Kʼelo li kʼusi yichʼoje

Batan ta saʼobil

 KAPITULO 18

¿Mi xvul ta ajol chaval kolaval?

¿Mi xvul ta ajol chaval kolaval?

¿MI LA veʼ xa?... ¿Mi xa naʼ buchʼu la spas li veʼlile?... Oyikʼaluk jaʼ la spas li ameʼe o yan krixchano. Vaʼun chaʼa, ¿kʼu yuʼun skʼan ta xkalbetik koliyal Dios ta skoj li jveʼeltike?... Yuʼun jaʼ li buchʼu chakʼ chʼiuk li tsʼiʼleletik sventa oyuk li jveʼeltike. Pe jech xtok, skʼan ta xkalbetik kolaval ek li buchʼu tspas xchiʼuk li buchʼu chlechanbutik li jveʼeltike.

Kʼalal tspasik kʼusitik lek ta jtojolaltik li yantike bakʼintike ta xchʼay ta joltik ta yalbel kolaval, ¿mi mu jechuk? Kʼalal liʼ toʼox oy ta Balumil li Mukʼta Jchanubtasvaneje, junantik krixchanoetik ti ipajemik ta kʼaʼemal chamele chʼay ta sjolik ta yalbel kolaval.

¿Mi xa naʼ kʼusi jaʼ li kʼaʼemal chamele?... Jaʼ jun chamel ti xuʼ tstʼolbe lokʼel li sbekʼtal jun krixchanoe. Ta skʼakʼalil Jesuse, li jkʼaʼemal chameletike skʼan nom oyik ta stojolal li yan krixchanoetike. Mi chil chnopaj tal jun krixchano li jkʼaʼemal chamele, skʼan chalbe ti akʼo skʼej sbae. Kʼalal ta spas jeche, muʼyuk bu ta xakʼbe xchʼam yan krixchanoetik li xchamele.

Li Jesuse laj yakʼ ta ilel slekil yoʼonton ta stojolal li jkʼaʼemal chameletike. Jun kʼakʼal, kʼalal jaʼo te xbat ta sbelel Jerusalene, li Jesuse persa te echʼ ta jun bikʼit lum. Kʼalal ch-och xa batel li ta bikʼit lume, te tal nupatuk ta be yuʼun lajunvoʼ jkʼaʼemal chameletik. Li stukike laj yaʼiik ti Jesuse akʼbil sjuʼel yuʼun Dios sventa chpoxta kʼusuk chamelaletik.

Li jkʼaʼemal chameletike muʼyuk bu inopajik ta stojolal li Jesuse, nom noʼox vaʼal ikomik. Pe li stukike xchʼunojik ti yuʼun xuʼ ta xpoxtaatik yuʼun li Mukʼta Jchanubtasvaneje. Jech oxal, kʼalal laj yilike  tsots avanik xchiʼuk xi laj yalike: ¡Jesús, Jchanubtasvanej, koltaunkutik!, xutik.

¿Mi chkʼuxubaj ta avoʼonton li jchameletike?... Li Jesuse kʼux ta yoʼonton laj yaʼi. Snaʼoj ti toj kʼux li kʼaʼemal chamele. Jaʼ yuʼun xi la stakʼe: «Batanic, bat acʼo abaic ta ilel ta stojol li paleetique –xut» (Lucas 17:11-14).

Li Jesuse, ¿kʼusi laj yalanbe ti akʼo spasik li jkʼaʼemal chameletike?

Li Jesuse, ¿kʼu yuʼun laj yalbe ti akʼo spasik jeche? Yuʼun jaʼ jech chal li smantal Dios ti laj yakʼbe li steklumal ta sventa li jkʼaʼemal chameletike. Li mantal taje ta xal ti pale biiltasbil yuʼun Diose skʼan ta skʼelbe lek li sbekʼtal li jkʼaʼemal chamele xchiʼuk skʼan ta xalbe mi chʼayem xa li xchamele. Kʼalal poxtajem xa li xchamelike, xuʼ ta xchaʼnakiik xchiʼuk li buchʼutik muʼyuk ipike (Levítico 13:16, 17).

 Pe li jchameletik taje muʼyuk to bu poxtajemik. Jech un chaʼa, ¿mi ta van xbat skʼelik li pale jech kʼuchaʼal albatik yuʼun li Jesuse?... Ibatik, ta ora noʼox ibatik. Ta melel la xchʼunik ti ta xpoxtaatik yuʼun li Jesuse. ¿Kʼusi kʼot ta pasel un chaʼa?

Kʼalal jaʼo yakal xbatik sventa chbat skʼelik li palee, chʼay li xchamelike. Lekub li sbekʼtalike, poxtajem ikomik. Taje jaʼ li matanal laj yichʼik ta skoj ti yuʼun la xchʼunik ta stojolal sjuʼel li Jesuse. ¡Kʼu to noʼox muyubajik tajmek! Pe ¿kʼusi skʼan ta spasik sventa chakʼik ta ilel ti tstojik ta vokole? ¿Kʼusi van laj apas ti voʼotuke?...

¿Kʼusi vul ta sjol tspas li jkʼaʼemal chamel liʼe?

