Kʼelo li kʼusi yichʼoje

Batan ta saʼobil

 XCHANOBIL 11

Mu xa chʼam li jecheʼ relijione

Mu xa chʼam li jecheʼ relijione

Satanas xchiʼuk spukujtake mu skʼanik ti cha tun yuʼun Dios. Tskʼanik tsnamajesik ta Dios kʼuuk yepal krixchanoetik. ¿Kʼuxi tspas taje? Jun yelan kʼuxi tspasike, jaʼ ta jecheʼ relijione (2 Corintios 11:13-15). Jun relijion mi mu xchanubtasvan li melel sventa li Bibliae, jaʼ jecheʼ. Li jecheʼ relijione jech kʼuchaʼal li jecheʼ takʼine, melel yileluk pe muʼyuk sbalil. Jech oxal, xuʼ cha yichʼbot tal ep kʼopetik.

Li jecheʼ relijione mu slekubtasbe yoʼonton ti Jeovae, ti Dios yuʼun li melele. Li jbabeetik ta jun relijione, tskʼanik ox tsmilik li Jesus kʼalal liʼ toʼox oy ta Balumile. Tsnopik ti kʼuyelan chmuyubtavanike jaʼox lek yalojik. Chalik: “Jun noʼox li jtotkutike, jaʼ li Diose”. Pe ¿mi jech la snop ti Jesuse? Moʼoj. Stuke la stakʼ: “Li voʼoxuke jaʼ atotik li pukuje [Yavlo, NM]” (Juan 8:41, 44). Tanae, ep krixchanoetik chchʼunik ti ta smuyubtaik ti Diose, pe ta melel chtunik ta Satanas xchiʼuk spukujtak (1 Corintios 10:20).

 Jech kʼuchaʼal jpets kʼaemal teʼ chopol tsatin, li jecheʼ relijione tspʼoles krixchanoetik ti tspasik kʼusitik chopole. Li lume nojem ta kʼopetik ta skoj li kʼusitik chopol tspasik li krixchanoetike. Oy muliletik ta viniketik xchiʼuk antsetik, majbailetik, elekʼetik, utsʼintael, milbailetik xchiʼuk tsatsal tsakvanejetik. Ep buchʼutik tspasik liʼe oy srelijionik, pe li relijion taje mu xnikesatik ta spasel li kʼusi leke. Mu xuʼ xamikoinik Dios, jaʼ to mi la yiktaik ta spasel li kʼusitik chopole (Mateo 7:17, 18).

Li jecheʼ relijione chchanubtas li krixchanoetik ti akʼo skʼoponik ta orasion li kʼusitik patbilike. Dios chal ti mu stakʼ kʼoponel ta orasion li kʼusitik patbilike. Liʼe oy srasonal. ¿Mi cha kʼupin ti oy buchʼu mu xa skʼoponot, pe jaʼ noʼox tskʼopon li alokʼobale? ¿Mi xuʼ van cha vamikoin li krixchano taje? Moʼoj, mu xuʼ. Jeova tskʼan ti jaʼ chkʼoponat yuʼun li krixchanoetike, mu skʼan ti chichʼ kʼoponel li kʼusi patbil mi jaʼuk lokʼoletik, ti muʼyuk xkuxlejalike (Éxodo 20:4, 5).

Li jecheʼ relijione chchanubtasvan ti stakʼ milel yan krixchanoetik kʼalal oy letoe. Jesus la yal ti yamikotak Diose tskʼan sbaik ta jujuntal. Mu jmiltik ti krixchanoetik jkʼanojtike (Juan 13:35). Mi jaʼuk lek ti ta jmiltik li chopol krixchanoetike. Kʼalal Jesus la yichʼ tsakele, muʼyuk la yakʼ spasik leto li stsʼaklomtak sventa la yichʼ pojel (Mateo 26:51, 52).

Li jecheʼ relijione chchanubtasvan li buchʼutik la chopolike, ta la xichʼ svokolik ta kʼatinbak. Pe li Bibliae chchanubtasvan li stojol mulile jaʼ ti chi jchamutike (Romanos 6:23). Jeova jaʼ jun Dios kʼanvanej. ¿Mi chakʼbe akʼo xil svokolik krixchanoetik sbatel osil jun Dios kʼanvanej? Ta melel moʼoj. Te ta Paraisoe, jun noʼox relijion chkom, li relijion ti chchʼam Jeovae (Apocalipsis 15:4). Skotol relijionetik ti chchanubtasvanik li sjutbil kʼop Satanase, chlaj skʼoplal.