KʼELAVIL lek li mukʼta utsʼ-alalil liʼe. Jaʼ xlajchavoʼal xnichʼnabtak Jacob. La jyil stsebetak xtok. ¿Mi xa nabe sbi jlomuk li keremetike? Jchanbetik jlomuk.

Li Leae la jyil yalab, jaʼ Rubén, Simeón, Leví xchiʼuk Judá. Kʼalal li Raquel la jyakʼ venta ti mu x-alaje, la jyat tajek yoʼonton. Jaʼ yuʼun, ti Raquele la jyakʼ skiara, li Bilhae, sventa chchiʼin li Jacobe, li Bilha ne la jyil chaʼvoʼ yol Dan xchiʼuk Neftalí. Vaʼun ti Leae la jyakʼ skiara ek, jaʼ li Zilpae, ti Zilpae la jyil chaʼvoʼ yol, Gad xchiʼuk Aser. Ti Leae la to jyil chaʼvoʼ yol, jaʼ Isacar xchiʼuk Zabulón.

Vaʼun ti Raquel ne la jyil jun yol. José la jyakʼbe sbi. Ta tsʼakal ta jchantik mas ta sventa li Josee, yuʼun lek la jyichʼ ojtikinel. Liʼe jaʼ sbuluchibal xnichʼnab Jacob ti vokʼik kʼalal te toʼox nakalik xchiʼuk stot li Raquele.

Ti Jacobe la jyil stsebetak xtok, pe li Vivliae jaʼ noʼox ta xalbutik ta sventa jun stseb, ti jaʼ sbi Dinae.

Kʼot skʼakʼalil ti la snop Jacob ti chchʼak sba lokʼel ta stojolal li Labane xchiʼuk la snop tsut batel ta Canaán. Jech oxal la stsob li smukʼta utsʼ-alale, li s-epal chijtake xchiʼuk li jaytsop stsʼunob chontake, vaʼun lik stam batel sbe.

Mu toʼox sjaliluk skʼotelik ta Canaán ti Jacob xchiʼuk yutsʼ yalal ti kʼalal la jyil yan yol li Raquele. Liʼe jaʼo kʼot ta pasel kʼalal yakalik ta xanvile. Chopol kʼusi kʼot ta stojolal li Raquele, yuʼun cham kʼalal vokʼ li yole. Pe li uni neneʼe kuxul kom. Ti Jacobe Benjamín la jyakʼbe sbi.

Ta jkʼan ta jvules ta joltik sbi li xlajchavoʼal xnichʼnabtak Jacobe, yuʼun sjunul li steklumal Israele te lik tal ta stojolalik. Jech onoʼox, li xlajchavokʼal snitilulal Israele jaʼ yichʼojbe sbi li lajunvoʼ skerem Jacobe xchiʼuk chaʼvoʼ skerem José. Ti Isaaque ep to jabil kuxi ti kʼalal vokʼem xaʼox skotol li keremetik taje, xmuyubaj van tajek ti toj ep smomtake. Pe jkʼeltikik kʼusi kʼot ta stojolal li Dinae, li smom Isaaque.

Génesis 29:32-35; 30:1-26; 35:16-19; 37:35.