Kʼelo li kʼusi yichʼoje

Sventa xasut ta xchibal pajina

Batan ta saʼobil

Stestigotak Jeova

tsotsil

Lajuntos kʼusitik tsjakʼbe sbaik li kerem tsebetike

 SJAKʼOBIL 6

¿Kʼuxi chkuch kuʼun ti mu jpas li kʼusi chal yantike?

¿Kʼuxi chkuch kuʼun ti mu jpas li kʼusi chal yantike?

¿KʼU YUʼUN TSOTS SKʼOPLAL?

Mi laj achan spakbel skʼoplal li kʼusi achʼunoje, voʼot me chapas ta mantal li akuxlejale maʼuk li yantike.

LI VOʼOTE, ¿KʼUSI VAN CHAPAS?

Nopo ta sventa liʼe: Li Briane xmichʼichʼet xa xchʼut kʼalal chil chnopaj xa tal chaʼvoʼ xchiʼiltak ta chanune. Li xemana avie, xchibal xa velta albat ti akʼo sikʼolaje. Yoxibal xa velta xchiʼuk liʼe.

Xi chal li june:

«Atuk chkil, tsako sventa mu xachʼajub».

Jaʼ to chile oy kʼusi la slokʼes ta xvorxail xvex, vaʼun la stsʼusati sventa xakʼbe li Briane.

Li Briane chil ti te stsakoj sikʼolal li kereme xchiʼuk mas to spotsotset li sbekʼtale.

«Moʼoj, kolaval, laj xa kalbot ti muʼyuk...».

Xi tuchʼbat tabe sloʼile: «¿Mi yuʼun chaxiʼ?».

Xiʼem tajek xi la stakʼ li Briane: «Yaʼ pe moʼoj».

Vaʼun, li kereme la smey xchiʼuk ta slekil yoʼonton xi laj yalbe yilele: «Tsako un, jaʼ noʼox jun uni sikʼolal».

Nopaj talel li jun xtoke, la snopajesbe mas li sikʼolale xchiʼuk kʼunkʼun xi laj yalbee: «Muʼyuk buchʼu chkalbekutik. Jaʼ noʼox voʼon jnaʼojkutik».

Ti voʼotuk li Briane, ¿kʼusi van chapas?

 NOPO ME LEK

¿Mi snaʼojik van xanaʼ li kʼusitik tspasik li xchiʼiltak Briane? ¿Mi snopoj van stukik li kʼusi tspasike? Xuʼ van ti moʼoje. Xuʼ van jaʼ noʼox jech tspasik ta skoj li kʼusi tspas yantike. Jaʼ noʼox van tskʼanik ti lekuk x-ilatike, jaʼ yuʼun chakʼ sbaik ti akʼo spasatik ta mantale.

Ti mi jech kʼot ta pasel ta atojolale, ¿kʼusi van yan xuʼ xapas sventa stsal avuʼun li sujele?

  1. CHAPANO ME ABA

    Xi chal li Vivliae: «Li bochʼo bije ta xil li cʼusi xiʼbal sbae, jech mu xbat sticʼ sba te; yan li bochʼo muc bijuque tsticʼ noʼox sba batel, jech te ta sta o vocol» (Proverbios 22:3).

    Ta onoʼox xkakʼtik venta mi oy kʼusi chopol chkʼot ta jtojolaltike. Nopo noʼox ti yakalot ta xanbale, jaʼ to chavile te tsobol keremetik ti tsikʼolajike. Mi laj anopbe skʼoplal li kʼusi la avile, mas me chapalot sventa stsal avuʼun li vokolil taje.

  2. NOPO

    Xi chal li Vivliae: «Lekuk-o me ajol avoʼontonik» (1 Pedro 3:16).

    Jakʼbo aba: «¿Kʼu van yelan chkaʼi jba mi jaʼ ta jpas li kʼusi tspas yantike?». Xuʼ van jaʼ jech lek chayiloxuk jun chibuk noʼox kʼakʼal li achiʼiltak ta chanune. Pe, ¿kʼu van yelan chavaʼi aba ta tsʼakal? ¿Mi anopoj lek ti chasokes li alekil talelal ta skoj noʼox ti chakʼan lek chiloxuk li achiʼiltak ta chanune? (Éxodo 23:2).

