Kʼelo li kʼusi yichʼoje

Batan ta saʼobil

 KAPITULO 26

¿Kʼu yuʼun tsots ta pasel li kʼusi leke?

¿Kʼu yuʼun tsots ta pasel li kʼusi leke?

¿BUCHʼU muyubaj kʼalal la spas kʼusitik chopol li Sauloe?... Jaʼ li Diablo Satanase. Pe muyubajik ek li jbabeetik ta srelijion li judioetike. Jech un chaʼa, kʼalal ikʼataj ta yajtsʼaklom Mukʼta Jchanubtasvanej xchiʼuk lik yichʼ ojtikinel kʼuchaʼal Pablo li Sauloe, li jbabeetik ta relijione lik spʼajik. ¿Mi chavaʼibe smelolal kʼu yuʼun tsots chaʼi ta spasel li kʼusi lek li jun yajtsʼaklom Jesuse?...

¿Kʼusi vokolil laj yil Pablo ta skoj ti yuʼun la spas li kʼusi leke?

Jun veltae, li mero bankilal pale Ananiase laj yal mantal ti akʼo yakʼbeik majel ta sat li Pabloe. Jech xtok, la skʼan ox la stikʼ ta chukel. Li Pabloe toj ep laj yichʼ vokol ti la spas sba ta yajtsʼaklom li Jesuse. Jech kʼuchaʼal skʼelobil liʼe, oy chopol krixchanoetik ti la smajik xchiʼuk la skʼan la smilik ta tone (Hechos 23:1, 2; 2 Corintios 11:24, 25).

Ep buchʼutik ta xakʼbeik yipal sventa akʼo jpastik li kʼusitik muʼyuk lek chil li Diose. Jech un chaʼa, skʼan ta jakʼbe jbatik: «¿Kʼu yepal jkʼanojtik li kʼusi leke? ¿Mi  toj ep jkʼanojtik ti ta jpastik manchuk mi tspʼajutik li yantike?». ¿Mi mu meleluk ti skʼan tsotsuk koʼontontik sventa ta jpastike?...

Oyikʼal van cha jakʼbe aba: «¿Kʼu yuʼun tspʼajutik li yantik ti ta jpastik li kʼusi leke? ¿Mi mu jaʼuk tauk xmuyubajik-o ti jechuke?». Taje jaʼ jech smelolal ti jechuke. Jechtik onoʼox, li krixchanoetike lek toʼox chilik li Jesús ta skoj li kʼusitik lek tspase. Jun veltae, skotol li jnaklejetik ta jun jteklume la stsob sbaik ta tiʼna yoʼ bu oy li Jesuse. Ibatik te, yuʼun li Jesuse ta xpoxta li jchameletike (Marcos 1:33).

Pe bakʼintike li krixchanoetike muʼyuk bu lek chaʼiik li kʼusi chchanubtasvan li Jesuse. Li stuke jaʼ onoʼox laj yakʼ ta chanel li kʼusi melele, jaʼ yuʼun li junantik krixchanoetike la spʼajik ta skoj taje. Jaʼ jech kʼot ta stojolal jun kʼakʼal te ta Nazarete, li jteklum ti bu ichʼi li  Jesuse. Li stuke ibat ta snail tsobobbail, jaʼ te yoʼ bu tstsob sbaik sventa tsmuyubtaik Dios li judioetike.

Tee li Jesuse laj yal jun kʼupil loʼil mantal ti lokʼesbil ta sKʼop Diose. Ta slikebale, lek laj yaʼiik li krixchanoetike. Toj chʼayel ikom yoʼontonik ta skoj li kʼupil kʼopetik ti ilokʼ ta ye li Jesuse. Mu xchʼunik ti jaʼ li kerem ti te ichʼi ta slumalik bu ichʼiik ek li stukike.

