Kʼelo li kʼusi yichʼoje

Batan ta saʼobil

 KAPITULO 39

Abol sba li jkʼol kuxlejal ti muʼyuk la xchʼune

Abol sba li jkʼol kuxlejal ti muʼyuk la xchʼune

MATEO 11:16-30 LUKAS 7:31-35

  • LAJ YAL JESUS TI MUʼYUK LEK STALELAL JLOM JTEKLUMETIKE

  • CHAKʼ SIKETEL KOʼONTONTIK LI JESUSE

Yichʼoj ta mukʼ Juan J-akʼ-ichʼvoʼ li Jesuse, pe ¿mi jaʼ van jech yichʼojik ta mukʼ ek li yan krixchanoetike? Xi laj yal li Jesuse: «Li jkʼol kuxlejal liʼe [...] koʼol kʼuchaʼal uni ololetik ti chotajtik ta chʼivit ti chapta xchiʼiltakik ta tajimole, xi chalike: ‹La jupankutik avaʼiik amay, pe muʼyuk xa-akʼotajik, kʼalal xi-avetkutik ta at-oʼontone muʼyuk bu la amaj stiʼ avoʼontonik ta at-oʼonton›» (Mateo 11:16, 17).

¿Kʼusi smelolal li kʼusi laj yal Jesuse? Xi chalbe smelolale: «Muʼyuk bu xveʼ tal xchiʼuk muʼyuk bu x-uchʼbolaj tal li Juane, pe xi chalike: ‹Ochem pukuj ta yoʼonton›. Li Xnichʼon krixchanoe chveʼ tal xchiʼuk ch-uchʼbolaj tal, pe xi chalike: ‹¡Kʼelo avilik! Jaʼ jun vinik ti mu x-echʼ yoʼonton ta veʼel xchiʼuk ta yuchʼel vinoe, jaʼ yamigo jtsobpatanetik xchiʼuk jpasmuliletik›» (Mateo 11:18, 19). Yan li Juane lek noʼox sba xkuxlejal echʼ kʼuchaʼal jnasaretal vinik, yuʼun mi jaʼuk bu laj yuchʼ vino, jech oxal li jkʼol kuxlejal taje laj yal ti ochem pukuj ta stojolale (Números 6:2, 3; Lukas 1:15). Pe li Jesuse jaʼ jech kuxi kʼuchaʼal yan krixchanoetike. Ta skoj ti chveʼ xchiʼuk ti ch-uchʼbolaj ta spʼisol noʼoxe, laj yalik ti chbat ta mase. Kʼuchaʼal chkiltike, mu kʼusi skʼan li krixchanoetike.

Li Jesuse laj yal ti «koʼol kʼuchaʼal uni ololetik ti chotajtik ta chʼivit» li jkʼol kuxlejal liʼe, ti mu skʼan xbatik ta akʼot kʼalal la sjupanik amay li yan ololetike o ti muʼyuk skʼan xbat skʼelik kʼalal ch-okʼ li yantike. Xi laj yale: «Manchuk mi jech, li pʼijilale chvinaj ti tukʼ skʼoplal ta skoj li yabteltake» (Mateo 11:16, 19). Jech, ‹li yabteltak› laj yakʼik ta ilel li Juan xchiʼuk Jesuse jaʼ chakʼ ta ilel ti mu jechuk li smul tikʼbatike.

Kʼalal laj xaʼox yal Jesus ti mu xchʼun li jkʼol kuxlejal taje, lik yalbe tsatsal mantal li steklumal Korasin, Betsaida xchiʼuk li Kapernaume, ti jaʼ te ti bu ep la spas skʼelobiltak juʼelale. Ti teuk la la spas li skʼelobiltak juʼelal ta Fenisia lumetik ta Tiro xchiʼuk Sidone laj la sutes yoʼontonik ti jechuke. Jaʼ jech laj yalbe skʼoplal li Kapernaum eke, ti jaʼ tetik nopem xaʼi chvaye. Akʼo mi jech, jutuk mu skotoluk li krixchanoetik tee muʼyuk bu la xchʼunik. Xi laj yal ta sventa li lum taje: «Mas to me tsots chavil avokolik li ta Skʼakʼalil Chapanele, jaʼ tsʼikbaj to chaʼi li yosilal Sodomae» (Mateo 11:24).

Vaʼun la skʼupil kʼopta Stot li Jesuse, yuʼun muʼyuk bu chakʼbe yil melel mantaletik «li buchʼutik pʼijik xchiʼuk li buchʼutik lek snaʼike». Jaʼ chakʼbe yil li buchʼutik bikʼit chakʼ sbaik ti xkoʼolajik kʼuchaʼal uni ololetike (Mateo 11:25). Xi kʼupil sba tstak ta ikʼel li krixchanoetik ti bikʼit yakʼoj sbaike: «Laʼik ta jtojolal akotolik, voʼoxuk ti tsots tajek cha-abtejike xchiʼuk ti ol avikatsike, voʼon ta jsikubtas avoʼontonik. Jaʼ kuchik li kʼatlom teʼ kuʼune xchiʼuk chanbeikun jtalelal, yuʼun manxoun xchiʼuk bikʼit kakʼoj jba, vaʼun chata siketel avoʼontonik. Yuʼun li kʼatlom teʼ kuʼune kʼun ta kuchel xchiʼuk muʼyuk bu ol li kikatse» (Mateo 11:28-30).

¿Kʼuxi ti chakʼ siketel oʼontonal li Jesuse? Li jbabeetik ta relijione toj ol chakʼbeik yikats krixchanoetik xkaltik kʼalal chalbeik ti akʼo spasik ta persa li kʼusitik nopem xaʼiik spasele, jech kʼuchaʼal ti mu xa ta smeloluk ti kʼu yelan chchabiik li Savadoe. Pe kʼalal chakʼ ta chanel Jesus li kʼusitik melel ta sventa Diose chakʼbe siketel yoʼontonik, vaʼun jaʼ jech mu sok xkuxlejalik ta skoj li kʼusitik nopem xaʼi spasel li krixchanoetike. Jech xtok, chakʼ ta ilel kʼuxi xuʼ sta spatobil yoʼontonik li buchʼutik abol sba chaʼiik ta skoj ti tsots tspasvanik ta mantal li buchʼutik oy yabtelike xchiʼuk li buchʼutik chopol chaʼi sbaik ta skoj li mulile. Jaʼ jech, laj yal Jesus kʼuxi xuʼ spasbat perton li smulike  xchiʼuk kʼusi skʼan spasik sventa lek xil sbaik xchiʼuk li Diose.

Skotol li buchʼutik chchʼunik li takel ta ikʼel ti ta slekil yoʼonton laj yal li Jesuse, xuʼ xakʼ sbaik ta stojolal Dios xchiʼuk ti xtunik ta stojolal li jkʼuxubinvanej Totil kuʼuntik ta vinajel ti echʼem slekil yoʼontone. Kʼalal ta jpastik taje, maʼuk me alal ikatsil chkaʼitik, yuʼun muʼyuk bu vokol ta chʼunbel li smantaltak Diose (1 Juan 5:3).