Kʼelo li kʼusi yichʼoje

Sventa xasut ta xchibal pajina

Batan ta saʼobil

Stestigotak Jeova

tsotsil

Li Jesuse: jaʼ li bee, jaʼ li melele, jaʼ li kuxlejale

 KAPITULO 68

«Voʼon lus kʼotemun ta stojolal krixchanoetik»

«Voʼon lus kʼotemun ta stojolal krixchanoetik»

JUAN 8:12-36

  • LI JESUSE LAJ YALBE SKʼOPLAL BUCHʼU JAʼ LI NICHʼONILE

  • ¿KʼUSI SKʼAN XAL TI MOSOINBILIK LI JUDAETIKE?

Li ta slajebal kʼakʼal ta kʼin Axibalnae, li ta svukubal kʼakʼale, te chchanubtasvan ta templo Jesus ti bu «tstsobik [takʼine]» (Juan 8:20; Lukas 21:1). Jaʼ te yaʼeluk ti bu Yamakʼ Antsetik sbie, jaʼ ti bu tstikʼ yuni takʼinik li krixchanoetike.

Li ta jujun akʼobal li ta kʼin taje jaʼ te ti bu mas sakjaman yuʼunike. Yuʼun te yakʼojik chanib mukʼta chotleb kantil xchiʼuk oy lek mukʼ yav yaseiteal ta jujuntal ti lek noje. Nom to chkʼot sakilal li kantiletik ta skoj ti tsots tajek xojobale. Vaʼun oy kʼusi laj yal Jesus ti jaʼ van vulesbat-o ta sjol krixchanoetik li sakilal kantile. Xi laj yale: «Voʼon lus kʼotemun ta stojolal krixchanoetik. Mi jaʼuk me bu oy ta ikʼal osil li buchʼu tstsʼakliun batele, moʼoj, yuʼun chuʼunin li lus sventa kuxlejale» (Juan 8:12).

Chopol laj yaʼi jfariseoetik li kʼusi laj yal Jesuse, jaʼ yuʼun xi laj yalike: «Chavalbe aba akʼoplal atuk; mu meleluk li kʼusi chavale». Xi la stakʼ li Jesuse: «Akʼo onoʼox mi xkalbe jba jkʼoplal jtuk, melel li kʼusi chkale, yuʼun jnaʼoj bu likemun tal xchiʼuk bu chibat. Yan li voʼoxuke mu xanaʼik bu likemun tal xchiʼuk bu chibat». Xi to laj yale: «Xchiʼuk xi tsʼibabil xtok li ta Mantal avuʼunike: ‹Melel me chkʼot mi koʼol skʼopik li chaʼvoʼ testigoe›. Voʼon chkalbe jba jkʼoplal jtuk xchiʼuk chalbun jkʼoplal ek li Totil ti la stakun tale» (Juan 8:13-18).

Mu skʼan xchʼun jfariseoetik li kʼusi albatike, jaʼ yuʼun xi la sjakʼike: «¿Bu oy li Atote?». Xi jamal la stakʼ li Jesuse: «Mu xavojtikinikun xchiʼuk mi jaʼuk xavojtikinik ek li Jtote. Ti yuʼunuk xavojtikinikune xavojtikinik jechuk ek li Jtote» (Juan 8:19). Manchuk mi tskʼan tajek tstsakik sventa tstikʼik ta chukel Jesus li jfariseoetike, mi jaʼuk stsak yuʼunik.

Xi to laj yal yal Jesus li kʼusi laj xa onoʼox yalbe skʼoplale: «Ta jtam batel jbe, vaʼun chasaʼikun, pe te akuchoj amul chachamik. Mu xuʼ te xabatik ti bu chibate». Pe batsʼi mu xaʼibeik smelolal ta jyalel judaetik li kʼusi laj yal Jesuse, yuʼun xi la sjakʼbe sbaike: «Mu van bu tsmil sba stuk, ¿mi  mu jechuk? Yuʼun xi chale: ‹Mu xuʼ te xabatik ti bu chibate›». Ta skoj ti mu snaʼik bu likem tale mu xaʼibeik smelolal li kʼusi chakʼ ta chanele. Jaʼ yuʼun xi albatike: «Ta pekʼel likemoxuk li voʼoxuke; yan li voʼone ta toyol likemun tal. Liʼ likemoxuk ta balumil li voʼoxuke, yan li voʼone mu liʼuk likemun ta balumile» (Juan 8:21-23).