Pe vaʼun li Jesuse lik yalbe skʼoplal ti kʼalal laj yakʼ ta ilel slekil yoʼonton Dios ta stojolal krixchanoetik ti maʼuk judioetike. Kʼalal laj yaʼiik taje, ilinik li buchʼutik te oyik ta snail tsobobbaile. ¿Mi xa naʼ kʼu yuʼun?... Yuʼun chalik ti jaʼ noʼox stukik xuʼ ch-akʼbatik ta ilel slekil yoʼonton li Diose. Tsnopik ti jaʼ mas lekik li stukike, ti jaʼ muʼyuk li yantike. Jech un chaʼa, lik spʼajik li Jesús ta skoj li kʼusi laj yale. ¿Mi xa naʼ kʼusi la skʼan la spasbeik?...

Li Vivliae xi ta xalbe smelolale: La stsakik li Jesuse, la slokʼesik li ta jteklume, laj yikʼik batel ta jol vits sventa tsjipik yalel te sventa tsmilik. Pe ikol batel yuʼunik li Jesuse (Lucas 4:16-30).

¿Kʼu yuʼun tskʼan tsmilik Jesús li krixchanoetik liʼe?

Ti jechuk chkʼot ta atojolale, ¿mi ta van xa chaʼkʼopon ta sventa Dios li krixchanoetik taje?... ¿Mi mu meleluk ti skʼan oyuk stsatsal koʼontontike?... Veno, kʼalal echʼ xaʼox van junuk jabile, ichaʼsut ta Nazaret li Jesuse. Li Vivliae xi ta xale: «Te icʼot chanubtasvanuc ta nail tsobobbailetic yuʼunic». Li Jesuse muʼyuk bu la xiʼta li krixchanoetik ti muʼyuk bu skʼanojik li Diose xchiʼuk la xchol-o batel li kʼusi melele (Mateo 13:54).

Yan velta xtoke, jaʼ toʼox jun sabado, vaʼun li Jesuse te oy ta snail tsobobbail yoʼ bu oy jun vinik ti takijem jun skʼobe. Li Diose laj yakʼbe sjuʼel li Jesús sventa chpoxta li vinike. Pe, junantik krixchanoetik ti te oyike la skʼan laj yakʼik ta vokol li Jesuse. ¿Kʼusi la spas li Mukʼta Jchanubtasvaneje?... Baʼi xi la sjakʼe: Ti oyuk jkotuk achijik ti chbalchʼuj yalel ta yut chʼen ta sabadoe, ¿mi ta van xa lokʼesik?, xut.

Jech, tslokʼesik li chije, manchuk mi ta sabado, ti jaʼ skʼakʼalil  chkux yoʼontonike. Jech oxal chaʼa, xi laj yal li Jesuse: Jaʼ mas to lek ti ta jkoltatik jun krixchano ta sabadoe, yuʼun jaʼ mas ep sbalil li krixchanoe, jaʼ muʼyuk li jkot chije, xi. ¡Lek jamal ta kʼelel chaʼa ti Jesuse, la skʼan la skolta li vinik taje kʼalal la xpoxtae!

Li Jesuse laj yalbe ti akʼo xachʼ skʼob li vinike xchiʼuk ta ora noʼox la xpoxtabe. ¡Xmuyubaj tajmek ikom li vinike! Pe ¿ati yantik ne? ¿Mi muyubajik ek?... Moʼoj. Mas to la spʼajik li Jesuse. Ilokʼik batel te xchiʼuk la xchapik ti ta smilik li Jesuse (Mateo 12:9-14).

Taje jaʼ jech xkoʼolaj ek li ta jkʼakʼaliltike. Manchuk mi kʼusuk ta jpastik, muʼyuk onoʼox bu ta jlekubtasbetik yoʼonton skotol li krixchanoetike. Jech un chaʼa, skʼan ta jnoptik buchʼu skʼan ta jlekubtasbetik yoʼonton. Mi jaʼ li Jeova Dios xchiʼuk li xNichʼon ti jaʼ Jesucristoe, vaʼun skʼan jaʼ onoʼox ta jpastik li kʼusitik ta xchanubtasutike. Pe, ¿buchʼu ti tspʼajutik ta skoj taje? ¿Buchʼu tspas ti akʼo tsotsuk chkaʼitik ta spasel li kʼusi leke?...

