Kʼelo li kʼusi yichʼoje

Batan ta saʼobil

 XCHANOBIL 11

¿Kʼuxi tskoltautik li beiltaseletik ta Vivliae?

¿Kʼuxi tskoltautik li beiltaseletik ta Vivliae?

1. ¿Kʼu yuʼun chtun kuʼuntik beiltasel?

¿Kʼuxi tskoltautik li beiltaseletik ta Vivlia sventa oyuk jpʼijiltik jchabi li jkuxlejaltike? (SALMO 36:9)

Li Jeovae jaʼ Jtotik xchiʼuk Jpasvanej kuʼuntik, jaʼ noʼox stuk toj ep spʼijil. Jech xtok, skʼanojutik xchiʼuk oyutik ta yoʼonton. Muʼyuk la spasutik sventa ta jventain jba jtuktik (Jeremías 10:23). Jech kʼuchaʼal li ololetike tskʼanik beiltasel yuʼun stot smeʼike, li voʼotik eke chtun kuʼuntik li beiltasel yuʼun Diose (Isaías 48:17, 18). Li beiltaseletik oy ta Vivliae jaʼ jun matanal yakʼojbutik li Diose. Kʼelo 2 Timoteo 3:16.

Li mantaletik xchiʼuk beiltaseletik yakʼoj Jeovae jaʼ sventa xchanubtasutik kʼuxi xuʼ jkʼupin li jkuxlejaltike xchiʼuk ti kʼuxi xuʼ jtatik bendisionetik ta sbatel osile. Ta skoj ti jaʼ Jpasvanej kuʼuntike skʼan ta sjunuluk koʼontontik jchʼamtik li beiltasel chakʼbutike. Kʼelo Salmo 19:7, 11; Apocalipsis 4:11.

2. ¿Kʼusi jaʼ li beiltaseletik ta Vivliae?

Li beiltaseletik ta Vivliae jaʼ li kʼusi chakʼ jnaʼtik kʼusi xuʼ jpastik kʼalal oy kʼusi ta jnuptan ta jkuxlejaltike. Pe li mantaletike jtos noʼox lek chal ti bu xuʼ xkakʼ ta jkuxlejaltike (Deuteronomio 22:8). Sventa xkaʼibetik smelolal kʼuxi xuʼ xkakʼ ta jkuxlejaltik junuk beiltasel ta Vivliae skʼan me jtunestik lek li jnopbentike (Proverbios 2:10-12). Jech kʼuchaʼal liʼe, li Vivliae chchanubtasvan ti jaʼ jun matanal yakʼoj Dios li kuxlejale. Li beiltasel taje tsots skʼoplal sventa sbeiltasutik ta kabteltik, ta jnatik xchiʼuk kʼalal oy bu chijbate yuʼun tsvules ta joltik ti skʼan jchabi jbatike. Kʼelo Hechos 17:28.

3. ¿Kʼusi chaʼtos beiltasel mas tsotsik skʼoplal?

Li Jesuse laj yal chaʼtos beiltasel ti tsotsik skʼoplale. Li baʼyele chakʼ ta ilel ti pasbilutik sventa xkojtikintik li Diose, ti akʼo jkʼantike xchiʼuk ti tukʼuk xijtun ta stojolale. Li beiltasel  taje skʼan jtsaktik ta venta ta skotol li kʼusi ta jnop ta jpastike (Proverbios 3:6). Li buchʼutik chakʼ ta xkuxlejalik li beiltasel taje chkʼotik ta yamigo Dios, tstaik melel muyubajel xchiʼuk kuxlejal sbatel osil. Kʼelo Mateo 22:36-38.

Li xchibal beiltasele tskoltautik sventa lekuk xkil jbatik xchiʼuk li yantike (1 Corintios 13:4-7). Kʼalal chkakʼ ta jkuxlejaltike jaʼ ta jchanbetik stalelal Dios ti kʼuyelan chil li krixchanoetike. Kʼelo Mateo 7:12; 22:39, 40.

4. ¿Kʼuxi ta jtabetik sbalil li beiltaseletike?

Li beiltaseletik ta Vivliae chakʼ ti oyuk kʼanelal xchiʼuk ti jmojuk oy li utsʼ alalile (Colosenses 3:12-14). Maʼuk noʼox taje, li jun beiltasele chchabi li utsʼ alalile yuʼun chchanubtasvan ti jaʼ sventa sjunlej kuxlejal li nupunele. Kʼelo Génesis 2:24.

Xchʼunel li beiltaseletik ta Vivliae ta jtabetik sbalil xtok sventa li kʼusi chtun ta jkuxlejaltike xchiʼuk li kʼusitik oy ta koʼontontike. Epal yajval abteletike jaʼ tsaʼik j-abteletik ti yakʼoj ta xkuxlejalik li beiltaseletik ta Vivliae, ti mu snaʼ x-elkʼajike xchiʼuk ti chakʼ ta yoʼonton li yabtelike (Proverbios 10:4, 26; Hebreos 13:18). Jech xtok, li Skʼop Diose chchanubtasutik ti skʼan junuk koʼontontik mi oy noʼox li kʼusitik chtun kuʼuntike xchiʼuk ti jaʼ baʼyel xkakʼ ta jkuxlejaltik ti lek xkil jbatik xchiʼuk li Diose maʼuk li kʼulejale. Kʼelo Mateo 6:24, 25, 33; 1 Timoteo 6:8-10.

Li beiltaseletik ta Vivliae tskoltautik xtok sventa lekuk oy li jbekʼtaltike, jun skʼelobile jaʼ li kʼusi chal smantal Dios ta sventa li yakubele, yuʼun chchabiutik sventa mu stsakutik chamel xchiʼuk ti mu kʼusi xibal sba xkʼot ta jtojolaltike (Proverbios 14:30; 22:24, 25; 23:20). Melel onoʼox ti Jeovae muʼyuk chopol chil mi oy noʼox smelolal kʼuyepal chichʼ uchʼel li poxe (Salmo 104:15; 1 Corintios 6:10). Li beiltaseletik ta Vivliae ta jtabetik sbalil, yuʼun tstij koʼontontik sventa jkʼeltik kʼuyelan jtalelaltik xchiʼuk li jnopbentike (Salmo 119:97-100). Li melel yajtsʼaklomtak Cristoe maʼuk noʼox ta jchʼunkutik li beiltaseletik ta skoj ti ta jtabekutik sbalil ta jkuxlejalkutike, moʼoj, yuʼun jaʼ sventa x-ichʼat-o ta mukʼ li Jtotik ta vinajele, li Jeovae. Kʼelo Mateo 5:14-16.