1. ¿Mi ta xaʼi skotol orasionetik li Diose?

Li Diose chalbe skotol krixchanoetik ti xuʼ tskʼupinik li matanal ti xnopajik ta stojolal ta orasione (Salmo 65:2). Taje maʼuk skʼan xal ti chaʼi o chchʼam skotol orasionetik li Diose. Li Vivliae ta xal ti xuʼ «macal chcʼot ta be» s-orasion li jun vinik mi muʼyuk chichʼ ta mukʼ li yajnile (1 Pedro 3:7). Kʼalal nopolik noʼox tspasik kʼusitik chopol li j-israeletike, muʼyuk chikintabat s-orasionik yuʼun li Diose. Akʼo mi jech, chchikintabe s-orasion li buchʼutik spasojik toʼox tsatsal mulile, pe jaʼ noʼox mi tsutes yoʼontonik ta melele. Kʼelo Isaías 1:15; 55:7.

2. ¿Kʼu yelan skʼan jpastik li orasione?

Li spasel orasione te tsakal skʼoplal li yichʼel ta mukʼ Dios eke, jech oxal, jaʼ noʼox skʼan jkʼopontik ta orasion li Jeovae (Mateo 4:10; 6:9). Jech xtok, ta skoj ti jsaʼ mulilutike skʼan jpastik orasion ta sbi Jesús, yuʼun li stuke cham ta skoj jmultik (Juan 14:6). Li Jeovae muʼyuk lek chil mi jaʼ noʼox chkalilantik li kʼusi jkomesoj ta joltik o jtsʼibaojtik ta vun li orasion ta jpastike, moʼoj, yuʼun tskʼan ti ta koʼontontik chlokʼe. Kʼelo Mateo 6:7; Filipenses 4:6, 7.

Li Jpasvanej kuʼuntike chaʼi j-orasiontik akʼo mi ta koʼontontik noʼox ta jpastik (1 Samuel 1:12, 13). Jech xtok, chalbutik ti akʼo jpastik orasion skotol orae, jech kʼuchaʼal kʼalal tsakub, chmal kʼakʼal, yorail veʼel o jaʼo kʼalal ta jnuptantik vokoliletike. Kʼelo Salmo 55:22; Mateo 15:36.

3. ¿Kʼuxi tskoltautik li tsobajeletik yuʼun yajtsʼaklomtak Cristoe?

Nakalutik ta jun balumil ti noj ta krixchanoetik ti muʼyuk xchʼunojik Diose xchiʼuk mu xchʼunik mi chichʼ talel lekilal ta Balumile. Taje xuʼ xchibajesutik sventa mu xkakʼbetik yipal ti xijnopaj ta stojolale (2 Timoteo 3:1, 4; 2 Pedro 3: 3, 13). Jaʼ yuʼun skʼan jtsob jbatik xchiʼuk yan yajtsʼaklomtak Cristo sventa tspatbutik koʼontontik. Li stukike tskʼanik patbel yoʼontonik ek. Kʼelo Hebreos 10:24, 25.

Kʼalal ta jtsob jbatik xchiʼuk li buchʼutik skʼanojik li Diose mas me nopol chkaʼi jbatik ta stojolal. Li tsobajel yuʼun stestigotak Jeovae tskoltautik sventa jtabetik sbalil li xchʼunel yoʼonton yantike. Kʼelo Romanos 1:11, 12.

4. ¿Kʼuxi xuʼ xanopaj ta stojolal li Diose?

Sventa xanopaj ta stojolal li Diose skʼan xanopbe lek smelolal li kʼusitik achanoj xa ta Vivliae. Nopo ta sventa li kʼusitik spasoje, li tojobtaseletik yuʼune xchiʼuk li kʼusi yaloj tspase. Li snopbel lek smelolal xchiʼuk li spasel orasione tskoltaot sventa xavaʼibe smelolal kʼu to yepal chkʼanvan Dios xchiʼuk li spʼijile. Kʼelo Josué 1:8; Salmo 1:1-3.

Jaʼ noʼox xuʼ nopol oyot ta stojolal Dios mi oy xchʼunel avoʼonton xchiʼuk mi apatoj avoʼonton ta stojolale. Li xchʼunel oʼontonale xkoʼolaj xchiʼuk junuk kʼusi kuxul ti nopolik noʼox skʼan makʼlinele, taje jaʼ noʼox xuʼ xichʼ tael mi ta jnopbetik lek skʼoplal li kʼusitik jchʼunojtike. Kʼelo Mateo 4:4; Hebreos 11:1, 6.

5. ¿Kʼusi sbalil ta jtabetik mi chijnopajutik ta stojolal Diose?

Li Jeovae oy ta yoʼonton li buchʼutik chtun ta stojolale. Jech xtok, chchabi sventa mu kʼusi xibal sba xkʼot ta sventa li xchʼunel yoʼontonik xchiʼuk li spatobil yoʼontonik sventa kuxlejal sbatel osile (Salmo 91:1, 2, 7-10). Tspʼijubtasutik ta sventa li kʼusitik ti xuʼ xij-ipaj-o yuʼune xchiʼuk li kʼusi muʼyuk chijmuyubaj-o yuʼune. Chalbutik xtok kʼuxi xuʼ lek xijkuxiutik. Kʼelo Salmo 73:27, 28; Santiago 4:4, 8.