Kʼelo li kʼusi yichʼoje

Sventa xasut ta xchibal pajina

Batan ta saʼobil

Stestigotak Jeova

tsotsil

Li Jesuse: jaʼ li bee, jaʼ li melele, jaʼ li kuxlejale

 KAPITULO 98

Tskʼan mukʼ skʼoplalik yan velta li jtakboletike

Tskʼan mukʼ skʼoplalik yan velta li jtakboletike

MATEO 20:17-28 MARKOS 10:32-45 LUKAS 18:31-34

  • LAJ YALBE SKʼOPLAL YAN VELTA JESUS TI CHCHAME

  • LA STSʼIK YAN VELTA JESUS TI TSKʼAN MUKʼ SKʼOPLAL LI YAJTAKBOLTAKE

Li Jesus xchiʼuk yajchankʼoptake la xtuchʼik li Ukʼum Jordan ta stsʼel Jeriko kʼalal yakal chanavik batel sventa chbatik ta sure, ti te chlikik ta Perea sventa chbatik ta Jerusalene. Te xchiʼukik batel yan krixchanoetik ti chbatik ta kʼin Koltael ta sjabilal 33 ta jkʼakʼaliltike.

Jaʼ jelavem batel li Jesuse, te tijil batel li yajchankʼoptake, yuʼun tskʼan ta yorail noʼox chkʼot li ta kʼin Koltaele. Pe chiʼik tajek li yajchankʼoptake. Yuʼun mu to jaluk yechʼel ti xi laj yalbe xchiʼiltak li Tomase: «Batik ek, yoʼ koʼol chijchamutik xchiʼuk» (Juan 11:16, 47-53). Taje jaʼo kʼalal cham li Lasaroe xchiʼuk kʼalal jaʼ xa-o chbat ta Judea ti te lik batel ta Perea li Jesuse. Xibal sba ti chbatik ta Jerusalene, jech oxal oy srasonal ti chiʼik li jchankʼopetike.

Sventa chakʼbe snaʼ yajchankʼoptak kʼusi chkʼot ta pasel li Jesuse, la stak ta ikʼel xchiʼuk xi laj yalbee: «Yakal chijmuy batel ta Jerusalen, te une chichʼ akʼel ta skʼob bankilal paleetik xchiʼuk jchanubtasvanejetik ta Mantal li Xnichʼon krixchanoe. Vaʼun chchapanik sventa tsmilik xchiʼuk chakʼik ta skʼob jyanlumetik sventa tslabanik, sventa tstsitsik xchiʼuk sventa tsmilik ta jtel teʼ, vaʼun chichʼ chaʼkuxesel ta yoxibal kʼakʼal» (Mateo 20:18, 19).

Yoxibal xa velta ti jech laj yalbe yajchankʼoptak ti chcham xchiʼuk ti chchaʼkuxi li Jesuse (Mateo 16:21; 17:22, 23). Pe li avie jaʼ to laj yal ti chichʼ jokʼanel ta jtel teʼe. Manchuk mi te tsʼetel xchikinik ta yaʼiel kʼusi laj yal Jesus li jchankʼopetike, muʼyuk bu xaʼibeik smelolal. Yikʼaluk van smalaojik tajek ti akʼo xa xlik li ajvalilal ta Israele, ti tskʼan tskʼupinik tajek li lekilal xchiʼuk ichʼel ta mukʼ li ta ajvalilal ta balumil xchiʼuk Jesuse.

Te kapal batel ta xanbal ek li smeʼ Santiago xchiʼuk Juane, ti jaʼ yaʼeluk li Salomee. Xi akʼbil  sbiik yuʼun Jesus li chaʼvoʼ jtakboletik taje: «Xnichʼnab Chauk». Taje jaʼ van ta skoj ti baxbolik tajeke (Markos 3:17; Lukas 9:54). Te xa van kʼuk sjalil ti tskʼan mukʼ skʼoplalik li ta Ajvalilal yuʼun Kristoe. Vaʼun ta skoj ti snaʼoj li smeʼike, bat skejan sba ta stojolal Jesus sventa tskʼanbe vokol. Xi jakʼbat yuʼun li Jesuse: «¿Kʼusi oy ta avoʼonton?». Vaʼun xi la stakʼ li Salomee: «Alo mantal sventa te xchoti jun ta abatsʼikʼob xchiʼuk jun ta atsʼetkʼob ta Ajvalilal avuʼun li chaʼvoʼ jkereme» (Mateo 20:20, 21).

