Kʼelo li kʼusi yichʼoje

Batan ta saʼobil

 KAPITULO 94

Jpastik orasion xchiʼuk bikʼit xkakʼ jbatik

Jpastik orasion xchiʼuk bikʼit xkakʼ jbatik

LUKAS 18:1-14

  • LOKʼOLKʼOP TA SVENTA JUN MEʼON ANTS TI MU SNAʼ XLUBTSAJE

  • JUN JFARISEO XCHIʼUK JUN JTSOBPATAN

Laj xa yalbe ta jun lokʼolkʼop yajchankʼoptak Jesus ti toj tsots skʼoplal ti akʼo mu xlubtsajik ta spasel orasione (Lukas 11:5-13). Yikʼaluk van te xa oy ta Samaria o ta Galilea avi li Jesuse, te laj yal yan lokʼolkʼop xtok sventa chakʼ ta aʼiel ti toj tsots skʼoplal ti skʼan mu xijlubtsaj ta spasel orasione. Xi laj yale:

«Oy jun jchapanvanej ta jun jteklum ti muʼyuk bu chiʼta Dios xchiʼuk ti muʼyuk bu chichʼ ta mukʼ krixchanoetike. Jech xtok, oy jun meʼon ants li ta jteklum taje, chkʼotilan ta stojolal li jchapanvaneje xchiʼuk xi chalbee: ‹Kʼelo ti tukʼuk xkichʼ chapanel kʼalal chikʼun batel ta nail chapanobbail li kajkontrae›. Lek jal ti muʼyuk bu la stsakbe ta mukʼ skʼop ants li jchapanvanej taje, pe xi la snop ta tsʼakale: ‹Manchuk mi muʼyuk bu ta jxiʼta Dios xchiʼuk ti muʼyuk bu chkichʼ ta mukʼ mi junuk krixchanoe, ta onoʼox jkʼel ti akʼo tukʼuk xichʼ chapanel ta skoj ti liʼ xvulvun ta jtojolal li meʼon antse, sventa mu xa xtal slubtsanun, yuʼun liʼ xvaʼvun ta skʼanel partee›.» (Lukas 18:2-5.)

Xi laj yalbe smelolal li Jesuse: «¡Chikintaik li kʼusi laj yal li jchapanvaneje, manchuk mi muʼyuk tukʼ stalelal! Jaʼ me jech ta melel, ¿mi mu tauk skʼel Dios ti tukʼuk xchapanatik li buchʼutik tʼujbil yuʼun kʼalal kʼakʼal-akʼobal tskʼanik vokol ta stojolale xchiʼuk mi mu tauk xakʼ ta ilel ta stojolalik ti lek stsʼik yuʼune?» (Lukas 18:6, 7). ¿Kʼusi laj yakʼ ta chanel Jesus ta sventa li Stote?

Taje maʼuk skʼan xal ti mu tukʼuk chchapanvan Jeova kʼuchaʼal li jchapanvaneje. Ta melel moʼoj. Li kʼusi chakʼ ta chanele jaʼ liʼe: mi oy ta yoʼonton chchikinta kʼalal xvokolet kʼusi chkʼanbat li jun jchapanvanej ti muʼyuk stukʼile, mas to me oy ta yoʼonton chchikinta li Diose. Yuʼun jaʼ jun tukʼil Dios li Jeovae, lek yoʼonton xchiʼuk tstakʼbe s-orasion li steklumal mi muʼyuk chlubtsajik ta skʼoponele. Jnaʼojtik ti jeche, yuʼun xi laj yal li Jesuse: «Chkalboxuk avaʼiik ti tskʼel [Dios] ti akʼo tukʼuk xichʼik chapanel ta anile» (Lukas 18:8).

Muʼyuktik onoʼox lek tukʼ chichʼik chapanel li buchʼutik abol sbaik xchiʼuk li buchʼutik bikʼit yakʼoj sbaike, yuʼun jaʼ onoʼox mas lek ichʼbil ta mukʼ skʼop li jkʼulejetike xchiʼuk li buchʼutik oy sjuʼelike. Pe mu jechuk stalelal Dios maʼ taje. Yuʼun mi kʼot skʼakʼalile tukʼ me chchapanutik: tstoj smul yuʼun li buchʼutik toj chopolike, pe jaʼ chakʼbe xkuxlejal sbatel osil li yajtuneltake.