Jaʼ yakal chalbe skʼoplal Jesus ti te toʼox kuxul ta vinajele xchiʼuk ti kʼalal kʼot ta Mesias o Kristo ti albil onoʼox skʼoplale, ti smalaojik onoʼox tajek chvul li jnitvanejetik ta relijion taje. Pe xi la sjakʼ ta stiʼetel sjolike: «¿Buchʼuot?» (Juan 8:25).

Manchuk mi pʼajbil o kontrainbil li Jesuse, xi la stakʼe: «¿Kʼu yuʼun jech noʼox liʼ xivulvun chkalboxuke?». Vaʼun laj yakʼ ta ichʼel ta mukʼ Stot li Jesuse xchiʼuk laj yalbe lek smelolal kʼu yuʼun skʼan xchikintabeik smantal Nichʼonil li judaetike. Xi laj yale: «Melel kʼusi chal li Buchʼu la stakun tale, xchiʼuk chkal batel ta stojolal krixchanoetik li kʼusi laj kaʼi laj yale» (Juan 8:25, 26).

Muʼyuk bu spatoj yoʼontonik ta stojolal Dios li judaetike, yan li Jesuse laj yakʼ ta ilel ti spatoj yoʼonton ta stojolal li Stote, yuʼun xi laj yale: «Kʼalal mi laj xaʼox ajokʼanik li Xnichʼon krixchanoe jaʼ to te chavakʼik venta ti voʼonun taje, xchiʼuk ti maʼuk ta jpas jtosuk ti kʼusi chlokʼ ta koʼonton jtuke; moʼoj, yuʼun li kʼusitik yakal chkalboxuke jaʼ jech chkal kʼuchaʼal la xchanubtasun li Totile. Liʼ xchiʼinojun li Buchʼu la stakun tale; muʼyuk bu yiktaojun jtuk, yuʼun jaʼ onoʼox ta jpas li kʼusi lek chile» (Juan 8:28, 29).

Pe oy jlom judaetik ti laj yakʼ xchʼunel yoʼontonik ta stojolal li Jesuse, jaʼ yuʼun xi albatike: «Voʼoxuk me kajchankʼopoxuk ta melel mi te oyoxuk-o ta stojolal li jkʼope, vaʼun chavojtikinik li kʼusi melele xchiʼuk jaʼ chakʼ akolebalik li kʼusi melele» (Juan 8:31, 32).

Labal sba laj yaʼiik jlom krixchanoetik ti tsta skolebalike. Jaʼ yuʼun xi laj yalike: «Snitilulalunkutik Abraan xchiʼuk mi jaʼuk buchʼu smosoinojunkutik. ¿Kʼuxi xa noʼox ti ‹chakolik›, xachie?». Akʼo mi snaʼoj judaetik ti pasbilik ta mantal yuʼun jyanlumetike mu skʼanik albel ti mosoiletike. Pe albatik yuʼun Jesus ti mosoinbilik toe, yuʼun xi albatike: «Chkalboxuk avaʼiik ta batsʼi melel ti mosoinbil yuʼun mulil skotol li buchʼu tspas smule» (Juan 8:33, 34).

Tstikʼ sbaik ta vokol judaetik ta skoj ti mu xchʼunik ti mosoinbilik yuʼun li mulile. Xi laj yalbe smelolal li Jesuse: «Mu sbateluk osil te oy-o ta na li mosoile; yan li nichʼonile te oy-o sbatel osil» (Juan 8:35). Li jun mosoile muʼyuk sderecho sventa chichʼ sparte xchiʼuk xuʼ snutsat lokʼel yuʼun yajval ti kʼusi ora xal yoʼontone. Jaʼ noʼox te oy-o ‹sbatel osil ta na›, jaʼ xkaltik, ti kʼu sjalil kuxul li nichʼonil ti te vokʼeme o li buchʼu te laj yichʼ tsʼitesele.

Jech, li kʼusi melel ta sventa li Nichʼonile jaʼ chkoltavan lokʼel ta stojolal li mulil ti chakʼ lajelal ta sbatel osile. Xi laj yal li Jesuse: «Mi chakʼ akolelik li Nichʼonile, ataoj me akolelik ta melel» (Juan 8:36).