Kʼelo li kʼusi yichʼoje

Batan ta saʼobil

 KAPITULO 64

Skʼan xkakʼtik perton

Skʼan xkakʼtik perton

MATEO 18:21-35

  • ¿MI VUKUB NOʼOX VELTA CHKAKʼTIK PERTON?

  • SKʼOPLAL JUN MOSOIL TI MUʼYUK XKʼUXUL YOʼONTONE

Laj xa yaʼi Pedro li mantal laj yal Jesus ti kʼuxi ta chapanel li jkʼoptik xchiʼuk ermanoetike, ti skʼan jchapantik ta jujuntale. Pe li kʼusi tskʼan tsnaʼ yaʼel li Pedroe jaʼ ti jayib velta skʼan xakʼbe yipal ta xchapanel li kʼope.

Jaʼ yuʼun xi la sjakʼe: «Kajval, ¿jayib to velta skʼan jpasbe perton kʼalal tsaʼ smul ta jtojolal li kermanoe? ¿Mi vukub to velta?». Jlom jnitvanejetik ta relijione chakʼik ta chanel ti skʼan oxib to velta x-akʼvanik ta pertone. Jaʼ yuʼun toj echʼem van slekil yoʼonton chaʼi Pedro mi «vukub to velta» chakʼ ta perton li yermanoe (Mateo 18:21).

Pe ti chichʼ chapel jayib velta tspas smul li jun krixchanoe mu snit sba ta melel xchiʼuk li kʼusitik chakʼ ta chanel Jesuse. Jaʼ yuʼun xi la stukʼibtas li Pedroe: «Muʼyuk chkalbot ti vukub to ta veltae, moʼoj, 77 to ta velta» (Mateo 18:22). Jaʼ xkaltik, ti muʼyuk spajeb skʼan xakʼ ta perton li yermanoe. Jaʼ yuʼun skʼan mu xchap echʼel Pedro ti jayib velta skʼan x-akʼvan ta pertone.

Vaʼun sventa xkom lek ta sjolik ti skʼan x-akʼvanik ta perton li Pedro xchiʼuk li buchʼutik te chaʼiik mantale, albatik jun lokʼolkʼop yuʼun li Jesuse. Jaʼ ta sventa jun moso ti muʼyuk la xchanbe slekil talelal yajval ti lek snaʼ xkʼuxubinvane. Li ajvalil taje tskʼan ti akʼo sutes yil li smosotake. Oy jun smoso ti oy lajunmil talento yil yuʼune. Taje smakoj 60 miyon ta sep denario. Ta skoj ti toj ep li yile, batsʼi mi jaʼuk sut yuʼun yil li mosoil taje. Jaʼ yuʼun sventa sut li yile, albat yuʼun yajval ti akʼo yichʼ chonel li stuke, li yajnile xchiʼuk li xnichʼnabe. Jech oxal la skejan sba li mosoile, xi la skʼanbe vokol li yajvale: «Malabun to, ta jsutesbot skotol» (Mateo 18:26).

Kʼuxubaj ta yoʼonton smoso li ajvalile, jaʼ yuʼun ta slekil yoʼonton la xchʼaybe li yile. Vaʼun kʼalal laj yoʼontonike lokʼ batel li mosoil taje, te la snup ta be jun xchiʼil ta mosoil ti oy 100 denario yil yuʼune.  Pe la stsak li xchiʼil ta mosoile, la xmichʼbe snukʼ xchiʼuk xi laj yalbee: «Tojbun skotol li avile». Jech oxal la skejan sba li xchiʼil ta mosoile, xi lik skʼan vokole: «Malabun to, ta jsutesbot» (Mateo 18:28, 29). Pe li mosoil ti chʼaybat yile muʼyuk bu xchanbe stalelal li yajvale. Yuʼun bat stikʼ ta chukel li xchiʼil ta mosoile, jaʼ to tslokʼes mi toj yuʼun li yile, manchuk mi jaʼ mas juteb tajek li yile.

Laj yal Jesus ti laj yilik li xchiʼiltak ta mosoil li kʼusi chopol kʼot ta pasele, bat yalbe yajvalik. Jaʼ yuʼun ch-ilin tajek la stak ta ikʼel mosoil li ajvalile xchiʼuk xi laj yalbee: «Chopol mosoilot ta jyalel, la jchʼaybot skotol li avil kʼalal xavokolet la-ay ta jtojolale. ¿Kʼu yuʼun ti muʼyuk xkʼuxubaj ta avoʼonton li achiʼil ta mosoil jech kʼuchaʼal laj kakʼ ta ilel xkʼuxul koʼonton ta atojolale?». Ta skoj taje ilin tajek li yajvale, bat yakʼ ta skʼob jchukvanejetik li mosoil ti chʼabal xkʼuxul yoʼontone, jaʼ to tslokʼes mi la stoj skotol li yile. Vaʼun xi la stsutses sloʼil li Jesuse: «Jaʼ me jech tspasboxuk Jtot ta vinajel ek mi mu ta sjunuluk avoʼontonik chapasbe abaik perton ta jujuntal xchiʼuk li avermanotakike» (Mateo 18:32-35).

¡Toj echʼ xa noʼox lek la xchanubtasutik Jesus ti kʼu yelan skʼan xkakʼ jbatik ta pertone! Yuʼun toj echʼem xa noʼox spasojbutik perton jmultik li Diose. Jaʼ yuʼun kʼalal tspas smul ta jtojolaltik junuk kermanotike, batsʼi mi jaʼuk sta kʼuchaʼal li jmultik ta stojolal Diose. Jaʼ jech, ta smilal xa noʼox velta tspasutik ta perton li Jeovae. Jech oxal chaʼa, ¿mi mu skʼanuk van ep ta velta jpasbe perton kermanotaktik akʼo mi oy kʼusi toj chopol spasojbutik? Jech kʼuchaʼal laj yakʼ ta chanel Jesus li ta Mantaletik ta Vitse ‹tspasbutik perton kiltik Dios jech kʼuchaʼal ta jpasbetik perton li buchʼutik oy yil kuʼuntike› (Mateo 6:12).