¿Buchʼutik jaʼ jech xchʼunel yoʼontonik kʼuchaʼal li meʼon antse? ¿Mi ep krixchanoetik xchʼunojik ti ‹tukʼ chichʼik chapanel ta anil› yuʼun li Diose? Naka to laj yal ta jun lokʼolkʼop Jesus ti skʼan mu xijlubtsaj ta spasel orasione. Li avie xi la sjakʼ Jesus mi oy xchʼunel koʼontontik ta sventa ti kʼu to stsatsal yip li orasione: «Kʼalal mi vul li Xnichʼon krixchanoe, ¿mi oy van ta melel jech xchʼunel oʼontonal tsta li ta sba balumile?» (Lukas 18:8). Jaʼ jech, mas onoʼox van ep krixchanoetik ti mu jechuk xchʼunel yoʼontonik kʼalal mi vul li Jesuse.

Oy junantik ti tsots tajek xchʼunel yoʼonton chaʼi sbaik li buchʼutik te chaʼi kʼusi chal Jesuse. Spatoj yoʼonton ta stukik, tukʼ tajek chaʼi sbaik xchiʼuk tspʼajik li yantike. Vaʼun xi laj yalbe jun lokʼolkʼop li krixchanoetik taje:

«Muy batel chaʼvoʼ viniketik ta templo sventa  tspasik orasion, jun jfariseo xchiʼuk jun jtsobpatan. Te vaʼi sventa tspas orasion li jfariseoe, xi lik yalbe sba skʼoplal stuke: ‹Dios, ta jtojbot ta vokol ti mu jechukun kʼuchaʼal skotol li yantike —ti j-elekʼetike, ti muʼyuk stukʼilike, ti tsloʼla snup xchiʼilike— ti mi jaʼuk xikoʼolaj kʼuchaʼal li jtsobpatan liʼe. Chaʼkoj ta jpas ayuno ta xemana, chkakʼ jdiesmo ta skotol li kʼusitik ta jtae›.» (Lukas 18:10-12.)

Ojtikinbil li jfariseoetik ti toj lek xaʼi chakʼik ta ilel ti toj tukʼ xaʼi sbaike. Yuʼun jaʼ tskʼanik ti labaluk xa sba x-ilatike. Jaʼ chlokʼ ta yoʼonton stukik ti tspasik ayuno ta jujun lunes xchiʼuk jueves sventa x-ilatik yuʼun li krixchanoetike, yuʼun jaʼo oy ep krixchanoetik li ta chʼivite. Jech xtok kʼalal ta bikʼtal tsʼiʼlel chakʼbeik sdiesmoal (Lukas 11:42). Te to van jayibuk u yechʼel ti xi laj yalik sventa chakʼik ta ilel ti tspʼajik li krixchanoetike: «Li epal krixchanoetik ti mu xojtikinik li Mantale [ti jech chil li jfariseoetike] mu kʼusi xtunik-o ta jmoj» (Juan 7:49).

Xi to laj yal Jesus li lokʼolkʼop taje: «Yan li jtsobpatane nom to la svaʼan sba, mi jaʼuk skʼan stoy muyel sat ta vinajel, kʼajomal noʼox lik smaj stiʼ yoʼonton xchiʼuk xi laj yale: ‹Ay Dios, oyuk xkʼuxul avoʼonton ta jtojolal, yuʼun jpasmulilun›». Kʼuchaʼal chkiltike, bikʼit yakʼoj sba ta skoj ti snaʼoj ti oy smul li jtsobpatane. Xi la stsutses lokʼolkʼop li Jesuse: «Chkalboxuk avaʼiik ti vinik taje jaʼ mas tukʼ skʼoplal yal tal ta sna, jaʼ mu sta li jfariseoe. Yuʼun li buchʼu xtoyet xa chaʼi sbae chichʼ bikʼtajesbel skʼoplal, yan li buchʼu bikʼit chakʼ sbae chichʼ toybel skʼoplal» (Lukas 18:13, 14).

Jaʼ jech jamal laj yakʼ ta chanel Jesus ti skʼan bikʼit xkakʼ jbatike. Toj tsots me skʼoplal ti stsakik ta mukʼ yajchankʼoptak Jesus li tojobtasel taje, yuʼun jaʼ te jmoj chʼiik tal xchiʼuk li jtoyba jfariseoetik ti toj tsots skʼoplal chilik ti tsotsuk yabtelike xchiʼuk ti mukʼuk skʼoplalike. Jkotoltik li yajtsʼaklomutik Kristoe jaʼ me jech toj tsots skʼoplal skʼan jtsaktik ta mukʼ ek li tojobtasel laj yal Jesuse.