  3. TʼUJO

    Xi chal li Vivliae: «Li bochʼo bije ta xiʼ, jech ta svocʼ sba ta sventa li cʼusi chopole» (Proverbios 14:16).

    Oy onoʼox kʼusitik ta jpastik, ti jaʼ jech kʼot ta nopel kuʼuntike xchiʼuk ti xuʼ van xkil-o jvokoltik ta tsʼakale. Li Vivliae chalbe skʼoplal viniketik ti lek kʼusi kʼot ta nopel yuʼunike, jech kʼuchaʼal José, Job xchiʼuk Jesus, pe chalbe skʼoplal xtok viniketik ti mu lekuk kʼusi kʼot ta nopel yuʼunike, jech kʼuchaʼal Cain, Esau xchiʼuk Judas. ¿Kʼusi chapas li voʼote?

Xi chal li Vivliae: «Jʼechʼel tucʼ xavacʼ aba» (Salmo 37:3Ch). Mas me kʼun chavaʼi yalel ti kʼu yuʼun muʼyuk chapas, mi baʼyel chanop ti kʼusi xuʼ xkʼot ta atojolal, ta skoj li kʼusi kʼot ta nopel avuʼune,

Mu xavat avoʼonton, mu persauk xavalbe ep mantal li achiʼiltake. Jaʼ noʼox mi jamal laj aval ti moʼoje. Jech noxtok, skʼan me xaʼibeik lek smelolal ti muʼyuk chajel li kʼusi chanop kʼalal xi chavalbee:

  • «¡Mu xapat avoʼonton ta jtojolal!».

  • «¡Muʼyuk ta jpas!».

  • «Anaʼoj xa onoʼox li kʼusi ta jnope».

Li kʼusi tsots skʼoplale, jaʼ ti jtakʼtik ta anile xchiʼuk ti mu xijxiʼutik ta stakʼele. Mi jech laj apase, xuʼ van labal to sba chavil ti ta anil noʼox chayiktaik li buchʼu tsujot ta spasel li kʼusi chopole.

 ¿KʼUSI TA JPAS MI TSLABANIKUNE?

Mi laj avakʼ aba ta tsalel yuʼun li achiʼiltake, jaʼ me tspasoxuk ta mantal.

Xuʼ van tskʼan ti chakʼoxuk ta kʼexlal ta stojolal yantik li achiʼiltak ta chanune. Xuʼ van xi chalboxuke: «¿Kʼu yuʼun jelelote? ¿Mi yuʼun chaxiʼ?». Ti kʼu yelan tsokboxuk ajole, jaʼ jech tspasik kʼalal tskʼan tsujoxuke. ¿Kʼu van yelan xuʼ xatakʼav? Oy chaʼtos kʼusi xuʼ xapas:

  • Mu xatsak ta mukʼ. Xuʼ xi xavale: «Jech avaʼuk, yuʼun chixiʼ». Vaʼun albo jutuk srasonal kʼu yuʼun.

  • O xuʼ xi xapase. Albo smelolal kʼu yuʼun muʼyuk chapas jech, vaʼun xi xavale: «Jun pʼijil krixchano kʼuchaʼal voʼote mu sbutsʼ sikʼolal ti jechuke».

Mi tsokboxuk to ajole, mas lek batan. Vuleso me ta ajol mi jal to lakom tee, mas to me tsujoxuk. Kʼalal mi labate chavakʼ ta ilel ti voʼot chanop li kʼusi chakʼan chapase.

Ti jamal xkaltike: Oy onoʼox buchʼutik tsujvanik. Pe xuʼ voʼot xanop ti kʼu yelan atalelal chavakʼ ta ilele, ti jamaluk xavakʼ ta ilel li kʼusi chanope xchiʼuk ti mu xavakʼ aba ta tsalele. Yuʼun onoʼox voʼot chanop li kʼusi chapase (Josué 24:15).