Pe li buchʼutik jech oy ta yoʼontonik ta melele jaʼik li Santiago xchiʼuk Juane. Naka to laj yal Jesus ti chil svokol xchiʼuk ti chichʼ kʼexlaltasele, jaʼ yuʼun xi laj yalbe li chaʼvoʼ viniketik taje: «Mu xanaʼik li kʼusi chakʼanike. ¿Mi x-uchʼ avuʼunik li sbel kopa ti poʼot xa xkuchʼe?». Xi la stakʼike: «X-uchʼ kuʼunkutik» (Mateo 20:22). Yaʼeluke muʼyuk bu xaʼibeik-o smelolal li kʼusi albatike.

Pe xi laj yal li Jesuse: «Ta onoʼox xavuchʼbeik sbel maʼ li jkopae, pe sventa xachotiik ta jbatsʼikʼob xchiʼuk ta jtsʼetkʼobe maʼuk voʼon chkakʼ, yuʼun li chotlebaletik taje jaʼ chal Jtot ti buchʼutik te chchotie» (Mateo 20:23).

Kap sjol li yan jtakboletik kʼalal laj yaʼiik li kʼusi la skʼan Santiago xchiʼuk Juane. ¿Mi yuʼun van laj xa onoʼox yalbeik skʼoplal kʼalal laj yut sbaik xchiʼuk yan jtakboletik ta sventa ti buchʼu junukal mas mukʼ skʼoplal yuʼunike? (Lukas 9:46-48.) Mi laj xa onoʼox yalik o mi muʼyuk, jamal xvinaj ti muʼyuk yakʼoj-o ta xkuxlejalik ti albatik yuʼun Jesus ti skʼan bikʼit xakʼ sbaik li lajchaʼvoʼ jtakboletike. Nom xvinaj ti oy to ta yoʼonton tskʼan mukʼ skʼoplalike.

Vaʼun lik xchapan Jesus li kʼusi chut-o sbaike xchiʼuk li kʼusi yakal chil-o svokolike. La stak ta ikʼel xlajchaʼvoʼalik xchiʼuk xi laj yalbe ta slekil yoʼontone: «Li voʼoxuke anaʼojik ti buchʼutik ajvalil xaʼi sbaik ta jteklumetike jpʼel xa xalik ta stojolal li buchʼutik sventainojike xchiʼuk ti buchʼutik mukʼ skʼoplal yuʼunike tspasik ta mantal li buchʼutik sventainojike. Taje skʼan me mu jechukoxuk maʼ voʼoxuke, moʼoj, yuʼun li buchʼu tskʼan mukʼ skʼoplal avuʼunike, skʼan baʼyel xkʼot ta avajtunelik xchiʼuk li buchʼu baʼyel tskʼan chkʼot avuʼunike skʼan xkʼot ta mosoil avuʼun akotolik» (Markos 10:42-44).

La svulesbe ta sjol buchʼu ti skʼan xchanbeik stalelale, jaʼ li stalelal stuke. Xi laj yale: «Li Xnichʼon krixchanoe muʼyuk bu tal sventa xtunik ta stojolal, yuʼun tal tunuk xchiʼuk tal yakʼ xkuxlejal kʼuchaʼal pojelal sventa tspoj epal krixchanoetik» (Mateo 20:28). Yuʼun oy xa ta yoxibal jabil ti tunem tal ta stojolal yantike. Jaʼ jech-o tspas batel, ¡jaʼ to mi laj yakʼ xkuxlejal ta stojolal li krixchanoetike! Ta melel, skʼan jaʼ jechuk stalelalik kʼuchaʼal Kristo li yajchankʼoptak Jesuse, skʼan oyuk ta yoʼonton xtunik ta stojolal yantik, maʼuk ti chtun ta stojolal stukike, skʼan bikʼit xakʼ sbaik, maʼuk ti mukʼ xa tskʼan skʼoplalike.