Kʼelo li kʼusi yichʼoje

Sventa xasut ta xchibal pajina

Batan ta saʼobil

Stestigotak Jeova

tsotsil

Li Jesuse: jaʼ li bee, jaʼ li melele, jaʼ li kuxlejale

 KAPITULO 78

¡Lek chapal li tukʼil jchabinae!

¡Lek chapal li tukʼil jchabinae!

LUKAS 12:35-59

  • SKʼAN ME CHAPALUK LI TUKʼIL JCHABINAE

  • TSKONTRAIN SBA YUʼUN KRIXCHANOETIK LI JESUSE

Jamal laj yalbe lek smelolal Jesus ti jaʼ noʼox ch-och ta Ajvalilal ta vinajel li «uni jtsop [chije]» (Lukas 12:32). Pe mi laj yichʼ li smotonik ti toj kʼupil xa noʼox sbae, skʼan me tsotsuk skʼoplal xilik. Ta melel, jech-o laj yal batel Jesus ti skʼan tsotsuk skʼoplal xil li jun krixchano mi te skʼoplal li ta Ajvalilale.

Jaʼ yuʼun laj yalbe tsots mantal yajchankʼoptak ti skʼan akʼo chapalikuk kʼalal mi sut tale. Xi laj yale: «Alapojuk me akʼuʼ apokʼik xchiʼuk chapalukoxuk me xchiʼuk tsanaluk me li akantilike, xchiʼuk skʼan me jechoxuk kʼuchaʼal viniketik ti tsmala yajvalik kʼalal tsut tal ta skʼinal nupunele, yuʼun kʼalal mi kʼot skʼojilan tiʼ nae, ta anil noʼox tsjambeik. ¡Xmuyubajik noʼox li mosoiletik ti vikʼil sat chkʼot taatikuk yuʼun li yajvalike!» (Lukas 12:35-37).

Ta anil noʼox laj yaʼibeik smelolal ti skʼan tsotsuk skʼoplal xilik li kʼusi laj yal Jesus ta lokʼolkʼope. Laj yalbe skʼoplal ti lek chapal li jtuneletik taje, yuʼun yakal tsmala tsut tal li yajvalike. Xi laj yalbe smelolale: «Manchuk mi ta yorail xchaʼkojal chabivanej ta akʼobaltik chkʼot [chlik van ta baluneb ora ta akʼobal jaʼ to tstsuts ta oʼlol akʼobal], o mi ta yorail yoxkojal chabivanej ta akʼobaltik chkʼot [chlik van ta oʼlol akʼobal jaʼ to tstsuts ta oxib ora ta sob], ¡xmuyubajik noʼox me mi jech vikʼil-o satike!» (Lukas 12:38).

Maʼuk noʼox tojobtasvan Jesus ta sventa ti skʼan baxbolikuk li jtuneletik o li j-abteletik ta na taje. Moʼoj, yuʼun jamal xvinaj ti te chalbe sba skʼoplal stuk li Xnichʼon krixchano ta lokʼolkʼope. Xi laj yalbe li yajchankʼoptake: «Li voʼoxuk eke akʼik ta ilel ti chapaloxuke, yuʼun jaʼo chtal li Xnichʼon krixchano kʼalal maʼuk yorail anopojike» (Lukas 12:40). Yuʼun te onoʼox kʼusi ora ta xtal li Jesuse. Jaʼ yuʼun tskʼan ti akʼo chapalikuk li yajchankʼoptake, mas to li buchʼutik te skʼoplalik li ta «uni jtsop [chije]».

Tskʼan chaʼibe lek smelolal Pedro li kʼusi laj yal Jesuse, jaʼ yuʼun xi la sjakʼe: «Kajval, ¿mi voʼonkutik noʼox chavalbunkutik li lokʼolkʼop taje, o mi jkotolkutik?». Pe muʼyuk bu tukʼ takʼbat, moʼoj, xi albat ta jun lokʼolkʼope: «¿Buchʼu jaʼ ta melel li tukʼil jchabina, ti pʼije, ti ch-akʼbat sbain skotol li yaj-abteltak yajval sventa chakʼbe sveʼel ta yorail ti kʼu yepal chtun yuʼunike? ¡Xmuyubaj noʼox me mi jech yakal tspas ta xtaat yuʼun yajval li mosoil taje! Ta melel chkalboxuk avaʼiik ti ta me svaʼan sventa chakʼbe sbain skotol li kʼusitik oy yuʼune» (Lukas 12:41-44).

