Kʼelo li kʼusi yichʼoje

Sventa xasut ta xchibal pajina

Batan ta saʼobil

Stestigotak Jeova

tsotsil

Li Jesuse: jaʼ li bee, jaʼ li melele, jaʼ li kuxlejale

 KAPITULO 30

Lek xil sba xchiʼuk Stot li Jesuse

Lek xil sba xchiʼuk Stot li Jesuse

JUAN 5:17-47

  • LI STOT JESUSE JAʼ LI DIOSE

  • ALBIL LEK SKʼOPLAL TI OY CHAʼKUXESELE

Lik sabeik smul Jesus li judaetik ta skoj ti la xpoxta jun vinik ta Savadoe. Pe xi albatik yuʼun li Jesuse: «Yakal-o ta abtel Jtot li avie, jech oxal yakalun-o ta abtel ek» (Juan 5:17).

¿Mi chal Smantal Dios ti chopol li kʼusi la spase? Muʼyuk bu jech chal. Yuʼun li cholmantal tspase xchiʼuk ti chpoxtavane jaʼ chakʼ ta ilel ti jech lekik kʼusi tspas li Diose. Jaʼ jech, skotol kʼakʼal tspas kʼusitik lek li Jesuse. Pe li kʼusi laj yalbe li buchʼutik tsabat smule mas to ilinik-o, jaʼ yuʼun tskʼan ox tsmilik. ¿Kʼu yuʼun ti ch-ilinik tajeke?

Yuʼun maʼuk noʼox chopol chilik ti la xpoxta jun vinik ta Savadoe, chopol chaʼiik xtok ti chal Jesus ti jaʼ la Stot li Diose. Yuʼun la jaʼ svinajeb ti chchopol kʼopta Dios kʼalal chal ti jaʼ Stot li Jeovae, jaʼ la chakʼ ta aʼyel chaʼiik ti koʼol xchiʼuk Diose. Pe muʼyuk bu xiʼ li Jesuse, laj to xchapbe lek smelolal ti toj lek xil sba xchiʼuk li Diose. Xi laj yale: «Kʼux chaʼi Nichʼonil li Totile xchiʼuk chakʼbe yil skotol li kʼusitik tspas stuke» (Juan 5:20).

Yakʼoj ta ilel ti jaʼ J-akʼkuxlejal li Jeovae, yuʼun laj yakʼbe sjuʼel viniketik yoʼ xchaʼkuxesvanik ta voʼne. Xi laj yal li Jesuse: «Jech kʼuchaʼal tstoy likel xchiʼuk chakʼbe xkuxlejal animaetik li Totile, jaʼ jech ek li Nichʼonile chakʼbe xkuxlejal ti buchʼu tskʼan chakʼbee» (Juan 5:21). ¡Tspat tajek koʼontontik li kʼusi laj yale, yuʼun jech chkʼot ta pasel ta mas tsʼakal! Akʼo mi jech, li avie ta xa onoʼox xchaʼkuxes krixchanoetik ta mantal. Jaʼ yuʼun xi laj yale: «Tsta xkuxlejal sbatel osil li buchʼu chaʼi kʼusi chkale xchiʼuk ti chakʼ xchʼunel yoʼonton ta stojolal li Buchʼu la stakun tale, jech xtok muʼyuk chichʼ chapanel, yuʼun kom xa yuʼun li lajelale, jelav xa ta kuxlejal» (Juan 5:24).

Ti vaʼ ora chloʼilajike muʼyuk toʼox buchʼu xchaʼkuxesoj li Jesuse. Akʼo mi jech, jamal albatik yuʼun Jesus li buchʼutik tsabeik smul ti jpʼel skʼoplal oy chaʼkuxesele. Xi albatike: «Chkʼot yorail ti skotol li buchʼutik oy ta smukinalike chaʼibeik yechʼomal ye, vaʼun chlokʼik tal» (Juan 5:28, 29).

Akʼo mi toj tsots yabtel yichʼoj li Jesuse, jamal laj yalbe smelolal ti skʼan xchʼunbe smantal Diose. Xi laj yale: «Mu xuʼ kuʼun spasel jtosuk kʼusi ti chlokʼ ta koʼonton jtuke [...], yuʼun maʼuk ta jsaʼ li kʼusi tskʼan koʼonton jtuke, jaʼ li kʼusi tskʼan yoʼonton li buchʼu la stakun tale» (Juan 5:30). Jech xtok, laj yalbe smelolal ti kʼusi yabtel ta sventa li kʼusi oy ta yoʼonton tspas Jeovae, ti muʼyuk toʼox bu jech jamal yaloje. Pe maʼuk noʼox sprevail ti melel li kʼusitik ta sventa Jesus taje, oy to yan xtok. Xi la svulesbe ta sjol li krixchanoetike: «Li voʼoxuke la atakik batel viniketik ta stojolal Juan [J-akʼ-ichʼvoʼ], vaʼun laj yalbe skʼoplal li kʼusi melele» (Juan 5:33).

Laj van yaʼiik li buchʼutik tsabeik smul Jesus li kʼusi laj yalbe jbabeetik ta relijion yuʼun judaetik leʼ xa ta xchibal jabil li Juane, ti xi chichʼ biiltasel li buchʼu chtal ta tsʼakal yuʼune: «Li Kristoe» xchiʼuk ‹li J-alkʼope› (Juan 1:20-25). Vaʼun li Jesuse la svulesbe ta sjol li buchʼutik tsabat smul ti laj yichʼik ta mukʼ li kʼusi laj yal Juane, ti tikʼil xa ta chukel li avie, xi laj yale: «Oy ta avoʼontonik ti lamuyubajik tajek yuʼun kʼuk sjalil li slusale» (Juan 5:35). Akʼo mi jech, jaʼ mas to mukʼ sprevail chakʼ ta ilel li Jesuse, jaʼ mu sta li Juan J-akʼ-ichʼvoʼe.

Xi laj yale: «Li abtelaletik ta jpas jtuke [ti te tsakal skʼoplal li vinik ti naka to la xpoxtae], jaʼ chakʼ ta ilel ti jaʼ la stakun tal li Totile». Xi to laj yale: «Laj yal jkʼoplal ek li Totil ti buchʼu la stakun tale» (Juan 5:36, 37). Jech kʼuchaʼal liʼe, li Jeovae laj yalbe skʼoplal Jesus kʼalal laj yichʼ voʼe (Mateo 3:17).

Ta melel, muʼyuk srasonal ti tspʼajik li Jesuse.  Yuʼun te chalbe skʼoplal Jesus li Tsʼibetik ti tskʼelbeik lek skʼoplal chalike. Xi la stsutses sloʼil li Jesuse: «Ti avakʼojuk xchʼunel avoʼontonik ta stojolal Moisese, chavakʼ xchʼunel avoʼontonik ta jtojolal ek ti jechuke, yuʼun jaʼ la stsʼibabun jkʼoplal. Pe mi mu xachʼunik li kʼusitik la stsʼibae, ¿kʼuxi xa noʼox chachʼunik li kʼusi chkale?» (Juan 5:46, 47).