Jaʼ li Diablo Satanase. Pe ¿buchʼutik yan?... Jaʼ li krixchanoetik ti akʼbilik xchʼun kʼusitik chopol yuʼun li Diabloe. Li Jesuse xi laj yalbe li jbabeetik ta relijion ti jaʼo kuxulik ta skʼakʼalil li Jesuse: «Li voʼoxuque jaʼ atotic li pucuje, jaʼ yuʼun jaʼ chacʼan chapasic li cʼusi oy ta yoʼnton stuque», xi (Juan 8:44).

Oy ep krixchanoetik ti tspasik li kʼusi lek chil li Diabloe. Li Jesuse «banamil» ta sbiiltas. ¿Kʼusi van jaʼ xa naʼ li «banamil» ti chal li Jesuse?... Jsaʼtik Juan, kapitulo 15, versikulo 19, ti bu xi ta xal li Jesuse: «Ti coʼoluc to chapas achiʼuquic li cristianoetic ti oyic ta sventa banamile, lec chaʼyic ti jechuque, yuʼun jaʼ jech tscʼanic. Pero li voʼoxuque muʼyucoxuc xa ta sventa banamil, yuʼun laj xa jtʼujoxuc loqʼuel, jaʼ yuʼun bajbil chacʼotic», xi.

Jech oxal, li balumil ti tspʼaj li yajtsʼaklomtak Jesuse jaʼik li krixchanoetik ti muʼyuk bu tstsʼakliik li Mukʼta Jchanubtasvaneje. ¿Kʼu yuʼun chpʼajat yuʼun balumil li yajtsʼaklomtak Jesuse?... Nopo jutuk avaʼi.  ¿Buchʼu jaʼ li ajvalil yuʼun li balumil liʼe?... Li Vivliae xi ta xale: Oy ta skʼob pukuj skotol li krixchanoetik ta balumile, xi. Li pukuj taje, jaʼ li Diablo Satanase (1 Juan 5:19).

¿Mi xavaʼibe smelolal tana un kʼu yuʼun toj tsots ta pasel li kʼusi leke?... Li Satanás xchiʼuk li sbalumile jaʼ tspasik ti akʼo tsots ta pasel chkaʼitike. Pe oy yan srasonal. ¿Mi xvul to ta ajol kʼusi jaʼ?... Ta kapitulo 23 la jchantik ti jkotoltik jmulavil krixchanoutik chi j-ayanutike. ¿Mi mu van alakʼuk sba xa naʼ ti kʼalal chʼayem xaʼo li mulile, li Diabloe xchiʼuk li sbalumile?...

Kʼalal mi echʼ li balumil liʼe, ¿kʼusi chkʼot ta pasel ta stojolalik li buchʼutik tspasik li kʼusi leke?

Li Vivliae xi ta xal ta melele: «Li banamile [...], ta onoʼox xlaj». Taje jaʼ tskʼan chal ti chchʼayik-o batel skotol li buchʼutik maʼukik yajtsʼaklom li Mukʼta Jchanubtasvaneje, muʼyuk bu ta x-akʼat xkuxiik sbatel osil. Pe ¿mi xa naʼ buchʼutik ti chkuxiik ta sbatel osile?... Li Vivliae xi to ta xale: «Li bochʼo jaʼ tspasilan cʼusi tscʼan yoʼnton Diose jaʼ ta xcuxi sbatel osil» (1 Juan 2:17). Jaʼ noʼox li krixchanoetik ti tspasik li kʼusi leke, li «cʼusi tscʼan yoʼnton Diose», ta xkuxiik ta sbatel osil li ta achʼ balumil Yuʼune. Jaʼ yuʼun, manchuk mi tsots chkaʼitik, ¿mi mu meleluk ti ta jkʼan ta jpastik li kʼusi leke?...

Jmoj jkʼeltik junantik tekstoetik ta Vivlia ti chakʼbutik ta ilel kʼu yuʼun mu kʼunuk chkaʼitik ta spasel li kʼusi leke: Mateo 7:13, 14; Lucas 13:23, 24, xchiʼuk Hechos 14:21, 22.