Kʼelo li kʼusi yichʼoje

Batan ta saʼobil

 KAPITULO 63

Tojobtasatik yuʼun Jesus li jtakboletike

Tojobtasatik yuʼun Jesus li jtakboletike

MATEO 18:6-20 MARKOS 9:38-50 LUKAS 9:49, 50

  • ALBATIK TI MU ME SMAKBEIK YOK YANTIKE

  • MI OY JUNUK ERMANO TI TSPAS SMULE

Naka to laj yakʼ ta ilel Jesus ti skʼan bikʼit xakʼ sbaik li yajtsʼaklomtake. Skʼan jechuk xil sbaik kʼuchaʼal li ololetike, ti manxouk stalelalike xchiʼuk ti mu saʼ mukʼ skʼoplalike. Yuʼun skʼan xchʼunik li kʼusi xi albatik yuʼun Jesuse: «Li buchʼu tstsak ta venta junuk uni olol ta jbi jech kʼuchaʼal liʼe, yakal me tstsakun ta venta ek» (Mateo 18:5).

Ta skoj ti jaʼ to la svulilan sbaik li jtakboletik ta sventa ti buchʼu mas mukʼ skʼoplal yuʼunike, utel van laj yaʼiik li kʼusi albatik yuʼun Jesuse. Pe oy kʼusi naka to laj yilik, jaʼ yuʼun xi laj yal li jtakbol Juane: «Oy buchʼu laj kilkutik ti yakal tslokʼes pukujetik kʼalal tstunes abie, laj ox jpajeskutik, yuʼun maʼuk jchiʼiltik ta xanbal» (Lukas 9:49).

¿Mi yuʼun van tsnop Juan ti jaʼ noʼox akʼbil yabtelik sventa xpoxtaik jchameletik o slokʼesik pukujetik li jtakboletike? Mi jeche, ¿kʼuxi xa noʼox ti oy sjuʼel li juda vinik sventa tslokʼes li pukujetik ti toj chopolike? Chaʼi noʼox li Juane mu stakʼ ti tspas skʼelobiltak juʼelal li vinik taje, yuʼun muʼyuk bu chchiʼin ta xanbal li Jesus xchiʼuk jtakboletike.

Labal to van sba laj yaʼi Juan ti xi laj yal li Jesuse: «Mu xapajesik, yuʼun li buchʼu spas yuʼun junuk skʼelobil juʼelal ta skoj jbie mu aniluk xa kʼusi chopol chal ta jtojolal. Yuʼun li buchʼu muʼyuk tskontrainutike jmoj koʼontontik xchiʼuk. Yuʼun li buchʼu chakʼboxuk jbochuk voʼ avuchʼik ta skoj ti jaʼ yuʼunoxuk li Kristoe, ta melel chkalboxuk avaʼiik ti ta onoʼox me xichʼ ta persa li smotone» (Markos 9:39-41).

Jaʼ jech, li vaʼ kʼakʼale mu toʼox persauk jmoj xanav xchiʼuk Kristo sventa xkʼot ta yajchankʼop. Yuʼun muʼyuk toʼox bu likem li stsobobbail yajtsʼaklom Kristoe, jaʼ yuʼun maʼuk skʼan xal ti jaʼ jun jkontrainvanej o ti yakal chakʼ ta chanel jecheʼ relijion ta skoj ti muʼyuk chchiʼin ta xanbal Jesus li vinik taje. Ta melel, oy xchʼunel yoʼonton ta sbi Jesus. Jech xtok, li kʼusi laj yal Jesuse chakʼ ta aʼiel ti ta onoʼox me xichʼ ta persa li smotone.

Pe oy to kʼusi tsots skʼoplal skʼan stsakik ta venta li jtakboletike, jaʼ mi smak yok yuʼunik vinik ta skoj li kʼusi chalike xchiʼuk li kʼusi tspasike. Xi laj yal li Jesuse: «Li buchʼu tsmakbe yok junuk li buchʼu bikʼit yakʼoj sba ti oy xchʼunel yoʼontone, jaʼ me mas lek mi tsjokʼanbeik mukʼta ton ta snukʼ jech kʼuchaʼal li bu tsjoyoyin vuroe xchiʼuk ti akʼo yichʼ jipel ochel ta nabe» (Markos 9:42). Vaʼun oy kʼusi laj yalbe yajtsʼaklomtak xtok li Jesuse, jaʼ ti akʼo xtuchʼ lokʼel junuk skʼobik, junuk yokik o ti akʼo spits lokʼel jpʼejuk sbekʼ satik mi chmakbat-o yokike. Manchuk mi toj echʼ xa noʼox ep sbalil li kʼusitik chtuchʼik lokʼel o tspitsik lokʼele. Jaʼ mas lek mi chʼabal junuk yokik o junuk skʼobik x-ochik li ta Ajvalilal yuʼun Diose, jaʼ mas chopol ti sjunul xbat sbekʼtalik ta Jeenae (Stenlejal Inon). Yikʼaluk van yiloj jtakboletik ti te oy ta stsʼel Jerusalen li stenlejaltik ti bu chchikʼik kʼaʼepe, jaʼ yuʼun xaʼibeik lek smelolal ti jaʼ skʼan xal lajelal sbatel osile.

