MATEO 12:33-50 MARKOS 3:31-35 LUKAS 8:19-21

  • LI JESUSE LAJ YALBE SKʼOPLAL «LI SENYAIL J-ALKʼOP JONASE»

  • JAʼ MAS YUTSʼ YALAL CHAʼI LI YAJCHANKʼOPTAKE

Kʼalal laj yalik jchanubtasvanejetik ta Mantal xchiʼuk jfariseoetik ti maʼuk ta sjuʼel Dios tslokʼes pukujetik li Jesuse, xuʼ me xchopol kʼopojik ta stojolal li chʼul espiritue. Vaʼun chaʼa, ¿buchʼu van ta stojolal oyik, mi ta stojolal Dios o mi ta stojolal Satanas? Xi laj yal li Jesuse: «Akʼo lekuk tajek sat xakʼ avuʼunik li lekil teʼe, o mi moʼoje, akʼo chopoluk sat xakʼ avuʼunik li chopol teʼe, yuʼun ta sat chvinaj ti kʼu yelan li teʼe» (Mateo 12:33).

Kʼalal tslokʼes pukujetik li Jesuse xkoʼolaj kʼuchaʼal lek sat chakʼ li teʼ xkaltike. Jaʼ yuʼun toj bolik kʼalal chalik ti jaʼ la ta skoj ti chtun ta stojolal Satanas ti xuʼ yuʼun spasel taje. Jaʼ jech kʼuchaʼal jamal laj yal Jesus li ta Mantaletik ta Vitse, kʼalal muʼyuk kʼoʼ li teʼe lek sat chakʼ. Pe kʼalal jech la sabeik smul Jesus li jfariseoetike, ¿kʼu yelan chakʼ satik xkaltik kʼuchaʼal li jtekʼ teʼe? Jaʼ ti kʼoʼ tsatinike. Xi albatik yuʼun li Jesuse: «Stsʼunbaltak veneno chon, ¿kʼuxi xa noʼox ti lek kʼusitik chavalik ti toj chopoloxuke? Yuʼun jaʼ chlokʼ ta aveik li kʼusitik oy ta avoʼontonike» (Mateo 7:16, 17; 12:34).

Jaʼ jech ta melel, jaʼ me chvinaj-o kʼusi oy ta koʼontontik li kʼusi chlokʼ ta ketike xchiʼuk jaʼ me chkichʼtik-o chapanel xtok. Jaʼ yuʼun xi laj yal li Jesuse: «Chkalboxuk avaʼiik ti te chichʼik chapanel ta Skʼakʼalil Chapanel li krixchanoetik ti mu kʼusi xtun-o li kʼusitik chalike, yuʼun tukʼ akʼoplal chavichʼ albel ta skoj akʼopojel, xchiʼuk ta skoj akʼopojel chata amul» (Mateo 12:36, 37).

Akʼo mi laj xaʼox spas skʼelobiltak juʼelal li Jesuse, xi la skʼanbeik Jesus li jchanubtasvanejetik ta Mantal xchiʼuk jlom jfariseoetike: «Jchanubtasvanej, ta jkʼankutik ti xapas junuk [senyaile]». Akʼo mi laj yil o mi muʼyuk bu laj yil ta sat stukik, naka jaʼ buchʼutik chalbe skʼoplal li kʼusitik tspas Jesuse. Jaʼ yuʼun xi laj yalbe li jbabeetik ta relijion yuʼun judaetike: «Li jkʼol kuxlejal ti toj chopol liʼe xchiʼuk ti muʼyuk tukʼ chakʼ sba ta stojolal Diose yakalik-o ta sabel junuk senyail, pe muʼyuk bu ch-akʼbat yilik junuk senyail, jaʼ noʼox li senyail j-alkʼop Jonase» (Mateo 12:38, 39).

