Kʼelo li kʼusi yichʼoje

Batan ta saʼobil

 KAPITULO 97

Lokʼolkʼop ta sventa li j-abteletik ta tsʼusubtike

Lokʼolkʼop ta sventa li j-abteletik ta tsʼusubtike

MATEO 20:1-16

  • LI J-ABTELETIK TI «SLAJEB» KʼOTIK TA TSʼUSUBTIKE JAʼ KʼOTIK TA «BAʼYEL»

Li Jesuse naka to laj yalbe krixchanoetik ta Perea ti «ep ti buchʼutik baʼyel oyike jaʼ chkʼotik ta slajeb, li buchʼutik ta slajeb oyike jaʼ chkʼotik ta baʼyel» (Mateo 19:30). Vaʼun laj yal jun lokʼolkʼop ta sventa j-abteletik ta tsʼusubtik yoʼ sjambe lek smelolal taje, xi laj yale:

«Li Ajvalilal ta vinajele xkoʼolaj kʼuchaʼal jun yajval na ti sob tajek lokʼ batel sventa tsaʼ sviniktak yoʼ x-abtejik ta stsʼusubtake. Kʼalal laj xaʼox xchap skʼop xchiʼuk li j-abteletik ti jun denario tstoj ta jun kʼakʼale, la stakan batel li ta stsʼusubtake. Kʼalal lokʼ batel xtoke, te van ta yoxibal ora, te laj yil yantik ti te vaʼajtik ta chʼivit ti chʼabal yabtelike; vaʼun xi laj yalbee: ‹Batanik li ta kabtel ta tsʼusubtik eke, vaʼun jaʼ jech yepal chkakʼboxuk ti kʼu yepal sta-o chavichʼik tojel chkile›. Jech oxal batik. Te une bat yan velta te van ta svakibal ora xchiʼuk ta sbalunebal ora, vaʼun jaʼ jech la spas xtok. Ta slajebal xa une, lokʼ batel te van ta xbuluchibal ora xchiʼuk te vaʼajtik la sta yantik, vaʼun xi laj yalbe li viniketike: ‹¿Kʼu yuʼun ti liʼ vaʼaloxuk-o sjunul kʼakʼal ti chʼabal avabtelike?›. Xi la stakʼike: ‹Yuʼun muʼyuk buchʼu yalojbunkutik abtel›. Xi albatike: ‹Batanik ta kabtel ta tsʼusubtik ek›.» (Mateo 20:1-7.)

Kʼalal «Ajvalilal ta [vinajel]» xchiʼuk «yajval na» xi li Jesuse, jaʼ van chtal ta sjolik Jeova Dios li krixchanoetike. Yuʼun jamal chal Vivlia ti jaʼ yajval tsʼusubtik li Jeovae xchiʼuk jaʼ tsʼusubtik li steklumal Israele (Salmo 80:8, 9; Isaías 5:3, 4). Li buchʼutik te oy skʼoplalik li ta trato la spas Jeova xchiʼuk li j-israeletike jaʼ xkoʼolajik kʼuchaʼal li j-abteletik ta tsʼusubtike. Pe mu jaʼuk yakal chalbe skʼoplal Jesus li kʼusi kʼot ta pasel ta voʼnee, jaʼ yakal chal li kʼusi yakal chkʼot ta pasel ta skʼakʼalile.

Skʼan me xtunik-o jechuk ta stojolal Dios li jnitvanejetik ta relijion yuʼun judaetik xchiʼuk li jfariseoetik ti naka to la skʼelbeik yoʼonton Jesus ta sventa li sutesejbaile. Taje xkoʼolajik kʼuchaʼal li j-abteletik ti abtejik sjunul kʼakʼal ti smalaoj tsʼakal lek chichʼ stojolike, jaʼ xkaltik, jun denario ta kʼakʼal.

Li paleetik xchiʼuk yantik xchiʼiltakike muʼyuk bu tsʼakal chtunik ta stojolal Dios chilik li yan judaetike, xkoʼolaj chilik kʼuchaʼal li j-abteletik ti jlikel noʼox ch-abtejik li ta stsʼusub Diose. Li ta lokʼolkʼop laj yal Jesuse jaʼ skʼoplal li j-abteletik ti «ta yoxibal ora» kʼotik ta abtele, jaʼ xkaltik, ti te van ta baluneb ora ta sobe; jlome mas to bat kʼakʼal kʼotik, ta svakibal ora, ta sbalunebal ora o ta xbuluchibal ora kʼotik, jaʼ xkaltik, te xa van ta svoʼobal ora ta bat kʼakʼal.

