Kʼelo li kʼusi yichʼoje

Sventa xasut ta xchibal pajina

Batan ta saʼobil

Stestigotak Jeova

tsotsil

Li Jesuse: jaʼ li bee, jaʼ li melele, jaʼ li kuxlejale

 KAPITULO 102

Kajal och ta jkot chʼiom vuro ta Jerusalen li Jesuse

Kajal och ta jkot chʼiom vuro ta Jerusalen li Jesuse

MATEO 21:1-11, 14-17 MARKOS 11:1-11 LUKAS 19:29-44 JUAN 12:12-19

  • KUCHEM XA YUʼUN XVINAJ OCH TA JERUSALEN LI JESUSE

  • LAJ YICHʼ ALEL TI CHICHʼ LAJESEL LI JERUSALENE

Li ta yokʼomale, li ta domingo 9 yuʼun nisane, lokʼ batel ta Betania xchiʼuk yajchankʼoptak sventa chbatik ta Jerusalen li Jesuse. Kʼalal poʼot xa xkʼotik ta Betfague ta Vits Olivatike, xi laj yalbe li yajchankʼoptake:

«Batanik li ta bikʼit lum leʼe, vaʼun te chukul chataik ta ora jkot meʼ vuro xchiʼuk jkot chʼiom vuro; titunik, vaʼun ikʼbeikun tal. Xi xavalik mi oy buchʼu kʼusi chalboxuke: ‹Yuʼun chtun yuʼun li Kajvaltike›. Vaʼun tskoltaboxuk ta anil sventa xavikʼik tal.» (Mateo 21:2, 3.)

Pe muʼyuk laj yakʼik venta ti jaʼ jun albil kʼop li kʼusi albatik yuʼun Jesus ti yakal xa chkʼot ta pasele. Jaʼ to ta tsʼakal laj yakʼik venta ti jaʼ kʼot ta pasel li albil kʼop yuʼun Zacariase. Yuʼun xi onoʼox yalojbe skʼoplal kʼalal ch-och ta Jerusalen li Ajvalil tʼujbil yuʼun Diose: «Biqʼuit chacʼ sba. Cajal ta unin buro ta xtal; cajal ta xtal ta jcot yol meʼ buro» (Zacarías 9:9).

Kʼalal kʼotik ta Betfague li yajchankʼoptak Jesuse xchiʼuk ti laj yikʼik batel li chʼiom vuro xchiʼuk smeʼe, xi jakʼbatik yuʼun li krixchanoetik tee: «¿Kʼusi chapasik ti chatitunik li chʼiom vuroe?» (Markos 11:5). Pe kʼalal laj yalbeik ti jaʼ sventa Kajvaltik li uni vuroetik taje, akʼbat yikʼik batel. Vaʼun li yajchankʼoptak Jesuse la slambeik ta sba meʼ vuro xchiʼuk yol li skʼuʼ slapojik ta sbae, te une la skajlebin chʼiom vuro li Jesuse.

La stsob sba tal krixchanoetik kʼalal yakal ch-och batel ta Jerusalen li Jesuse. Ep buchʼutik la skʼi ta be li skʼuʼ slapoj ta sbaike. Yantike lik skʼasik tal «kʼob teʼ ta osiltik» sventa chchexanik ta be ti bu ch-echʼ li Jesuse. Xi x-avet chalike: «¡Avokoluk, chabio! ¡Akʼo sta bendision li buchʼu chtal ta sbi Jeovae! ¡Akʼo sta bendision li Ajvalilal chtal ta tsʼakal yuʼun jtotik Davide! ¡Avokoluk, chabio, voʼot ti ta toyol oyote!» (Markos 11:8-10). Toj chopol chaʼi li jfariseoetik ti te kapalik ta epal krixchanoetik ti vaʼ yelan x-avet chalike. Jaʼ yuʼun xi laj yalbeik li Jesuse: «Jchanubtasvanej, tsako ta utel li avajchankʼoptake». Pe xi la stakʼ li Jesuse: «Chkalboxuk avaʼiik mi tsʼij xiik likele, jaʼ me chlik avanuk li tonetike» (Lukas 19:39, 40).

Kʼalal laj yil Jerusalen li Jesuse lik okʼuk xchiʼuk xi laj yale: «Ti lajuk avakʼ ventae, melel, ti lajuk avakʼ venta avi ti jaʼ chakʼ jun avoʼonton li kʼusitik liʼe..., pe bu chata, li avi une laj xa avichʼ mukbel li kʼusitik taje». Jaʼ jech, ta me stojik ti muʼyuk la xchʼunik mantal li krixchanoetik ta Jerusalene. Xi kak laj yalbe skʼoplal li Jesuse: «Chkʼot skʼakʼalil ti chtal sjoyobtaot li avajkontratak ta estaka teʼ ti tsʼubajtik lek sniʼe xchiʼuk tsibtasoxuk ta jujujot. Tsjipot ta lum xchiʼuk li avalab achiʼuke, jech xtok, mi jpʼejuk ton kajal chkom ta sba yan ton liʼ ta atojolale» (Lukas 19:42-44). Vaʼun kʼot ta pasel li kʼusi laj yal Jesuse, yuʼun laj yichʼ lajesel ta sjabilal 70 ta jkʼakʼaliltik li Jerusalene.

Kʼalal och batel ta Jerusalen li Jesuse, «xvochlajetik sjunul li jteklume xchiʼuk xi chalike: ‹¿Buchʼu leʼe?›». Vaʼun xi chalik li epal krixchanoetike: «¡Jaʼ li j-alkʼop Jesuse, likem tal ta Nasaret ta Galilea!» (Mateo 21:10, 11). Jech xtok, li buchʼutik laj yilik ti la xchaʼkuxes Lasaro li Jesuse chchapbeik yaʼi yan krixchanoetik li skʼelobil juʼelal taje. Jech oxal chat yoʼontonik ta skoj ti stuk xa chaʼi sbaik li jfariseoetike, vaʼun xi chalbe sbaike: «Skotol krixchanoetik chbat xchiʼinik» (Juan 12:18, 19).

Kʼalal chkʼot ta vulaʼal ta Jerusalen li Jesuse, nopem onoʼox xaʼi ti chkʼot xchanubtas li krixchanoetik ta temploe. Jaʼ te ti bu chpoxta li buchʼutik koxoe xchiʼuk li buchʼutik maʼsate. Batsʼi ilinik ta jyalel li bankilal paleetik xchiʼuk li jchanubtasvanejetik ta Mantal ta skoj li kʼusi tspas Jesuse xchiʼuk ti xi tsots chal li uni ololetik ta temploe: «¡Avokoluk, chabio li Xnichʼon Davide!». Xi la sjakʼbeik  Jesus li jnitvanejetik ta relijion taje: «¿Mi laj avaʼi li kʼusi chalike?». Xi la stakʼ li Jesuse: «¿Mi muʼyuk achanojik liʼe chaʼa: ‹Ta ye ololetik xchiʼuk ta ye li buchʼutik ta to xchuʼunik ti chkʼupil kʼoptavanike›?» (Mateo 21:15, 16).

Vaʼun la skʼel spat xokon ta templo li Jesuse. Ta skoj ti bat xa orae, lokʼik batel xchiʼuk li yajtakboltake. Vaʼun kʼalal mu to chkʼot li skʼakʼalil 10 yuʼun nisane sut batel ta Betania, jaʼ te ti bu vay li ta yakʼobalil domingoe.