Kʼelo li kʼusi yichʼoje

Batan ta saʼobil

 XCHANOBIL 15

¿Kʼusitik abtelal tspasik ta tsobobbail li moletike?

¿Kʼusitik abtelal tspasik ta tsobobbail li moletike?

Finlandia

Chchanubtasvan

Chvulaʼanvanik

Chcholik mantal

Li ta j-organisasionkutike muʼyuk paleetik o pastoretik ti tojbilike. Moʼoj, yuʼun jech kʼuchaʼal chichʼ toʼox pasel kʼalal naka toʼox lik li stsobobbail yajtsʼaklom Cristoe, chichʼ vaʼanel moletik ti lek chapalik «sventa [ch]chabiik li tsobobbail yuʼun Diose» (Hechos 20:28TNM). Li moletik ta tsobobbail taje lek tsotsik ta mantal xchiʼuk jaʼ chchabiik li tsobobbaile, chchʼunik li mantal liʼe: «Mu me ta sujeluc xapasic; yutsiluc me avoʼnton xapasic [...]. Mu me jaʼuc ta scoj ti xpichʼet avoʼntonic yuʼun taqʼuine. Scotoluc avoʼnton xapasic li avabtelique» (1 Pedro 5:1-3). ¿Kʼusitik abtelal tspasik ti xuʼ jtabekutik sbalile?

Tskʼelunkutik xchiʼuk chchabiunkutik. Li moletike jaʼ tsbeiltasik xchiʼuk chchabiik ta mantal li tsobobbaile. Ta skoj ti snaʼojik ti jaʼ yakʼoj Dios li yabtelik ti tsots skʼoplale, muʼyuk tsots tspasunkutik ta mantal, moʼoj, yuʼun tskoltaunkutik ti lekuk noʼox oyunkutike xchiʼuk ti ximuyubajkutik noʼoxe (2 Corintios 1:24). Jech kʼuchaʼal jun jchabichij ti ta jujukot tskʼel li xchijtake, jaʼ jech chakʼ ta yoʼontonik yojtikinel ta jujuntal xchijtak Dios li moletik eke (Proverbios 27:23).

Chchanubtasunkutik ta spasel li kʼusi tskʼan yoʼonton Diose. Jujun xemana li moletike jaʼ oy ta sbaik li tsobajeletik ta tsobobbail ti jaʼ sventa x-epaj xchʼunel koʼontonkutike (Hechos 15:32). Li viniketik taje yichʼojik tajek ta mukʼ Dios, jaʼ jbabeik li ta cholmantale, chchiʼinunkutik ta cholmantal, jech noxtok, chchanubtasunkutik ta spasel kʼusuk abtelal sventa Dios.

Tspat koʼontonkutik ta jujuntal. Sventa chakʼbunkutik ta jujuntal li kʼusitik chtun kuʼunkutik ta mantale, li moletike chbat svulaʼanunkutik ta jnakutik xchiʼuk chchiʼinunkutik ta loʼil li ta Salon sventa Tsobobbaile. Tstunesik Skʼop Dios sventa tskoltaunkutik xchiʼuk tspat koʼontonkutik (Santiago 5:14, 15).

Li moletike akʼo mi oy yabtelik li ta tsobobbaile, jutuk mu skotolikuk oy yabtelik noxtok xchiʼuk oy yutsʼ yalalik ti skʼan xchabiik xchiʼuk skʼelike. Li ermanoetik taje sta-o ti xkichʼkutik ta mukʼe yuʼun tsots ch-abtejik (1 Tesalonicenses 5:12, 13).

  • ¿Kʼusitik tspasik li moletik ta tsobobbaile?

  • ¿Kʼu yelan chakʼik ta ilel slekil yoʼontonik ta jtojolalkutik ta jujuntal?