Li viniketik xchiʼuk antsetik ti tstsʼakliik batel Jesuse «mu kʼusi xtunik-o ta jmoj» ch-ilatik (Juan 7:49). Yuʼun muʼyuk mas tsots skʼoplal li abtelal tspasike, kʼajomal noʼox tsak choy tspasik xchiʼuk yantik uni abtelal. Ta mas tsʼakale, li ta otonyo ta sjabilal 29 ta jkʼakʼaliltike, «li yajval tsʼusubtike» la stak tal Jesus sventa stak ta ikʼel li krixchanoetik ti bikʼit yakʼoj sbaik yoʼ xtal abtejikuk ta stojolal Diose, ti xkʼotik ta yajchankʼoptak li Kristoe. Taje jaʼik li buchʼutik «ta slajeb» oyik laj yalbe skʼoplal Jesuse, li j-abteletik ta tsʼusubtik ti jaʼ to kʼotik ta xbuluchibal orae.

Vaʼun xi la stsutses li lokʼolkʼop laj yal Jesus ti kʼusi chkʼot ta pasel mi nel li jun kʼakʼal abtele: «Kʼalal och akʼobale, li yajval tsʼusubtike xi laj yalbe li buchʼu oy ta sba skʼelel j-abteletike: ‹Ikʼo tal li j-abteletike xchiʼuk akʼbo li stojolike, jaʼ tojo baʼyel li buchʼutik ta slajeb vulike, mi laje tojo li buchʼutik baʼyel vulike›. Kʼalal talik li viniketik ti ochik ta abtel ta xbuluchibal orae, jun denario laj yichʼik tojel ta jujuntal. Jaʼ yuʼun kʼalal talik li buchʼutik baʼyel ochik ta abtele, la snopik ti mas ep chichʼ stojolike, pe jaʼ jech jun denario laj yichʼik tojel ek. Kʼalal laj yichʼ li stojolike, lik skʼanbeik parte li yajval nae xchiʼuk xi laj yalike: ‹¡Kʼajomal noʼox jun ora abtejik li buchʼutik ta slajeb xa vulike,  akʼo mi jech, koʼol yepal la atoj jech kʼuchaʼal voʼonkutik ti tsots li-abtejkutik sjunul kʼakʼal xchiʼuk ti la jtsʼikutik xkʼuxul kʼakʼale!›. Pe xi la stakʼbe jun j-abtele: ‹Chiʼiltik, muʼyuk kʼusi chopol jpasojbot. ¿Mi mu lajuk jchaptik lek ti jun denario ta jtojote chaʼa? Tsako li atojole, batan. Yuʼun jaʼ jech koʼol yepal oy ta koʼonton ta jtoj ek li buchʼu ta slajeb xa vule. ¿Mi mu oyuk jderecho jpasbe kʼusi tskʼan koʼonton li kʼusitik oy kuʼune? ¿O mi yuʼun ch-itʼixaj sbekʼ asat ta skoj ti lek koʼontone?›. Jech, li buchʼutik ta slajeb chkʼotike jaʼ chkʼotik ta baʼyel, yan li buchʼutik baʼyel chkʼotike jaʼ chkʼotik ta slajeb» (Mateo 20:8-16).

Yikʼaluk van xi tsjakʼbe sbaik li yajchankʼoptak Jesus ta sventa ti kʼu yelan tsuts li lokʼolkʼope: ¿Kʼu van xi ti jaʼ «slajeb» chkʼotik li jnitvanejetik ta relijion yuʼun judaetik ti jaʼ «baʼyel» oy chaʼi sbaike? ¿Xchiʼuk kʼuxi ti jaʼ «baʼyel» chkʼotik li yajchankʼoptak Jesuse?

Li yajchankʼoptak Jesus ti jaʼik li buchʼutik ta «slajeb» oy ch-ilatik yuʼun li jfariseoetik xchiʼuk li yantike jaʼik li buchʼutik «baʼyel» oyik ti lek tsʼakal chichʼ stojolike. Vaʼun kʼalal chamem xaʼox li Jesuse laj yichʼ pʼajel li jteklum Jerusalene, lik stʼuj achʼ jteklum li Diose: jaʼ «li Israel yuʼun Diose» (Galatas 6:16; Mateo 23:38). Kʼalal laj yalbe skʼoplal ichʼvoʼ ta chʼul espiritu li Juan J-akʼ-ichʼvoʼe jaʼ skʼoplal li achʼ jteklum taje. Li buchʼutik «slajeb» oyike jaʼ li buchʼutik «baʼyel» chichʼik li voʼ taje xchiʼuk jaʼ tstaik li matanal ti chkʼotik ta stestigo Jesus «kʼalal to ta namal balumil[e]» (Echos 1:5, 8; Mateo 3:11). Mi xaʼibeik smelolal jchankʼopetik ti oy kʼusi toj tsots skʼoplal chjele, ta me xchapan sbaik sventa stsal yuʼunik ti tsots chkontrainatik yuʼun li jnitvanejetik ta relijion yuʼun judaetike, ti jaʼik li buchʼutik ta «slajeb» xa oyike.