MATEO 9:27-34; 13:54-58 MARKOS 6:1-6

  • LA XPOXTA MAʼSATETIK XCHIʼUK UMAʼETIK LI JESUSE

  • LA SPʼAJIK JESUS LI KRIXCHANOETIK TA NASARETEU

Toj ep yabtel echʼ kʼakʼal li Jesuse. Yuʼun kʼalal sut xaʼox tal ta yosilal Dekapolise, la xpoxta li ants ti mu xmak xchamele xchiʼuk la xchaʼkuxesbe li stseb Jairoe. Pe sak to osil. Jaʼ jech, kʼalal lokʼ xaʼox tal ta sna Jairo li Jesuse te tijil tal chaʼvoʼ maʼsatetik, xi x-avet tskʼanik vokole: «Xnichʼon David, oyuk xkʼuxul avoʼonton ta jtojolalkutik» (Mateo 9:27).

Kʼalal «Xnichʼon David» xutik Jesus li viniketik taje, chakʼ ta ilel ti xchʼunojik ti jaʼ chchoti ta xchotleb ajvalil David xchiʼuk ti jaʼ Mesiase. Yileluke muʼyuk bu la stsak ta mukʼ Jesus ti te x-avlajetike, yuʼun van tskʼel yaʼi mi jpʼel ta yoʼontonik li kʼusi tskʼanike, pe jaʼ jech la spasik un. Kʼalal och batel ta yut na li Jesuse te tijilik ochel ek. Xi jakʼbatike: «¿Mi oy xchʼunel avoʼontonik ti xuʼ kuʼun ta jamboxuk asatike?». Xi la stakʼ ta sjunul yoʼontonike: «Oy, Kajval». Vaʼun pikbat li sbekʼ satike xchiʼuk xi albatike: «Jaʼ jech akʼo kʼotuk ta pasel ta atojolalik ti kʼu yepal oy xchʼunel avoʼontonike» (Mateo 9:28, 29).

¡Ta ora noʼox jam satik! Laj yalbe viniketik ti mu me xalik batel ti poxtaatik yuʼun li Jesuse, jech kʼuchaʼal nopem xaʼi chalbe li krixchanoetike. Pe ta skoj ti xmuyubajik tajeke laj yalbeik batel skʼoplal ta buyuk noʼox.

Vaʼun kʼalal lokʼik batel li chaʼvoʼ viniketik taje, li epal krixchanoetike laj yikʼbeik tal Jesus jun umaʼ vinik ti uʼuninbil yuʼun pukuje. Lokʼesbat pukuj ta stojolal li vinik taje, vaʼun lik kʼopojuk. Toj labal sba laj yil li krixchanoetike, xi laj yalike: «Muʼyuk bu jech xkiltik-o ta Israel kʼuchaʼal liʼe». Pe te oyik ek li jfariseoetike. Mu stakʼ xalik ti mu jechuk ta melel li skʼelobiltak juʼelal tspas Jesuse, pe xi chalik ta sventa li skʼelobil juʼelale: «Jaʼ ta stsatsal ajvalil yuʼun pukujetik ti tslokʼes pukujetike» (Mateo 9:33, 34).

Kʼalal mu toʼox jaluk yechʼele sut ta slumal li Jesuse, ta Nasaret, te xa xchiʼuk echʼel yajchankʼoptak un. Te xa van junuk jabil yechʼel ti ay chanubtasvanuk ta nail tsobobbail tee. Ta slikebale toj labal sba laj yaʼiik krixchanoetik li kʼusi chakʼ ta chanele, pe ta tsʼakale ilinik-o xchiʼuk tsmil ox yaʼiik ta skoj. Akʼo mi jech, oy ta yoʼonton tskolta yaʼi yan velta li krixchanoetik ta slumale.

Bat ta nail tsobobbail sventa chchanubtasvan ta skʼakʼalil Savado li Jesuse. Ep buchʼutik labal to sba laj yaʼiik, xi laj yalike: «¿Bu la sta spʼijil li vinik leʼe xchiʼuk kʼuxi ti tspas skʼelobiltak juʼelale?». Xi chalike: «¿Mi mu jaʼuk van li xnichʼon karpintero leʼe? ¿Mi mu Mariauk sbi li smeʼe chaʼa, mi mu jaʼuk yitsʼinabtak li Santiago, Jose, Simon xchiʼuk li Judase? ¿Mi mu liʼuk nakalik ta jlumaltik li yixleltake? Vaʼun chaʼa, ¿kʼuxi ti spas yuʼun skotol li kʼusitik leʼe?» (Mateo 13:54-56).

Muʼyuk bu tsots skʼoplal chilik Jesus li krixchanoetike. Yuʼun xi tsnopike: «Laj kiltik chʼi yaʼele, ¿kʼuxi xa noʼox ti jaʼ Mesiase?». Akʼo mi oy sprevail ti jaʼ Mesias li Jesuse, ti te tsakal skʼoplal li spʼijil xchiʼuk li skʼelobiltak juʼelal tspase, la spʼajik. Kʼalal ta yutsʼ yalal la smak-o yokik, jaʼ yuʼun xi laj yale: «Jaʼ noʼox muʼyuk ichʼbil ta mukʼ ta slumal stuk xchiʼuk ta sna li j-alkʼope» (Mateo 13:57).

Jaʼ jech, toj labal sba laj yil Jesus ti chʼabal xchʼunel yoʼontonike. Jaʼ yuʼun mi junuk skʼelobil juʼelal la spas te, «jaʼ noʼox laj yakʼ skʼob ta stojolal jayibuk buchʼutik ipik xchiʼuk la poxtaan» (Markos 6:5, 6).