Kʼelo li kʼusi yichʼoje

Batan ta saʼobil

 KAPITULO 136

Te oy ta tiʼ Nab Galilea

Te oy ta tiʼ Nab Galilea

JUAN 21:1-25

  • LAJ YAKʼ SBA TA ILEL TA NAB GALILEA LI JESUSE

  • JAʼ TSMAKʼLINIK CHIJ LI PEDRO XCHIʼUK YANTIKE

Xi onoʼox laj yal Jesus kʼalal slajeb xa akʼobal te xchiʼuk li yajtakboltake: «Kʼalal mi laj xaʼox kichʼ chaʼkuxesele baʼyel chijelav batel ta Galilea» (Mateo 26:32; 28:7, 10). Vaʼun ep yajtsʼaklomtak batik ta Galilea. ¿Kʼusi bat spasik te?

Oy jun velta ti xi laj yalbe vakvoʼ jtakboletik li Pedroe: «Chbat jtsak choy». Xi la stakʼike: «Chbat jchiʼinotkutik» (Juan 21:3). Pe sjunul li vaʼ akʼobale mi jkotuk choy la staik ta tsakel. Kʼalal poʼot xa sakube, te kʼot ta tiʼ nab li Jesuse. Pe li jtakboletike muʼyuk laj yakʼik venta ti jaʼe. Xi albatik yuʼun li Jesuse: «Ololetik, ¿mi mu meleluk ti chʼabal aveʼelike?». Xi la stakʼbeike: «¡Chʼabal!». Xi albatik yuʼun li Jesuse: «Jipik yalel anutiʼik sventa tsakob choy ta jot xokon varko ta batsʼikʼob, vaʼun chataik» (Juan 21:5, 6). Ep tajek la stsakik li choye, jaʼ yuʼun mi jaʼuk xa xnit lokʼel yuʼun li snutiʼik sventa tsakob choye.

Xi albat yuʼun Juan li Pedroe: «¡Jaʼ li Kajvaltike!» (Juan 21:7). Vaʼun li Pedroe ta anil noʼox la slap li skʼuʼ tslap ta sbae, yuʼun ta slokʼ kʼalal jaʼo yakal tstsak choye. La sjip sba ochel ta nab, vaʼun te van 90 metrouk nuxinaj batel kʼalal to ta tiʼ nab. Li yan jchankʼopetike te kʼun talik li ta bikʼit varkoe, te snitoj tal li snutiʼik sventa tsakob choy ti noj ta choye.

Kʼalal vulik ta tiʼ nabe, laj yilik «ti te tsanbil akʼale, te kajal choy xchiʼuk pan». Xi laj yal li Jesuse: «Ichʼik tal li choy ti jaʼ to la atsakike». Vaʼun li Pedroe la xjoch tal li snutiʼik sventa tsakob choye, ¡oy 153 ta kot mukʼtik choy te! Xi laj yal li Jesuse: «Laʼik, veʼanik». Pe mi junuk jchankʼop oy stsatsal yoʼonton ti xi sjakʼbee: «¿Buchʼuot?». Yuʼun snaʼojik ti jaʼ li Jesuse (Juan 21:9-12). Taje yoxibal xa velta laj yakʼ sba ta ilel kʼalal jmoj oyike.

Te une akʼbat slajesik yuʼun Jesus li pan xchiʼuk choye. Laj une, li Jesuse la skʼel batel li choy la stsakike xchiʼuk xi la sjakʼe: «Simon xnichʼon Juan, ¿mi mas akʼanojun ti jaʼ mu sta li kʼusitik liʼe?». ¿Mi jaʼ van mas oy ta yoʼonton Pedro li yabtel ta tsak choye, ti ja mu masuk tsots skʼoplal chaʼi li abtelal akʼbil yuʼun Jesuse? Xi la stakʼ li Pedroe: «Jkʼanojot Kajval, anaʼoj ti jkʼanojote». Xi albat yuʼun li Jesuse: «Makʼlino li jchʼiom chijtake» (Juan 21:15).

Xi la sjakʼ yan velta li Jesuse: «Simon xnichʼon Juan, ¿mi akʼanojun?». Xuʼ van mu xaʼibe lek smelolal, pe xi la stakʼ ta sjunul yoʼontone: «Jkʼanojot Kajval, anaʼoj ti jkʼanojote». Xi la stakʼ yan velta li Jesuse: «Chabio li kuni chijtake» (Juan 21:16).

Xi la sjakʼ ta yoxibal velta li Jesuse: «Simon xnichʼon Juan, ¿mi akʼanojun?». Laj van snop Pedro mi yuʼun van tsnop Jesus ti muʼyuk bu tukʼ yoʼonton yakʼoj sba li Pedroe. Jaʼ yuʼun xi laj yal mas to ta sjunul yoʼontone: «Kajval, anaʼoj skotol li kʼusitike; anaʼoj lek ti jkʼanojote». Laj to yal Jesus ti kʼusi skʼan spas li Pedroe: «Makʼlino li kuni chijtake» (Juan 21:17). Jaʼ jech, li buchʼutik jbabeike skʼan xakʼbeik kʼusi chtun yuʼun li buchʼutik ch-ochik ta skoral xchij Diose.

Laj yichʼ chukel li Jesuse xchiʼuk laj yichʼ milel ta skoj li abtelal akʼbat spas yuʼun Diose. Vaʼun laj yalbe Pedro ti jaʼ jech chil svokol eke. Xi laj yalbee: «Kʼalal mas toʼox keremote, atuk toʼox chalap akʼuʼ apokʼ xchiʼuk ta toʼox xabat ti bu tskʼan avoʼontone. Pe kʼalal mi lamalube jaʼ noʼox chatoy li akʼobe, vaʼun yan-o buchʼu tslapbot li akʼuʼ apokʼe xchiʼuk chikʼot batel ti bu mu xakʼane». Akʼo mi jech, xi laj yalbe mantal Pedro li Jesuse: «Tsʼakliun-o batel» (Juan 21:18, 19).

Vaʼun li Pedroe la skʼelbe sat li jtakbol Juane, xi la sjakʼe: «Kajval, ¿kʼusi chkʼot ta stojolal leʼe?». Jech, ¿kʼusi van chkʼot ta pasel ta stojolal li jtakbol ti skʼanoj tajek li Jesuse? Xi la stakʼ li Jesuse: «Mi jech tskʼan koʼonton ti liʼ to oy kʼalal mi lisut tale, taje mu aventauk-o» (Juan 21:21-23).  Kʼuchaʼal chkiltike, li kʼusi skʼan spas Pedroe jaʼ ti skʼan stsʼakli-o batel li Jesuse, ti mu xat yoʼonton ta sventa li kʼusi tspas yantike. Akʼo mi jech, laj yal Jesus ti jaʼ mas jal chkuxi li Juane, ti jaʼ mu sta li yan jtakboletike. Jech xtok, ch-akʼbat yil yuʼun Dios ti kʼalal chtal xchiʼuk sjuʼel ta Ajvalilal yuʼun li Jesuse.

Melel onoʼox chaʼa, toj ep kʼusitik la spas li Jesuse, mi jaʼuk onoʼox x-och-o ta epal balbalvunetik li kʼusitik la spase.