Kʼelo li kʼusi yichʼoje

Batan ta saʼobil

 XCHANOBIL 13

¿Kʼusi chal Vivlia ti chkʼot ta stojolal li relijione?

¿Kʼusi chal Vivlia ti chkʼot ta stojolal li relijione?

1. ¿Mi lek skotol li relijionetike?

Li ta relijionetike oy krixchanoetik ti bikʼit chakʼ sbaike xchiʼuk ti oy ta yoʼontonik li kʼusi melele. Jaʼ me jun lekil aʼyej xtok ti oy ta yoʼonton xchiʼuk ti oy sbalil chil Dios li krixchanoetik taje. Kʼux ta alel, pe oy ep kʼusitik chopol spasojanik li buchʼutik oyik ta jun relijione (2 Corintios 4:3, 4; 11:13-15). Li notisiaetik ti chlokʼ ta television o ta radioe chalik ti oy jlom relijionetik ti te stikʼoj sbaik ta sventa terrorismo, tsmilik epal krixchanoetik, ta paskʼop xchiʼuk tsmajik o chchiʼinik ta vayel ololetik sventa chilbajinik. ¡Taje jaʼ jun vul oʼonton chaʼiik li buchʼutik xchʼunojik Diose! Kʼelo Mateo 24:3-5, 11, 12.

Li melel relijione yakal chichʼ ta mukʼ Jeova, pe li jecheʼ relijione chopol chil. Yuʼun li jecheʼ relijionetike jaʼ noʼox jutbil li kʼusitik chchanubtasvanik ta sventa li Diose xchiʼuk ta sventa ti kʼuyelan oy li animaetike, jech kʼuchaʼal yantik ti mu jechuk chchanubtasvan li Vivliae. Li Jeovae oy ta yoʼonton ti akʼo xojtikin krixchanoetik li kʼusi melel ta stojolale. Kʼelo Ezequiel 18:4; 1 Timoteo 2:3-5.

2. ¿Kʼusi chal Vivlia ti chkʼot ta stojolal li relijione?

Li Diose mu me xakʼ sba ta loʼlael ta stojolal li relijionetike, akʼo mi chalik ti skʼanojike, yuʼun jaʼ tspasik li kʼusitik ta sbalumil Satanase (Santiago 4:4). Ti «mucʼ ta [Babilonia]» xi li Vivliae, jaʼ chalbe skʼoplal skotol li jecheʼ relijionetike, ti jaʼ jech sbi ojtikinbil toʼox li voʼneal jteklum ti bu lik talel li jecheʼ relijion kʼalal echʼ xaʼox li Nojelal ta voʼ ta skʼakʼalil Noee. Li Diose jutuk xa me skʼan xakʼbe slajeb li jecheʼ relijionetik ti jaʼ noʼox tsloʼla xchiʼuk chakʼbe svokol li krixchanoetike. Kʼelo Apocalipsis 17:1, 2, 5, 16, 17; 18:8.

 Li Jeovae oy ta yoʼonton li krixchanoetik ti te oyik ta jecheʼ relijione xchiʼuk yakal xa tslokʼes talel. ¿Kʼuxi tspas? Jaʼ ti chchanubtas ta sventa li kʼusi melele. Kʼelo Miqueas 4:2, 5.

3. ¿Kʼusi skʼan spasik li krixchanoetik ti oy ta yoʼontonik li kʼusi melele?

Jmoj oyutik yuʼun li melel relijione

Li Jeovae oy ta yoʼonton li buchʼutik lek chaʼiik li kʼusi melele xchiʼuk ti oy ta yoʼontonik spasel li kʼusi leke. Jaʼ yuʼun, chalbe krixchanoetik ti akʼo xlokʼik li ta jecheʼ relijione. Mi skʼanojik ta melel li Diose, ta sjunul yoʼonton tsjel li kʼusitik ta xkuxlejalik sventa lekuk x-ilatike. Kʼelo Apocalipsis 18:4.

Li ta baʼyel sigloe, epal krixchanoetik lek la xchʼamik li mantal laj yal jtakboletike. Li krixchanoetik taje la sjel xkuxlejalik, yuʼun mas xa xmuyubajik, oy mas smelolal xkuxlejalik xchiʼuk ayan spatobil yoʼontonik. Li voʼotik eke, skʼan me jchʼamtik li mantal chal ta Vivliae, ti xkakʼtik baʼyel ta jkuxlejaltik li kʼusi tskʼanbutik Jeovae. Kʼelo 1 Tesalonicenses 1:8, 9; 2:13.

Ta sjunul me yoʼonton chchʼam Jeova li buchʼutik chiktaik komel li jecheʼ relijione xchiʼuk ti chchʼamik li mantale. Skotol li buchʼutik chiktaik li jecheʼ relijione lek chil sbaik xchiʼuk li Diose, chkʼanatik yuʼun li ermanoetik ta tsobobbaile xchiʼuk xuʼ chkuxiʼik sbatel osil ta Balumil. ¿Mi oy ta avoʼonton chakʼan chakʼupin li bendisionetik taje? Kʼelo Marcos 10:29, 30; 2 Corintios 6:17, 18.

4. ¿Kʼusi tspas Dios sventa oyuk lekilal xchiʼuk muyubajel ta spʼejel li Balumile?

Kʼalal mi laj yakʼbe slajeb jecheʼ relijionetik li Jeovae, muʼyuk xa me chil svokol li krixchanoetike. Muʼyuk xa me tsloʼla mas krixchanoetik xchiʼuk mas me jmoj oyik. Skotol li krixchanoetike jaʼ xa me chichʼik ta mukʼ li stuk noʼox melel Diose. ¿Mi mu jaʼuk jun lekil aʼyej taje? Kʼelo Apocalipsis 18:20, 21; 21:3, 4.