburoe. ¿Kʼusi jpasojbot ti cha majune?, xi la sjakʼ li meʼ buroe.

La apʼisun ta bol vinik, xi li Balaame. ¡Ti oyuk j-espadae ta jmilot!

¿Mi oy onoʼox jech xa jpasbe?, xi la sjakʼ li meʼ buroe.

Muʼyuk un bi, xi li Balaame.

Ti Balaame akʼbat yil yuʼun Jeova li anjel te vaʼal ta be ti stsakoj yespadae. Li anjele xi la jyale: ¿Kʼu yuʼun la jis ta teʼ li smeʼ aburoe?, xi. Tal jmakot ta be, yuʼun mu xuʼ chbat achopol kʼopta li Israele, xi. Ti muʼyukuk la skʼej sba batel li smeʼ aburoe, la xa jmilot ti jechuke, pe jaʼ muʼyuk kʼusi la jpasbe li smeʼ aburo ti jechuke.

La jsaʼ jmul, xi li Balaame. Mu jnaʼ mi te vaʼalot ta be. Li anjele la jyakʼ batuk li Balaame, jech oxal li Balaame bat skʼel li Balaque. Li Balaame oy to ta yoʼonton chchopol kʼopta li Israele, pe li Jeovae la sjoybinbe ta oxib velta lekilal li skʼope.

Números 21:21-35; 22:1-40; 23:1-30; 24:1-25.