Kʼalal «yajvalik» xi li ta baʼyel lokʼolkʼope jamal chakʼ ta aʼiel ti jaʼ skʼoplal stuk li Jesuse, li Xnichʼon krixchanoe. Ta melel, «li tukʼil jchabina» laj kaltike jaʼik viniketik ti te tikʼil skʼoplalik li ta «uni jtsop [chije]» xchiʼuk ti ch-akʼbatik li Ajvalilale (Lukas 12:32). Li kʼusi laj yal Jesus liʼe jaʼ ti oy buchʼutik li ta jtsop krixchanoetik ti «ch-akʼbat sbain skotol li yaj-abteltak yajval sventa chakʼbe sveʼel ta yorail ti kʼu yepal chtun yuʼunike». Jech oxal, li Pedro xchiʼuk li yantik jchankʼopetik ti laj yichʼik chanubtasel xchiʼuk laj yichʼik makʼlinel yuʼun Jesuse kʼot ta nopel yuʼunik ti te van bu ora ta mas jelavel chtal li Xnichʼon krixchanoe. Ti vaʼ orae, oy kʼusi chapanbil lek sventa tsmakʼlin ta mantal li yajtsʼaklomtak Jesuse, ti jaʼik «li yaj-abteltak» Ajvalile.

Oy to kʼusi laj yal Jesus sventa chakʼ ta ilel ti kʼu yuʼun skʼan vikʼiluk satik li yajchankʼoptake xchiʼuk ti skʼan lekuk stalelalike. Yuʼun xuʼ van mu xa stukʼulan sbaik, maʼuk noʼox, yuʼun xuʼ xlik skontrain li xchiʼiltakik ta abtele. Xuʼ van xi xkʼot ta pasele: «Pe mi oy junuk velta xi chlik snop ta yoʼonton li mosoil taje: ‹Muʼyuk to chtal li Kajvale›, vaʼun chlik smaj li yan jtuneletike, chlik ta veʼel, ta uchʼbolajel xchiʼuk ta yakubel, pe kʼalal maʼuk skʼakʼalil snopoj xchiʼuk ti maʼuk yorail  snaʼoj chkʼot yajval li mosoile jaʼo me chkʼot, jaʼ yuʼun, tsots chakʼbe stoj smul xchiʼuk jaʼ te chbat yakʼbe xchiʼin li buchʼutik muʼyuk tukʼike» (Lukas 12:45, 46).

Laj yal Jesus ti «tal [stsan] kʼokʼ ta [balumile]». Yuʼun kʼalal chchiʼin ta loʼil krixchanoetik ta sventa li kʼusitik mu jechuk chaʼiike xkoʼolaj kʼuchaʼal tstsan li kʼokʼ taje xchiʼuk ti chchikʼ xkaltik li jecheʼ chanubtaseletike xchiʼuk li kʼusitik nopem xaʼiik spasele. Maʼuk noʼox, yuʼun chchʼak li buchʼutik stalel onoʼox ti jmoj oyike. Yuʼun «li totile tskontrain xnichʼon, li nichʼonile tskontrain stot; li meʼile tskontrain stseb, li tsebe tskontrain smeʼ; li meʼalibale tskontrain yalib, li alibale tskontrain smeʼalib» (Lukas 12:49, 53).

Jaʼ mas toj tsots skʼoplal chaʼi yajchankʼoptak Jesus li kʼusi naka to laj yale. Vaʼun joypʼij batel ti bu oy krixchanoetik li Jesuse. Mas ep li krixchanoetik ti yolbaj mu skʼan stsakik ta venta li sprevail ti jaʼ Mesias li Jesuse. Jaʼ yuʼun xi albatike: «Kʼalal chavilik chlik tal tok ta smaleb Kʼakʼale, xi chavalik ta orae: ‹Ta xtal ikʼaloʼ›, vaʼun jech chkʼot ta pasel. Kʼalal chavilik ti xjumet tal ikʼ ta sure, xi chavalike: ‹Toj kʼux kʼakʼal tana›, vaʼun jech chkʼot ta pasel. Jloʼlavanejetik, xanaʼik skʼelel kʼu yelan li balumil xchiʼuk vinajele, pe ¿kʼuxi ti mu xanaʼik skʼelel li kʼusi chkʼot ta pasel li avie?» (Lukas 12:54-56). Jamal xvinaj ti muʼyuk chapalike.