Kʼelo li kʼusi yichʼoje

Batan ta saʼobil

 XCHANOBIL 3

¿Kʼu yelan laj yichʼ tael li kʼusi melel ta Vivliae?

¿Kʼu yelan laj yichʼ tael li kʼusi melel ta Vivliae?

Jchanolajeletik ta Vivlia ta 1870

Baʼyel revista Li Jkʼel osil ta toyole (1879)

Li kʼuyelan avi Li Jkʼel osil ta toyole

Li Vivliae laj onoʼox yal ti kʼalal chamem xaʼox li Jesuse oy jlom baʼyel yajtsʼaklomtak Cristo ti chkʼotik ta jecheʼ jchanubtasvanejetik xchiʼuk ti chlik sokesik li kʼusi melel ta Skʼop Diose (Hechos 20:29, 30). Jech onoʼox kʼot ta pasel, yuʼun li jecheʼ jchanubtasvanejetike la skapik li chanubtaseletik yuʼun Jesús xchiʼuk li jecheʼ chanubtaseletike, vaʼun jaʼ jech lik talel li relijionetik ti xchʼunojik Cristo ta alele (2 Timoteo 4:3, 4). Ta sventa taje, ¿kʼu yuʼun jchʼunojkutik ti jech ta melel chchanubtasvan Vivlia li kʼuyelan chkaʼibekutik smelolale?

Kʼot yorail ti chakʼ ta ojtikinel kʼusi melel li Jeovae. Li Diose laj yal ti ta yorail slajebal kʼakʼale «li melel yojtikinobile ta x-epaj» (Daniel 12:4TNM). Ta 1870 jtsop krixchanoetik ti la saʼik li kʼusi melele laj yakʼik venta ti jutuk mu skotoluk li kʼusi chchanubtasvanik li relijionetike mu jechuk kʼuchaʼal chal li Vivliae. Jaʼ yuʼun la xchanik mas li kʼusi chal Vivliae, vaʼun li Jeovae koltavan sventa xaʼibeik smelolal li mantale.

Viniketik ti ta sjunul yoʼonton la xchanik lek li Vivliae. Li Jchanolajeletik ta Vivlia ti jaʼ li buchʼu baʼyel lik xchanik talel kuʼunkutike, jaʼ jech la xchanik kʼuchaʼal chichʼ chanel avie, ta jujun xchanobil chchanik. Kʼalal oy junuk teksto ti mu xaʼibeik smelolale, tsaʼik yan teksto ti xuʼ xkoltaatik ta yaʼibel smelolale, vaʼun kʼalal oy kʼusi jech chkʼot ta nopel yuʼunik ti koʼol chchanubtasvan li Vivliae, tstsakik ta vun. Jaʼ jech laj yakʼik ti akʼo stakʼ stuk li Vivliae, vaʼun laj yaʼibeik smelolal li melel ta sventa li sbi Diose, li Ajvalilal yuʼune, li kʼusi tskʼan tspas ta sventa li krixchanoetike xchiʼuk li Balumile, ti kʼuyelan oy li animaetike xchiʼuk li spatobil oʼontonal ta sventa chaʼkuxesele. Li kʼusi la xchanik ta sventa li kʼusi melele jaʼ lokʼesatik-o ta mosoil ta sventa li kʼusitik xchʼunojike xchiʼuk li kʼusitik tspasik ti mu jechuke (Juan 8:31, 32).

Ta 1879 laj yaʼibeik smelolal ti skʼan xalbeik batel skotol krixchanoetik li kʼusi melel ta Vivliae. Li ta jabil taje jaʼo lik slokʼesik li revista ti yakal-o chichʼ lokʼesel avie, Li Jkʼel osil ta toyole. Yakal chalbe skʼoplal li Ajvalilal yuʼun Jeovae. Li avie ta jcholkutik mantal ta mas ta 240 mukʼtik lumetik xchiʼuk bikʼtal lumetik xchiʼuk mas ta 750 kʼopetik. ¡Muʼyuk bu jech ilbil-o ti chpuk batel tajek skʼoplal li kʼusi melel ta Vivliae!

  • ¿Kʼusi kʼot ta pasel ta sventa li kʼusi melel chal Vivlia kʼalal chamem xaʼox li Jesuse?

  • ¿Kʼu yelan la jtakutik li kʼusi melel ta Vivliae?