Noé

Abraham xchiʼuk Sara

Moisés

Jesucristo

Epal krixchanoetike yalojik ti achʼ to li jrelijionkutike. Akʼo mi jech, oy xa mas ta 2,700 jabil ti «voʼoxuc testigooxuc cuʼun» x-utatik li yajtuneltak melel Diose (Isaías 43:10-12). Kʼalal skʼan toʼox xkʼot li jabil 1931, ojtikinbilunkutik toʼox kʼuchaʼal Jchanolajeletik ta Vivlia. Vaʼun chaʼa, ¿kʼu yuʼun stestigo Jeova lik jbiinkutik?

Yuʼun chakʼ ta ojtikinel li Dios chkichʼkutik ta mukʼe. Li sbi Dios ti jaʼ Jeovae, oy jaymiluk ta velta tsʼibabil li ta Vivliae, taje jech chakʼ ta ilel epal voʼneal tsʼibetik. Ta epal Vivliaetike sjelojik li sbi Diose, jaʼ xa noʼox chalik Dios o Kajvaltik. Akʼo mi jech, kʼalal laj yakʼ sba ta ojtikinel ta stojolal Moisés li melel Diose laj yal ti Yahweh o Jeova li sbie, jech kʼuchaʼal tsjelubtas yan Vivliaetike, xchiʼuk xi laj yale: «Li jbie; mu xlaj scʼoplal o sbatel osil» (Éxodo 3:14, 15, kʼelo tsʼib ta yok vun). Jaʼ jech laj yakʼ ta ilel ti jelel xchiʼuk li yan diosetike. Ximuyubajkutik ti kichʼojbekutik li xchʼul bi Diose.

Yuʼun jaʼ chakʼ ta ilel li kabtelkutike. Ta voʼnee ep buchʼutik laj yakʼ xchʼunel yoʼontonik ta stojolal li Jeovae. Li buchʼu baʼyel jech laj yakʼ ta ilele jaʼ li tukʼil Abele. Vaʼun te lik-o talel li «epal testigoetic» ti te tsakal skʼoplal Noé, Abraham, Sara, Moisés, David xchiʼuk yan krixchanoetike (Hebreos 11: 4–12:1). Jech kʼuchaʼal jun krixchano ti chtun ta testigo ta kavilto o ta snail chapanobbail sventa chal ta jamal kʼusitik spasoj jun krixchano ti muʼyuk smule, jaʼ jech ta sjunul koʼontonkutik chkakʼkutik ta ojtikinel li melel ta sventa li Dios kuʼunkutike.

Yuʼun jaʼ ta jchanbekutik li Jesuse. Li Vivliae chal ti Jesuse jaʼ la li «tuqʼuil testigoe, ti melel cʼusi chale» (Apocalipsis 3:14). Laj yal stuk ti jaʼ tal yakʼ ta ojtikinel li sbi Stote xchiʼuk ti «tal [y]al li cʼusi [melel]» ta sventa Diose (Juan 17:26; 18:37). Jaʼ yuʼun li melel yajtsʼaklomtak Cristoe skʼan xkʼotik ta yajkʼopojel li Jeovae xchiʼuk ti xakʼik ta ojtikinel li sbie. Li stestigounkutik Jeovae chkakʼkutik persa spasel jech.

  • ¿Kʼu yuʼun la jel li jbikutik ta stestigo Jeovae?

  • ¿Kʼu xa sjalil ti oy stestigotak liʼ ta Balumil li Jeovae?

  • ¿Buchʼu ti mas tsots skʼoplal stestigo Jeova kʼoteme?