Kʼelo li kʼusi yichʼoje

Batan ta saʼobil

 KAPITULO 9

Skʼan ta jtsʼiktik li prevaetike

Skʼan ta jtsʼiktik li prevaetike

¿MI OY yalojboxuk junuk velta ti akʼo xa pas li kʼusi chopole?... ¿Mi oy buchʼu saʼojbot ajol sventa cha pas? ¿Mi yalojboxuk ti kʼupil sba ta pasel xchiʼuk ti muʼyuk bu chopol ta pasel ta melele?... Li buchʼu ta xalbot taje yakal ta xakʼot ta preva.

¿Kʼusi skʼan ta jpastik kʼalal ta xkichʼtik akʼel ta prevae? ¿Mi ta van jpastik li kʼusi chopole?... Taje muʼyuk me bu ta slekubtasbe yoʼonton li Diose. Pe, ¿mi xa naʼ buchʼu ti xuʼ ta slekubtasbe yoʼontone?... Jaʼ, jaʼ li Diablo Satanase.

Li Satanase jaʼ yajkontra li Diose, xchiʼuk jaʼ jkontratik ek li voʼotike. Mu xuʼ xkiltik, yuʼun li stuke jaʼ jun espiritu. Pe li stuke xuʼ ta xilutik. Jun kʼakʼale li Diabloe la skʼopon li Jesuse, li Mukʼta Jchanubtasvaneje, xchiʼuk laj yakʼ ta preva. Jkʼeltik kʼusi la spas li Jesuse, vaʼun ta jnaʼtik kʼusi xuʼ jpastik kʼalal ta xkichʼtik akʼel ta prevae.

¿Kʼusi van xuʼ lik vuluk ta sjol li Jesús kʼalal laj yichʼ voʼe?

Li Jesuse jaʼ onoʼox la skʼan la spas li kʼusi tskʼan li Diose. Jamal laj yakʼ ta ilel ti kʼalal laj yichʼ voʼ ta ukʼum Jordane. Ta tsʼakal ne, kʼalal mu to jaluk yichʼoj voʼ li Jesuse jaʼo akʼat ta preva yuʼun li Satanase. Li Vivliae ta xal ti «ijam li vinajel[...]» ta stojolal li Jesuse (Mateo 3:16). Taje jaʼ skʼan chal ti oyikʼaluk van lik vuluk ta sjol li sbaʼyel kuxlejal kʼalal te toʼox oy ta vinajel xchiʼuk li Diose.

Kʼalal laj yichʼ voʼ li Jesuse, ibat ta taki xokol balumil sventa tsnopbe smelolal li  kʼusitik lik vuluk ta sjole. Echʼ 40 kʼakʼal xchiʼuk 40 akʼobal. Li kʼu sjalil taje li Jesuse mu kʼusi la slajes, jech un chaʼa, chviʼnaj tajek. Vaʼun jaʼo akʼat ta preva yuʼun li Satanase.

Li Diabloe, ¿kʼu yelan la stunes tonetik sventa chakʼ ta preva li Jesuse?

Li Diabloe xi laj yalbee: «Me voʼot Xnichʼonot Diose, albo li tonetic liʼe, acʼo cʼatajuc ta vaj», x-utat. ¡Kʼu to noʼox smuil la sveʼ jxutʼuk vaj jechuk li Jesuse! Pe ¿mi xuʼ yuʼun tskʼatajes ta vaj li tonetike?... Xuʼ, yuʼun jaʼ xNichʼon li Diose xchiʼuk oy sjuʼel ti mu buchʼu jech yuʼune.

Ti voʼotuk laj yalbot li Diablo ti akʼo xa kʼatajes ta vaj li tone, ¿mi laj van apas jechuk?... Li Jesuse chviʼnaj toʼox tajmek. ¿Mi mu van oyuk srason sventa tspas junuk velta?... Li Jesuse snaʼoj ti muʼyuk lek ti jaʼ jech ta stunes li sjuʼel ti akʼbil yuʼun li Jeovae. Skʼan ta stunes sventa tsnopajes ta stojolal sTot li krixchanoetike, maʼuk ta sventa slekilal stuk.

