Kʼelo li kʼusi yichʼoje

Sventa xasut ta xchibal pajina

Batan ta saʼobil

Stestigotak Jeova

tsotsil

Lekil aʼyejetik yakʼoj Dios

 XCHANOBIL 10

¿Kʼuxi ta ojtikinel li melel relijione?

¿Kʼuxi ta ojtikinel li melel relijione?

1. ¿Mi jun noʼox melel relijion oy?

«Qʼuelo me abaic ta sventa li jloʼlavanej jʼalcʼopetique.» (MATEO 7:15)

Li Jesús xchiʼuk yajtsʼaklomtake jun noʼox melel relijion laj yakʼik ta chanel, taje la skoʼoltas ta jun be ti ch-ikʼvan batel ta kuxlejal sbatel osile, pe laj yal ti jutuk noʼox li buchʼu tstaike (Mateo 7:14). Li Diose jaʼ noʼox chchʼam li melel muyubtael ti te lokʼem ta Skʼope, li Vivliae. Li buchʼutik tsmuyubtaik jech kʼuchaʼal chal li Skʼope jmoj xchʼunel yoʼontonik. Kʼelo Juan 4:23, 24; 14:6; Efesios 4:4, 5.

2. ¿Kʼusi laj yal Jesús ta stojolal li jecheʼ yajtsʼaklomtak Cristoe?

«Chalic ti xotquinic Diose pero ta sventa cʼusitic tspasic chvinaj ti mu meleluque.» (TITO 1:16)

Li Jesuse laj onoʼox yal ti chlik jecheʼ j-alkʼopetik ti tsokesik li jchʼunolajeletik yuʼun Cristoe. Li jnitvanejetik ta relijion xchiʼuk li xchiʼiltakike tskuy sbaik ta yajtsʼaklomtak Cristo. Akʼo mi chalik ti jaʼ melel li kʼusi chchanubtasvanike, pe jaʼ noʼox tsloʼlaik li krixchanoetike. Ta melel, li voʼotike xuʼ xkojtikintik li melel relijione, yuʼun li buchʼutik te oyik ta melel relijione jamal xvinaj ta stalelalik. Kʼelo Mateo 7:13-23.

3. ¿Buchʼutik jech tspasik kʼuchaʼal chchanubtasvan li melel relijione?

Jkʼeltik voʼtosuk kʼusitik chakʼ kojtikintik:

  • Skʼop Dios chilik li Vivliae. Maʼuk chichʼik ta mukʼ li kʼusitik chchanubtasvan krixchanoetike, jaʼ oy ta yoʼontonik xchʼunel li beiltaseletik ta Vivliae (Mateo 15: 7-9). Jech xtok, li kʼusi chalik ta cholmantale chakʼ ta xkuxlejalik. Kʼelo Juan 17:17; 2 Timoteo 3:16, 17.

  • Chichʼik ta mukʼ sbi Dios ti jaʼ Jeovae. Li Jesús eke, jech la spas kʼalal laj yakʼ ta ojtikinel li sbi Stote. Li Jesuse laj yalbe krixchanoetik sventa li Jeovae xchiʼuk la xchanubtasan ti akʼo skʼanik ta orasion ti xichʼ chʼultajesbel li sbi Diose (Mateo 6:9). ¿Kʼusi relijional chakʼ ta ojtikinel sbi Dios ti bu nakalote? Kʼelo Éxodo 3:14, Ch, tsʼib ta yok vun; Juan 17:26.

  • Chalbeik skʼoplal li Ajvalilal yuʼun Diose. Kʼalal take tal ta Balumil li Jesuse jaʼ sventa tal yal lekil aʼyejetik sventa li Ajvalilal yuʼun Diose, ti jaʼ noʼox te tsta spatobil yoʼonton li krixchanoetike. Jaʼ jech la spas-o kʼalal jutuk xaʼox skʼan xchame (Lucas 4:43; 8:1; 23:42, 43). Li Jesuse laj yal ti chalbeik batel skʼoplal Ajvalilal yuʼun Dios ek li yajtsʼaklomtake. Ti mi oy buchʼu kʼot yalbot ta sventa li Ajvalilal yuʼun Diose, ¿kʼusi van relijional xanaʼ? Kʼelo Mateo 24:14.

  • Maʼukik xa sventa li chopol balumil liʼe. Li yajtsʼaklomtak Jesuse muʼyuk tskap sbaik ta politika, mi jaʼuk tstikʼ sbaik kʼalal tsaʼik kʼop li krixchanoetike (Juan 17:16; 18:36). Jech xtok, muʼyuk chchanbeik stalelal xchiʼuk muʼyuk tspasik li kʼusitik chakʼ vokolil ta balumile. Kʼelo Santiago 4:4.

  • Jamal xvinaj ti skʼanoj sbaike. Chanubtasbilik yuʼun Skʼop Dios ti skʼan xichʼik ta mukʼ skotol krixchanoetike, manchuk mi jelel stsʼunbalik. Li jecheʼ relijionetike nopolik noʼox chkoltavanik ta paskʼopetik, pe li melel yajtsʼaklomtak Cristoe mu jechuk tspasik (Miqueas 4:1-3). Jech xtok, muʼyuk kʼusi smalaoj ch-akʼbatik ti yakʼoj yipik xchiʼuk ti skoltaik ta kʼusitik oy yuʼunik xchiʼuk spatbel yoʼonton li xchiʼiltakike. Kʼelo Juan 13:34, 35; 1 Juan 4:20.

4. ¿Kʼuxi xuʼ xanaʼ bu jaʼ li melel relijione?

¿Kʼusi relijional ti ta Vivlia tslokʼes skotol li kʼusitik chchanubtasvane, ti chichʼbe ta mukʼ sbi Diose xchiʼuk ti chalbe skʼoplal ti jaʼ noʼox spatobil yoʼonton krixchanoetik li Ajvalilal yuʼun Diose? ¿Bu junukal relijion skʼanoj sbaik ta melel xchiʼuk ti muʼyuk tstikʼ sbaik ta paskʼopetike? ¿Kʼusi chanop li voʼote? Kʼelo 1 Juan 3:10-12.