Kʼelo li kʼusi yichʼoje

Batan ta saʼobil

 XCHANOBIL 9

¿Kʼuxi ta jchapan jbakutik lek sventa li tsobajeletike?

¿Kʼuxi ta jchapan jbakutik lek sventa li tsobajeletike?

Camboya

Ucrania

Mi yakal chavichʼ chanubtasel yuʼun jun stestigo Jeovae, kak onoʼox van chachapan aba sventa li kʼusi chachanike. Sventa chatabe mas sbalile xuʼ jaʼ jech xapas sventa li tsobajeletik eke. Mas to me chatabe sbalil mi chachʼakbe lek yoraile.

Nopo lek kʼusi ora xchiʼuk bu chachanunaj. Skʼan xavakʼ venta jayib ora ti mas lek xuʼ xachanunaje. ¿Mi jaʼ van mas xokolot kʼalal skʼan toʼox xabat ta abtele o mi jaʼo kʼalal chvayik xaʼox li avalab o anichʼnab ta akʼobaltike? Manchuk mi jlikel noʼox, jaʼ lek nopo ti kʼuyepal chachane xchiʼuk mu me xavakʼ ti oy kʼusi xchʼay avoʼonton ta spasel taje. Jaʼ te xachanunaj li bu tsʼijil noʼoxe xchiʼuk sventa mu xchʼay avoʼontone jaʼ lek tupʼo li radioe, li televisione xchiʼuk li aselulare. Mi chapas orasion kʼalal chlik achane jaʼ me tskoltaot sventa xchʼay ta ajol li kʼusi chavul-o avoʼonton jujun kʼakʼale xchiʼuk ti jaʼ noʼox xavakʼ ta avoʼonton li Skʼop Diose (Filipenses 4:6, 7).

Bono li bu mas tsotsik skʼoplale xchiʼuk chapano aba sventa chavakʼ aloʼil. Kʼelo lek baʼyel li kʼusi chalbe smelolale. Xuʼ xavakʼ venta li ta sbi mantal o kapituloe, kʼelo kʼuxi te tsakal skʼoplal li kʼusi mas tsots skʼoplal li ta yuni bitake, kʼelo lek li lokʼoletike xchiʼuk takʼo li sjakʼobiltak sventa svulesobil ta joltik ti jaʼ chalbe skʼoplal li kʼusi mas skʼan jvules ta joltike. Mi laje kʼelo jujun parafo sventa xatabe stakʼobil ta jujun li sjakʼobiltake. Saʼo ta Vivlia li tekstoetik ti muʼyuk lokʼtabile xchiʼuk akʼo venta kʼuxi tsjambe smelolal li kʼusi chichʼ chanele (Hechos 17:11). Kʼalal mi la atae, bono jaypʼeluk noʼox ti bu mas tsotsik skʼoplal ti jaʼ tskoltaot ta svulesel ta ajol li stakʼobile. Kʼalal mi jech la apase, xuʼ me xatoy akʼob ta tsobajel sventa chavakʼ jlikel aloʼil ta akʼop atuk mi jech chakʼane.

Kʼalal jeltos kʼusitik chachan jujun xemana ta tsobajele ch-epaj li ak’ulejal ta sventa li kʼusi chal Vivliae (Mateo 13:51, 52).

  • ¿Kʼuxi xuʼ xachʼakbe lek yorail yoʼ chachapan aba sventa li tsobajeletike?

  • ¿Kʼuxi xuʼ xachapan aba sventa xavakʼ aloʼil li ta tsobajele?