Kʼelo li kʼusi yichʼoje

Sventa xasut ta xchibal pajina

Batan ta saʼobil

Stestigotak Jeova

tsotsil

Lekil aʼyejetik yakʼoj Dios

 XCHANOBIL 8

¿Kʼu yuʼun yakʼoj to oyuk choplejal xchiʼuk vokolil li Diose?

¿Kʼu yuʼun yakʼoj to oyuk choplejal xchiʼuk vokolil li Diose?

1. ¿Kʼuxi lik li choplejale?

Li kʼu sjalil yakʼoj ajvalilajuk krixchanoetik li Diose, jamal xvinaj ti mu smeltsaj yuʼunik li kʼopetike

Li choplejale jaʼ te lik kʼalal laj yal baʼyel jutbilkʼop ta Balumil li Satanase. Li stuke jaʼ toʼox jun lekil xchiʼuk tukʼil anjel, pe muʼyuk la «scʼan o li cʼusi melele» (Juan 8:44). Kʼunkʼun laj yakʼ yibel ta yoʼonton ti jaʼuk akʼo yichʼ ichʼel ta mukʼe, akʼo mi jaʼ noʼox sta-o ichʼel ta mukʼ li Jpasvaneje. Li Satanase la sloʼla Eva ta jun jutbilkʼop sventa mu xchʼunbe smantal Dios ti jaʼuk akʼo xchʼunbat smantal li stuke. Kʼalal muʼyuk la xchʼunbe smantal Dios li Evae, li Adane la skoʼoltas sjol xchiʼuk li yajnile. Ta skoj taje jaʼ te lik tal li vokolil xchiʼuk li lajelale. Kʼelo Génesis 3:1-6, 19.

Li Satanase la slikes jun toybail kʼalal laj yalbe Eva ti akʼo mu xchʼunbe smantal Diose. Muʼyuk laj yichʼ ta mukʼ li mukʼul pasmantal yuʼune o li sderecho sventa ch-ajvalilaj li Jeova ti stuk noʼox toj Toyole. Jutuk mu skotoluk li krixchanoetike yakʼoj sbaik ta stojolal Diablo, spʼajojik li kʼuyelan tspas mantal Diose, jaʼ yuʼun li Satanase kʼotem ta «jpasmantal liʼ ta banamile». Kʼelo Juan 14:30; 1 Juan 5:19.

2. ¿Mi oy onoʼox xchopolil li spasbentak Diose?

Li spasbentak Jeovae lek tukʼ skotol. Li baʼyel krixchanoetik xchiʼuk li anjeletike xchʼun toʼox yuʼunik skotol li smantaltak Diose (Deuteronomio 32:4, 5). Li Diose la spasutik sventa xuʼ jtʼujtik mi jaʼ ta jpastik li kʼusi leke o mi jaʼ li kʼusi chopole. Ti jech chakʼ jtʼujtike jaʼ sventa xuʼ xkakʼbetik ta ilel ti ta jchʼunbetik smantal ta skoj ti jkʼanojtike. Kʼelo Santiago 1:13-15; 1 Juan 5:3.

3. ¿Kʼu yuʼun yakʼoj to oyuk vokolil li Diose?

Li Jeovae tsʼikem to yuʼun li toybail ta sventa li mukʼul pasmantal yuʼune, pe oy noʼox me kʼu sjalil. ¿Kʼu yuʼun ti stsʼikoj toe? Jaʼ sventa chakʼ ta ilel ti mu junuk ajvalil xuʼ  chakʼbe slekilal krixchanoetik mi muʼyuk tsaʼik koltael ta stojolale (Eclesiastés 7:29; 8:9). Li vakmil jabil echʼem tal kuxlejale jamal xvinaj ti muʼyuk juʼem yuʼunik slajesel kʼusitik muʼyuk tukʼ, milbail, paskʼopetik xchiʼuk chameletik li jbeiltasvanej krixchanoetike. Kʼelo Jeremías 10:23; Romanos 9:17.

Pe mi laj kakʼ jbatik ta ventainel yuʼun Diose, ta jtabetik sbalil (Isaías 48:17, 18). Li Jeovae poʼot xa tslajes li ajvalil krixchanoetike. Jaʼ noʼox chkuxiik ta Balumil li buchʼu chakʼ sbaik ta stojolal li ajvalilal yuʼune (Isaías 11:9). Kʼelo Daniel 2:44.

4. ¿Kʼusi sbalil xuʼ jtatik ti oy smalael yuʼun li Diose?

Li Satanase laj yal ti jaʼ noʼox la chtunik ta stojolal Dios li krixchanoetik kʼalal oy kʼusi ch-akʼbatike. Koliyal ti oy smalael yuʼun li Diose, jkotoltik xuʼ xkakʼtik ta ilel ta jkuxlejaltik ti jaʼ jun jutkʼop li Satanase xchiʼuk ti jaʼ ta xkakʼ jbatik ta stojolal li ajvalilal yuʼun Diose, maʼuk ta stojolal li ajvalilal yuʼun krixchanoetike. Kʼelo Job 1:8-12; Proverbios 27:11.

5. ¿Kʼuxi xuʼ xkakʼ jbatik ta stojolal li Diose?

Li kʼusi ta jnop ta jpastike, jaʼ te chkakʼtik ta ilel mi ta jkʼantik tsventainutik li Diose o mi moʼoj

Baʼyele, skʼan jnaʼtik kʼuyelan skʼan ichʼel ta mukʼ li Diose xchiʼuk xkakʼ ta jkuxlejaltik li chanubtaseletik ta melel relijion ti ta Vivlia lokʼemike (Juan 4:23). Jech xtok, mi ta jchanbetik stalelal Jesús ti muʼyuk ta jtikʼ jbatik ta politika xchiʼuk li ta paskʼopetike, jaʼ jech ta jpʼajtik li ajvalilal yuʼun Satanase. Kʼelo Juan 17:14.

Li Satanase tstunes sjuʼel sventa akʼo spasik kʼusitik chopol xchiʼuk mulivajel li krixchanoetike. Kʼalal muʼyuk bu ta jpastik li kʼusitik chopole, xuʼ van xnaʼlevanik li kamigotik xchiʼuk li kutsʼ kalaltike o xuʼ chakʼ jvokoltik xtok (1 Pedro 4:3, 4). Mi jech kʼot ta jtojolaltike, jaʼ mas lek ti jaʼ jchiʼintik li buchʼutik skʼanojik Diose xchiʼuk kakʼ ta jkuxlejaltik li spʼijil mantaltake. Taje, jaʼ jech chkakʼtik ta ilel ti la sjutkʼop Satanás kʼalal laj yal ti chʼabal buchʼu chchʼunbe smantal Dios kʼalal oy vokolile. Kʼelo 1 Corintios 6:9, 10; 15:33.

Li kʼanelal oy yuʼun ta jtojolaltik li Diose jaʼ spatobil koʼontontik ti tslajes vokolil xchiʼuk li choplejale. Li buchʼutik chchʼunik ti jech tspas li Diose, chakʼ sbaik ta stojolal, vaʼun chkuxiik sbatel osil ta Balumil. Kʼelo Juan 3:16.