Jech un chaʼa li Jesuse muʼyuk bu la xchʼunbe li skʼop Satanase, jaʼ lek laj yalbe li kʼusi tsʼibabil li ta Vivliae: Mu ta vajuk noʼox ta xkuxi li krixchanoe, moʼoj, jaʼ ta xkuxi ta sventa skotol li skʼop chlokʼ ta ye li Jeovae. Li Jesuse snaʼoj ti jaʼ mas tsots skʼoplal ti tslekubtasbe yoʼonton li Jeovae, maʼuk ti oyuk jutuk kʼusi tslajese.

Pe li Diabloe muʼyuk bu laj yikta sba. Vaʼun laj yikʼ batel ta Jerusalén li Jesuse xchiʼuk te kʼot svaʼan ta mero sjol chʼulna. Tee xi laj yalbee: Mi voʼot xNichʼonot Diose, jipo aba yalel  liʼi, yuʼun jech tsʼibabil ta skʼop Dios ti ta stak tal yaj-almantaltak sventa mu xa yayijes abae, x-utat.

¿Kʼu yuʼun jaʼ jech laj yal li Satanase?... Yuʼun la skʼan laj yakʼ ta preva li Jesús sventa akʼo spas li kʼusi xibal sbae. Pe li Jesuse muʼyuk bu la xchaʼchʼunbe, moʼoj, xi la stakʼbee: «Hech tsʼibabil ti scʼop ti Diose: “Mu me xapasbe proval yoʼnton ti Cajvaltic Diose”» xi (Mateo 4:7, SCʼop Dios ta Huixtán). Li Jesuse snaʼoj ti muʼyuk bu lek ti ta xakʼ ta preva li Jeova kʼalal ta xakʼ ta vokol li xkuxlejale.

Pe akʼo mi jech, li Satanase muʼyuk bu laj yikta sba. Laj yikʼ batel ta mukʼta tayal vits, vaʼun laj yakʼbe yil skotol li ajvaliletik yuʼun li balumile xchiʼuk li smukʼulalike. Vaʼun xi laj yale: «Scotol leʼe, voʼot chacacʼbot scotol me cha quejan aba ta jtojole, me chavichʼun ta muqʼue», xi.

Nopo avaʼi ta sventa li kʼusi laj yal ta xakʼ li Diabloe. ¿Mi jaʼ yuʼun ta melel skotol li ajvaliletik li Satanase?... Veno, li Jesuse muʼyuk bu laj yal ti mi maʼuk yuʼun li Satanase. Ti yuʼunuk lajuk sjut kʼop li Diabloe, li Jesuse laj yalbe ti jechuke. Jaʼ jech ta melel, li Satanase jaʼ li ajvalil yuʼun skotol li lumetik ta Balumile. Li Vivliae ta sbiiltas kʼuchaʼal «banquilal jpas mantal liʼ ta banamile» (Juan 12:31).

Li Satanase, ¿kʼu yuʼun xuʼ laj yalbe ti ta xakʼbe skotol ajvaliletik li Jesuse?

Ti tauk xalbot ti oy kʼusi ta xakʼbot ta melel li Diabloe, pe tskʼanbot noxtok ti akʼo xa muyubta ta skoj taje, ¿mi ta van xa pas?... Li Jesuse snaʼoj ti muʼyuk lek ti ta xichʼ muyubtael li Diabloe, akʼo mi kʼusuk ch-akʼbat. Jaʼ yuʼun xi laj yalbee: ¡Batan Satanás! Yuʼun li Vivliae ta xal ti jaʼ skʼan cha muyubta li Jeova Dios avuʼune xchiʼuk jaʼ noʼox skʼan cha tun ta stojolal, xi (Mateo 4:1-10; Lucas 4:1-13).

¿Kʼusi van cha pas mi chavichʼ akʼel ta prevae?

