Kʼelo li kʼusi yichʼoje

Batan ta saʼobil

 XCHANOBIL 23

¿Kʼuxi chichʼ tsʼibael xchiʼuk chichʼ jelubtasel ta yantik kʼop li jvunkutike?

¿Kʼuxi chichʼ tsʼibael xchiʼuk chichʼ jelubtasel ta yantik kʼop li jvunkutike?

Departamento sventa Stsʼibael Vunetik (Estados Unidos)

Corea del Sur

Armenia

Burundi

Sri Lanka

Sventa xichʼ cholel li «Lequil Aʼyej [...] ta jujun banamil, ta jujuchop stsʼunubalic [li krixchanoetike], ta jujuchop cʼop, xchiʼuc ta jujun lum[e]», ta jpaskutik vunetik xchiʼuk yan kʼusitik ta mas ta 750 kʼopetik (Apocalipsis 14:6). ¿Kʼu yelan ta jpaskutik li tsatsal abtelal taje? Jaʼ koliyal ti ep jtsʼibajom kuʼunkutik ta spʼejel Balumile xchiʼuk ti oy jtsop jelubtasej kʼopetik ti tsots ch-abtejik ti jaʼik stestigo Jeova skotolike.

Baʼyel chichʼ tsʼibael ta inglés. Li Jtsop Jbeiltasvaneje jaʼ oy ta sba skʼelbel yabtel li Departamento sventa Stsʼibael Vunetike. Li departamento taje jaʼ oy ta sba chalbe kʼusitik skʼan spasik li jtsʼibajometik ti te noʼox oyike xchiʼuk li ta junantik Betele. Ta skoj ti epik li jtsʼibajometike xuʼ stsʼibabeik skʼoplal kʼusitik tsots tsnuptanik li krixchanoetik ta yan lumetike, jaʼ yuʼun ta buyuk noʼox xuʼ xkʼot li jvunkutike.

Chichʼ takbel batel li jelubtasej kʼopetike. Mi laj xaʼox stsʼibael xchiʼuk mi laj yichʼ akʼel permiso sventa chichʼ lokʼesel li mantale, chichʼ takbel batel ta komputadora li jelubtasej kʼopetik ta spʼejel Balumile, vaʼun jaʼ xa chlik sjelubtasik xchiʼuk tskʼelik. Li jelubtasej kʼopetike chakʼik persa «stabel smelol [...] jujubel [kʼop]» sventa jech xiktaik kʼuchaʼal chal li ta inglese (Eclesiastés 12:10Ch).

Mas xa anil abtel ta skoj li komputadoraetike. Li kʼusi tspas jun jtsʼibajom xchiʼuk jun jelubtasej kʼope mu spas yuʼun li jun komputadorae. Pe toj jtunelik kʼalal oy kʼusi chichʼ saʼel ta diksionario, o kʼalal oy kʼusi yan chichʼ saʼele. Li stestigounkutik Jeovae jpasojkutik jun programa sventa komputadora ti Sistema Electrónico de Edición Plurilingüe sbie (li sletrailtak ta inglese jaʼ MEPS), koliyal taje xuʼ xichʼ tsʼibael jayibuk sien kʼopetik ta jun komputadora, xichʼ akʼbel slokʼoltak xchiʼuk xichʼ chapanel sventa chichʼ pasel imprimir.

¿Kʼu yuʼun chkakʼkutik tajek persa sjelubtasel ta yan kʼopetik manchuk mi oy noʼox jayibuk mil krixchanoetik ti jech chkʼopojike? Yuʼun li kʼusi tskʼan yoʼonton Jeovae jaʼ ti «acʼo coluc scotol cristianoetique, xchiʼuc ti acʼo lic yotquinic li cʼusi melele» (1 Timoteo 2:3, 4).

  • ¿Kʼusitik abtelal chichʼ pasel sventa chichʼ tsʼibael li jvunkutike?

  • ¿Kʼu yuʼun ta jelubtaskutik ta epal kʼopetik li jvunkutike?