Kʼelo li kʼusi yichʼoje

Sventa xasut ta xchibal pajina

Batan ta saʼobil

Stestigotak Jeova

tsotsil

Li Jesuse: jaʼ li bee, jaʼ li melele, jaʼ li kuxlejale

 KAPITULO 1

La stak tal chib lekil aʼyej li Diose

La stak tal chib lekil aʼyej li Diose

LUKAS 1:5-33

  • LAJ YAL ANJEL GABRIEL TI CH-AYAN JUN KEREM TI JUAN J-AKʼ-ICHʼVOʼ TSBIINE

  • LI GABRIELE LAJ YALBE MARIA TI CH-AYAN YOLE XCHIʼUK TI JESUS CHAKʼBE SBIE

Ta melel, jaʼ yaʼyej Dios sliklej li Vivliae. Jaʼ laj yakʼbutik li Jtotik ta vinajel sventa xchanubtasutike. Jkʼelbetik skʼoplal chib lekil aʼyej ti mas xa ta chaʼmil jabil laj yichʼ alele. Jaʼ laj yal jun anjel ti Gabriel sbie, ti «te [vaʼal] ta stsʼel xchiʼuk ta yeloval Diose» (Lukas 1:19). Jkʼeltik kʼu yelan kʼalal albatik li aʼyejetik ti tsots skʼoplale.

¿Kʼusi ora laj yal Gabriel li baʼyel aʼyeje xchiʼuk bu laj yal? Jaʼ ta sjabilal 3 kʼalal maʼuk toʼox jkʼakʼaliltike xchiʼuk te laj yal ta svitstikaltik Judea ti nopol van xil Jerusalene. Jaʼ te nakal jun yajtunel Jeova ti chtun ta paleal ti Sakarias sbie. Oy xa sjabilalik xchiʼuk yajnil li vinik taje, pe chʼabal yalab xnichʼnabik un. Elisabet sbi li yajnile. Jaʼo te chtun ta paleal ta templo ta Jerusalen li Sakarias kʼalal oy kʼusi albate. Vaʼun ta ora noʼox te laj yakʼ sba ta ilel ta stsʼel skajleb matanal ta stojolal Sakarias li anjel Gabriele.

Solel xiʼ tajek li Sakariase. Pe xi la spatbe yoʼonton Sakarias li anjele: «Mu xaxiʼ Sakarias, yuʼun laj xa yichʼ aʼiel li kʼusi chakʼane, ta xchiʼin yol li avajnil Elisabete, Juan chavakʼbe sbi». Xi to laj yal li anjel ta sventa li Juane: «Mukʼ skʼoplal chkʼot ta sat Jeova» xchiʼuk jaʼ «sventa chakʼbe Jeova jun jteklum ti lek chapale» (Lukas 1:13-17).

Mi jaʼuk xchʼun Sakarias li kʼusi albate. ¿Kʼu yuʼun? Jaʼ ta skoj ti oy xa sjabilalike. Jaʼ yuʼun xi albat yuʼun li Gabriele: «Ta skoj ti muʼyuk la achʼun li kʼusi laj kalbote chapas ta umaʼ xchiʼuk mu xuʼ xakʼopoj jaʼ to mi kʼot skʼakʼalil chkʼot ta pasel li kʼusitik taje» (Lukas 1:20).

Pe ta skoj ti muʼyuk xlokʼ-o tal li Sakariase, lik sjakʼbe sbaik krixchanoetik kʼu yuʼun ti chjalij tajeke. Lokʼ tal ta vokol un, pe makem ye lokʼ tal. Kʼajomal noʼox la spas senya ta skʼob. Jamal xvinaj ti oy kʼusi laj yil ta templo ti mu staleluke.

Vaʼun kʼalal laj yoʼonton ta spasbel yabtel Jeova li ta temploe, sut batel ta sna. ¡Mu ta sjaliluk une la xchiʼin yol li Elisabete! Voʼob u muʼyuk xlokʼ ta sna li Elisabete, te xa bajal-o ta sna sventa chchabi sba.

Pe laj yakʼ sba ta ilel yan velta li anjel Gabriele. ¿Buchʼu xa bat skʼopon un? Jaʼ bat skʼopon jun tojol tseb ti Maria sbie, te nakal ta Galilea ta yosilal Nasaret, te xkom ta snorteal Jerusalen. ¿Kʼusi albat yuʼun li anjele? «Lek ilbilot yuʼun li Diose», x-utat. Xi to laj yal li anjel Gabriele: «¡Kʼelo avil!, ta xachiʼin avol, ta xavokʼes jun kerem, Jesus chavakʼbe sbi» xchiʼuk «mukʼ skʼoplal chbat xchiʼuk chichʼ albel skʼoplal ti jaʼ Xnichʼon li Buchʼu toj toyol oye [...]. Vaʼun tsventain sbatel osil li snitilulaltak Jakobe, muʼyuk bu chlaj skʼoplal li Ajvalilal yuʼune» (Lukas 1:30-33).

Ta melel, toj mukʼ van smoton la sta laj yaʼi li anjel Gabriel kʼalal takat batel ta yalel li chib lekil aʼyej taje. Kʼalal mas ta jkʼelbetik batel skʼoplal li Juan xchiʼuk Jesuse, te chkakʼtik venta kʼu yuʼun toj tsots skʼoplal li aʼyejetik likem tal ta stojolal Diose.