Jun vinik ti poxtajem xae isut tal ta stojolal li Jesuse. Lik yalbe smukʼulal li Diose, laj yal kʼusitik lek ta sventa li Diose. Taje jaʼ li kʼusi skʼan toʼox ta spase, yuʼun li juʼelal ti poxtaate jaʼ te likem tal ta stojolal li Diose. Jech xtok, li vinike laj skejan sba ta stojolal li Jesuse xchiʼuk laj yalbe kolaval. Xmuyubaj tajmek ta skoj li kʼusi pasbat yuʼun li Jesuse.

Pe ¿ati yan balunvoʼik ne? Xi la sjakʼ li Jesuse: ¿Mi mu lajunvoʼikuk li jkʼaʼemal chameletik ti ipoxtajike? ¿Bu oyik li yan balunvoʼike? ¿Mi kʼajomal noʼox jun isut tal sventa chalbe smukʼulal li Diose?, xi.

 Jech, jech ta melel. Li ta slajunvoʼalike kʼajomal noʼox jun laj yalbe smukʼulal o la skʼupil kʼopta li Diose xchiʼuk isut tal sventa chalbe kolaval li Jesuse. Jaʼ jun jsamaria vinik, jun vinik ti yan slumale. Li yan balunvoʼike muʼyuk bu laj yalbeik kolaval li Diose mi jaʼuk laj yalbeik kolaval li Jesuse (Lucas 17:15-19).

¿Buchʼu junukal xa koʼolaj xchiʼuk li viniketik taje? ¿Mi mu meleluk ti ta jkʼantik jechutik kʼuchaʼal li jsamaria vinike?... Jaʼ yuʼun, kʼalal oy buchʼu tspas kʼusitik lek ta jtojolaltike, ¿kʼusi skʼan xvul ta joltik?... Ta yalel kolaval. Manchuk mi chchʼay ta sjolik li krixchanoetike, lek ti chkaltik kolavale, yuʼun taje ta slekubtasbe yoʼonton li Diose xchiʼuk li xNichʼon ti jaʼ Jesuse.

¿Kʼuxi xuʼ xa chanbe stalelal li jkʼaʼemal chamel ti sut batel yoʼ bu oy li Jesuse?

Mi cha nop avaʼie, chavakʼ venta ti oy krixchanoetik ti ep kʼusitik spasojik ta atojolale. Jech kʼuchaʼal liʼe, ¿mi oy ipajemot junuk velta?... Oyikʼal van muʼyuk bu toj tsots ipajemot kʼuchaʼal li lajunvoʼ jkʼaʼemal chameletike, pe xuʼ van avaʼyoj tsots simal-obal o kʼux chʼutil. ¿Mi oy buchʼu la xchabiot?... Oyikʼal van laj yakʼboxuk apoxil xchiʼuk la skʼeloxuk. ¿Mi la amuyubaj ti la skoltaoxuk sventa cha xpoxtaike?...

Li jsamaria vinike laj yalbe kolaval li Jesús ta skoj ti yuʼun poxtaate, li Jesuse imuyubaj ti jaʼ jech la spase. ¿Mi ta van xmuyubaj xa naʼ li atot ameʼ mi chavalbe kolaval ta skoj li kʼusitik lek tspasik ta atojolale?... Ta melel tana.

¿Kʼu yuʼun tsots skʼoplal ti skʼan xvul ta joltik ta yalel kolavale?

Skotol kʼakʼal o skotol xemanae oy krixchanoetik ti tspasik kʼusitik sventa li voʼote. Taje xuʼ van jaʼ yabtelik spasel xchiʼuk xuʼ van  tskʼupinik ta spasel xtok. Pe oyikʼal van ta xchʼay ta ajol ta yalbelik kolaval. Oyikʼal van chakʼbe yipal ta xchanubtaselot li amaestrae. Taje jaʼ yabtel, pe ta melel ta me xmuyubaj ti mi chavalbe kolaval ta skoj taje.

Bakʼintike, li yan krixchanoetike chi skoltautik ta kʼusitik ti mu toj tsotsuk skʼoplale. ¿Mi oy sjamojboxuk junuk velta tiʼna sventa cha echʼ? ¿O mi oy buchʼu yetʼesojbot tal aveʼel li ta mexae? Lek me ti chaval kolavale, manchuk mi mu toj tsotsuk skʼoplal.

Mi xvul ta joltik ta yalbelik kolaval li krixchanoetik ta balumile, mas to me xvul ta joltik sventa chkalbetik kolaval li jTotik ta vinajele. ¡Toj ep kʼusitik xuʼ xkalbetik-o kolaval li Jeovae! Jaʼ laj yakʼbutik li jkuxlejaltike xchiʼuk skotol li kʼusitik tskʼupin li jkuxlejaltike. Jaʼ yuʼun, toj ep tajmek srasonal kuʼuntik sventa chkalbetik smukʼulal Dios kʼalal ta xkaltik li kʼusitik lek ta stojolale.

Ta sventa li yalel kolavale, jkʼeltik li kʼusitik chal li versikuloetik liʼe: Salmo 118:29; Efesios 5:20; Colosenses 3:17, xchiʼuk 1 Tesalonicenses 5:18.