Li voʼotik eke ta xkichʼtik akʼel ta preva. ¿Mi xa naʼ kʼusitik prevail? Jech kʼuchaʼal liʼe, oyikʼaluk van ta spas o ta sman pan li ameʼe o kʼusuk yan ti toj mu ta lajesele, xchiʼuk cha yalbot ti mu stakʼ xa tsak jaʼ to mi laj yalbote. Pe li voʼote cha viʼnaj xa tajmek xchiʼuk cha kʼan cha lajes ta jyalel. ¿Mi ta van xa chʼunbe smantal li ameʼe?... Li Satanase tskʼan ti mu xa chʼunbe li smantale.

 Vuleso ta ajol li Jesuse: li stuke chviʼnaj ox tajmek, pe snaʼoj ti jaʼ mas tsots skʼoplal ti ta slekubtasbe yoʼonton li Diose, maʼuk ti chveʼe. Mi cha chʼunbe smantal li ameʼe, ta me xavakʼ ta ilel ti jechot kʼuchaʼal li Jesuse.

Li yan ololetike oyikʼaluk van cha yalboxuk ti xa bikʼ junuk pastiya, o akʼo xa sikʼolan jutuk marihuana xchiʼuk ta xalboxuk ti xkuxet avoʼonton chavaʼi aba yuʼune. Pe taje xuʼ cha ipaj yuʼun o xuʼ cha smilot. O xuʼ oy buchʼu cha yakʼbot asikʼolan  yan kʼusuk moyal ti xuʼ cha yipajesot xtoke, xchiʼuk xuʼ xi cha yalbote: «¡Mi xbutsʼ avuʼun avaloj!». ¿Kʼusi van cha pas?...

Vuleso ta ajol li Jesuse. Li Satanase laj yakʼbe yipal sventa akʼo xakʼ ta vokol li xkuxlejal Jesús ti kʼalal laj yalbe ti akʼo sten sba yalel ta sjol chʼulnae. Pe li Jesuse muʼyuk bu la spas. Li voʼote, ¿kʼusi van cha pas mi oy buchʼu cha yalbot ti akʼo xa pas ti kʼusi chakʼ ta vokol li akuxlejale?... Li Jesuse muʼyuk bu la xchikintabe skʼop li Satanase. Jech ek li voʼote, mu me xa chikintabe skʼop li buchʼu chakʼ persa sventa cha pas li kʼusitik chopole.

¿Kʼu yuʼun chopol ta tunesel lokʼoletik sventa ta jmuyubtatik li Diose?

Oyikʼal van jun kʼakʼal cha yalboxuk ti akʼo xa muyubta junuk lokʼole, jtos ti kʼusi chal li Vivlia ti muʼyuk leke (Éxodo 20:4, 5). Taje xuʼ chkʼot ta pasel ta chanob vun kʼalal ta smuyesik li banderae o kʼalal ta xichʼik ta mukʼ krixchanoetik ta voʼne ti lek ojtikinbilike. Xuʼ van cha yalboxuk ti mu stakʼ xa sut ta chanob vun mi mu xa vichʼ ta mukʼe. ¿Kʼusi van cha pas?...

Kʼun ta pasel chkaʼitik li kʼusitik lek kʼalal jech ta spas skotol li krixchanoetike. Pe toj tsots me ta spasel chkaʼitik ti kʼalal tskʼanik ti akʼo jpastik li kʼusi chopol li yantike. Oyikʼaluk ta xalik ti mu toj chopoluk li kʼusitik yakalik ta spasele. Akʼo mi jech, li kʼusi mas tsots skʼoplale jaʼ: ¿kʼusi chal li Diose? Li stuke jaʼ mas snaʼ, li voʼotike moʼoj.

Jech un chaʼa, manchuk mi kʼusuk chalik li yantike, mu me jpastik li kʼusi chal Dios ti chopolike. Mi jaʼ jech ta jpastik taje, ta xkakʼtik xmuyubaj li Diose xchiʼuk muʼyuk bu ta jlekubtasbetik yoʼonton li Diabloe.

Ta Salmo 1:1, 2; Proverbios 1:10, 11; Mateo 26:41, xchiʼuk 2 Timoteo 2:22, ta jtabetik mas yaʼyejal ta sventa ti kʼuxi xuʼ jtsʼiktik ti kʼalal ta xkichʼtik akʼel ta preva ta spasel li kʼusi chopole.