Xi pʼijubtasvan xtok li Jesuse: «Kʼelo me abaik,  mu me xapʼajik junuk li buchʼutik liʼ oy ti bikʼit chakʼ sbaike; yuʼun chkalboxuk avaʼiik ti yaj-anjelik te ta vinajele te skʼelojbeik-o sat li Jtot ta vinajele». ¿Kʼu to yepal sbalil chil Jeova «li buchʼutik [...] bikʼit chakʼ sbaike»? Veno, sventa xchapbe lek smelolal li Jesuse, lik yalbe skʼoplal jun vinik ti oy 100 ta kot xchije, pe ti chʼay yuʼun jkote. Jaʼ yuʼun te laj yikta li 99 ta kot sventa chbat saʼ li yuni chije, vaʼun kʼalal la stae mas to xmuyubaj ta skoj, jaʼ mu sta jech ta stojolal li 99 ta kote. Xi to laj yal li Jesuse: «Jaʼ jech muʼyuk lek chaʼi Jtot ta vinajel ek ti xlaj junuk li buchʼutik liʼ oy ti bikʼit chakʼ sbaike» (Mateo 18:10, 14).

Xi laj yal li Jesuse: «Oyuk me avatsʼamilik xchiʼuk junuk me avoʼontonik ta jujuntal» (Markos 9:50). Jaʼ van jech laj yal ta skoj ti yakal tsnopbe skʼoplal ti la svul sbaik yajtakboltak ta sventa ti buchʼu mas mukʼ skʼoplal yuʼunike. Yuʼun li atsʼame jaʼ chakʼbe smuil jveʼeltik. Kʼalal oy lek yatsʼamil xkaltik li kʼusi chal jun krixchanoe lek me chaʼi yantik li kʼusi chale xchiʼuk jaʼ me jun-o yoʼontonik, ti jaʼ mu jechuk mi naka utbaile (Kolosenses 4:6).

Ta skoj ti oy onoʼox bu chlik kʼop yuʼunike, albatik yuʼun Jesus ti kʼusi stakʼ spasike. Xi albatike: «Mi la saʼ smul ta atojolal li avermanoe, batan, bat kʼopono stuk sventa xavalbe yaʼi li smule. Mi la xchikinta li kʼusi laj avalbee, vaʼun laj xa me akolta sventa jaʼ spas li kʼusi tukʼe». Pe ¿kʼusi van skʼan spas mi mu skʼan xchikinta li yermanoe? Xi tojobtasvan li Jesuse: «Ikʼo batel junuk o chaʼvoʼuk achiʼil sventa jaʼ jech lek chotol xkom li kʼusi chichʼ chapanel kʼalal chkʼopoj chaʼvoʼ o oxvoʼ testigoe». Pe mi mu xchapaj li skʼopike akʼo yalbeik «li tsobobbaile», jaʼ xkaltik, li moletik ti jaʼ oy ta sbaik xchapanele. Pe ¿mi mu skʼan xchikinta li jpasmulil une? Xi laj yal li Jesuse: «Jaʼuk me jech xavil kʼuchaʼal jun jyanlum xchiʼuk jaʼuk me jech xavil kʼuchaʼal jun jtsobpatan». Yuʼun li krixchanoetik taje muʼyuk bu lek ilbilik yuʼun li judaetike (Mateo 18:15-17).

Skʼan me stsakik lek ta mukʼ kʼusi chal Skʼop Dios li jkʼelvanejetik ta tsobobbaile. Mi oy buchʼu tspas smul laj yilike xchiʼuk ti skʼan albel mantale, jaʼ me li ‹kʼusi chukbil xa ta vinajel› li kʼusi chkʼot ta nopel yuʼunike. Pe kʼalal muʼyuk smul tstabeike ‹titunbil xa ta vinajel›. Skotol li kʼusitik taje jaʼ me chtun kʼalal mi lik xaʼox li stsobobbail yajtsʼaklomtak Kristoe. Xi laj yal Jesus ta sventa li kʼusi toj tsots skʼoplal tspasike: «Ti bu oyik chaʼvoʼ o oxvoʼ ta jventae, te oyun ta oʼlol ti bu oyike» (Mateo 18:18-20).