Kʼelo li kʼusi yichʼoje

Sventa xasut ta xchibal pajina

Batan ta saʼobil

Stestigotak Jeova

tsotsil

Lekil aʼyejetik yakʼoj Dios

 XCHANOBIL 15

¿Kʼu yuʼun skʼan chachan-o batel li Vivliae?

¿Kʼu yuʼun skʼan chachan-o batel li Vivliae?

1. ¿Kʼusi sbalil chatabe mi muʼyuk la avikta xchanel li Vivliae?

Ta melel, koliyal ti laj xa achan li kʼusitik baʼyel skʼan chanel ta Skʼop Diose mas xa lik akʼan li Jeovae. Jaʼ yuʼun, skʼan me xachʼies-o batel li kʼanelal taje (1 Pedro 2:2). Mi la achanilan-o batel li Vivliae mas me chanopaj ta stojolal li Diose, vaʼun xuʼ chakuxi sbatel osil. Kʼelo Juan 17:3; Judas 21.

Mi mas la achan batel ta sventa li Diose, ta me stsatsub li xchʼunel avoʼontone xchiʼuk chamuyubtabe yoʼonton li Diose (Hebreos 11:1, 6). Li xchʼunel koʼontontike jaʼ chakʼ ti akʼo jsutes li koʼontontike xchiʼuk ti oy kʼusitik xuʼ jel ta jkuxlejaltike. Kʼelo Hechos 3:19.

2. ¿Kʼuxi xuʼ xakolta li yantike?

Xuʼ me xakʼupin ti lek chavil abaik xchiʼuk li Jeovae

Xuʼ van oy ta avoʼonton yalbel yan krixchanoetik li kʼusi laj xa achane, yuʼun lek xkaʼitik yalel li lekil aʼyejetike. Mi la avojtikin batel mas li kʼusi chchanubtasvan li Vivliae, ta me xachan stunesel Vivlia sventa chaval ta sventa Jeova xchiʼuk li lekil aʼyejetik ta sventa li krixchanoetike. Kʼelo Romanos 10:13-15.

Xuʼ van xlik avalbe avutsʼ avalaltak xchiʼuk avamigotak. Pe ichʼvanan me ta mukʼ xchiʼuk ta slekiluk me avoʼonton xavalbe. Jaʼ albo li kʼusi yaloj tspas Diose, maʼuk xavalbe ti muʼyuk lek li kʼusi xchʼunojike. Vuleso ta ajol ti jaʼ mas chkʼot ta yoʼontonik ti kʼuyelan chavakʼ ta ilel atalelale. Kʼelo 2 Timoteo 2:24, 25.

3. ¿Kʼu van yelan xuʼ xavil abaik xchiʼuk li Diose?

Mas me chachʼi ta mantal xchiʼuk mas me lek chavil abaik xchiʼuk Jeova mi la achan batel li Vivliae. Li voʼote xuʼ me xakʼot ta yutsʼ yalal li Diose. Kʼelo 2 Corintios 6:18.

 4. ¿Kʼusi tskoltaot sventa xachʼi-o batel li ta mantale?

Mu me xavikta xchanel li Skʼop Diose (Hebreos 5:13, 14). Kʼanbo junuk stestigo Jeova sventa xayakʼbot chanubtasel ta Vivlia xchiʼuk li livro ¿Kʼusi chchanubtasvan ta melel li Vivliae? Mi mas la achan batele, mas me chamuyubaj. Kʼelo Salmo 1:1-3; 73:27, 28.

Vuleso ta ajol ti likem tal ta stojolal Jeova li lekil aʼyejetik chal Vivliae, li Dios ti xmuyubaj noʼoxe. Mi chakʼan nopol oyot ta stojolale skʼan me xatsob aba xchiʼuk li tukʼil yajtuneltake (Hebreos 10:24, 25). Mi chavakʼ persa spasbel kʼusi tskʼan yoʼonton li Jeovae, ta me xata li melel kuxlejale: li kuxlejal sbatel osile. Ta melel, li kʼusi mas lek xuʼ xapase jaʼ ti xanopaj ta stojolal li Jeovae. Kʼelo 1 Timoteo 1:11; 6:19.