Sventa xaʼibeik lek smelolale, xi laj yal Jesus ti kʼusi skʼan xal taje: «Jech kʼuchaʼal te tikʼil kom oxib kʼakʼal xchiʼuk oxib akʼobal ta xchʼut mukʼta choy li Jonase, jaʼ jech oxib kʼakʼal xchiʼuk oxib akʼobal te tikʼil chkom ta yoʼonton balumil li Xnichʼon krixchano eke». Kʼalal bikʼat yuʼun jtos mukʼta choy li Jonase xetaat lokʼel, xkoʼolaj kʼuchaʼal chaʼkuxi xkaltik. Jaʼ jech kak laj yal Jesus ti chchame xchiʼuk ti chchaʼkuxi ta yoxibal kʼakʼale. Kʼalal mi sta skʼakʼalil ti jech chkʼot ta pasele, li jbabeetik ta relijion yuʼun judaetike muʼyuk bu chchʼunik «li senyail j-alkʼop Jonase», jaʼ yuʼun muʼyuk bu tsutes yoʼontonik xchiʼuk muʼyuk bu tsjel stalelalik (Mateo 27:63-66; 28:12-15). Pe kʼalal cholbatik mantal yuʼun Jonas «li  krixchanoetik ta Ninivee» la sutes yoʼontonik. Jaʼ yuʼun chakʼik ta ilel ti oy smul li jkʼol kuxlejal liʼe. Li Jesuse laj yalbe skʼoplal xtok li meʼ ajvalil ta Sebae, ti jaʼ jech chakʼ ta ilel ek ti oy smul li jkʼol kuxlejale. Yuʼun li ants taje laj yakʼ ta ilel ti oy ta yoʼonton chchikintabe spʼijil li ajvalil Salomone xchiʼuk labal sba laj yil. Vaʼun xi laj yal li Jesuse: «Oy to buchʼu liʼ oy ti mas mukʼ skʼoplale, ti jaʼ mu sta li Salomone» (Mateo 12:40-42).

Oy to kʼusi laj yalbe skʼoplal li Jesuse, yuʼun la skoʼoltas ta jun vinik ti lokʼ jun ibal sba pukuj ta stojolal li jkʼol kuxlejal ti toj chopol taje (Mateo 12:45). Pe ta skoj ti muʼyuk bu jaʼ la snojes ta yoʼonton kʼusi lek li vinike, sut tal li pukuje, laj yikʼ tal vukvoʼ pukujetik ti mas to toj chopolike, ti jaʼ mu sta li stuke, vaʼun laj yuʼuninik li vinik taje. Jech kʼuchaʼal laj yichʼ lokʼesbel ibal sba pukuj li vinik taje, jaʼ jech laj yichʼ sakubtasel xchiʼuk laj yichʼ tukʼibtasel li steklumal Israele. Pe la spʼajik li yaj-alkʼoptak Diose, yuʼun kʼalal ta Jesus la skontrainik ti jamal xvinaj ti yichʼojbe xchʼul espiritu Diose. Taje jaʼ chakʼ ta ilel ti mas to toj tsots chil svokol li jkʼol kuxlejale, ti jaʼ mu sta li ta slikebale.

Kʼalal yakal chkʼopoj li Jesuse, jaʼo te kʼot smeʼ xchiʼuk yitsʼinabtak, te vaʼiik ta spat li epal krixchanoetike. Xi laj yalbeik Jesus li buchʼutik te nopol chotolik ta stsʼele: «Li ameʼ xchiʼuk avitsʼinabe te vaʼalik ta pana, yuʼun tskʼan tskʼelikot». Vaʼun jaʼo laj yakʼ ta ilel ti kʼu to yepal skʼanoj li yajchankʼoptake, ti jaʼ mas to sbankiltak, yitsʼinabtak, xvixobtak, yixleltak xchiʼuk smeʼ chaʼi li yajchankʼoptake. La syeʼ batel skʼob ti bu oyike, xi laj yale: «Liʼe jaʼ jmeʼ xchiʼuk jaʼ jbankil kitsʼinabtak, yuʼun chaʼiik li skʼop Diose xchiʼuk tspasik li kʼusi chale» (Lukas 8:20, 21). Jaʼ jech laj yakʼ ta ilel Jesus ti toj echʼ xa noʼox sbalil chil ti lek xil sba xchiʼuk li yajchankʼoptake, ti jaʼ xkom to sbalil ti kʼu yelan xil sba xchiʼuk li yutsʼ yalale. Batsʼi tspat tajek koʼontontik ti jaʼ jech toj lek xkil jbatik xchiʼuk li kermanotaktike, mas to tspat koʼontontik kʼalal oy buchʼutik mu xchʼunik li kʼusi chkaltike, kʼalal oy buchʼutik tskontrainutike xchiʼuk kʼalal mu skʼanik li kʼusitik lek ta jpastike.