LUKAS 17:11-19

  • LI JESUSE LA XPOXTA LAJUNVOʼ VINIKETIK TI IPIK TA KʼAʼEMAL CHAMELE

Te batik jayibuk kʼakʼal ta jteklum Efrain li Jesus xchiʼuk yajchankʼoptake, ti te xkom ta snoroesteal Jerusalene. Vaʼun jaʼ jech muʼyuk bu xmilat yuʼun li Sanedrine (Juan 11:54). Pe poʼot xkʼot skʼakʼalil li kʼin Koltael ta sjabilal 33 ta jkʼakʼaliltike, jaʼ yuʼun skʼan xlokʼ tal te li Jesuse. Vaʼun bat xchiʼuk yajchankʼoptak ta norte li Jesuse, ta Galilea, te echʼ xtuchʼik li steklumal Samariae. Pe ta skoj ti poʼot xa xchame slajeb xa velta te bat.

Vaʼun kʼalal naka lik batel ta xanbal sventa chbat ta jujun lum li Jesuse, te la snup ta be lajunvoʼ viniketik ti ipik ta kʼaʼemal chamele. Ep ta tos kʼu yelan li kʼaʼemal chamele, junantike ta kʼunkʼun van xloʼet likel yuʼun ta skʼaʼemal li jchikintike, li jkʼobtike o li koktike (Números 12:10-12). Chal Smantal Dios ti akʼo xi x-avan li buchʼu ip ta kʼaʼemal chamel sventa muʼyuk buchʼu xnopaj ta stojolale: «Chopolun, chopolun» (Levítico 13:45, 46).

Ta skoj ti chchʼunik kʼusi chal Mantal li buchʼutik ip ta kʼaʼemal chamele, muʼyuk bu xnopajik tajek ta stojolal li Jesuse. Jech oxal xi tsots avanike: «¡Jesus, Jchanubtasvanej, oyuk xkʼuxul avoʼonton ta jtojolalkutik!». Vaʼun xi laj yal Jesus kʼalal laj yil li viniketike: «Batanik, bat akʼo abaik ta ilel ta stojolal li paleetike» (Lukas 17:13, 14). Laj yakʼ ta ilel Jesus ti yichʼojbe ta mukʼ li Smantal Diose, yuʼun jaʼ chal paleetik mi sakik xa kʼuchaʼal chal Mantal li buchʼutik ip ta kʼaʼemal chamel kʼalal kol xa li xchamelike. Vaʼun xuʼ xa xchiʼin li buchʼutik muʼyuk ipik mi laj xaʼox yal jech li paleetike (Levítico 13:9-17).

Oy xchʼunel yoʼontonik ta stojolal Jesus ti oy sjuʼel sventa xpoxtabat li skʼaʼemal chamelike. Jaʼ yuʼun bat skʼelik li paleetike, manchuk mi muʼyuk to bu poxtajemik. Pe oy kʼusi kʼot ta pasel kʼalal jaʼo yakal chanavik batel ta skoj ti oy xchʼunel yoʼontonike. ¡Jaʼ to chaʼiik xchiʼuk chilike poxtajik xa!

Kʼalal jaʼo stamoj batel sbeik li viniketik ti poxtajike, oy jun ti sut batel sventa chbat saʼ li Jesuse, taje jaʼ jun jsamaria vinik. ¿Kʼu yuʼun? Yuʼun li kʼusi oy ta yoʼontone jaʼ ti chbat stojbe ta vokol ti poxtaate. «Tsots x-avet tal sventa tstoybe skʼoplal Dios», yuʼun snaʼoj ti jaʼ koliyal ti poxtaj xae (Lukas 17:15). Jaʼ yuʼun kʼalal la sta li Jesuse la skejan sba ta stojolal xchiʼuk la stojbe ta vokol.

Xi laj yal li Jesuse: ‹Lajunvoʼ ti laj yichʼik poxtaele, ¿mi mu jechuk? Vaʼun chaʼa, ¿bu oyik li balunvoʼe? ¿Mi muʼyuk buchʼu yan sut tal sventa tstoybe skʼoplal Dios, ti jaʼ noʼox sut tal li jyanlum vinik liʼe?›. Vaʼun xi laj yalbe jsamaria vinik li Jesuse: «Likan, tamo batel abe, lapoxtaj xa ta skoj li xchʼunel avoʼontone» (Lukas 17:17-19).

Kʼalal la xpoxta lajunvoʼ viniketik li Jesuse jaʼ te laj yakʼ ta ilel ti koltabil yuʼun li Jeova Diose. Pe maʼuk noʼox poxtaj li jsamaria vinike, yuʼun xuʼ sta xkuxlejal sbatel osil xtok. Muʼyuk bu yakal tspas skʼelobiltak juʼelal Dios avi ti jaʼ tstunes li Jesuse. Akʼo mi jech, ta me jtatik kuxlejal sbatel osil mi oy xchʼunel koʼontontik ta stojolal li Jesuse. Jaʼ yuʼun chaʼa, ¿mi jaʼ van jech oy ta koʼontontik ta jtojtik ta vokol jech kʼuchaʼal la stoj ta vokol li jsamaria vinike?